ਟੀਮ ਇੰਡੀਆ ਦੇ ਆਲਰਾਊਂਡਰ ਖਿਡਾਰੀ ਹਾਰਦਿਕ ਪੰਡਯਾ ਨੇ ਗੁਜਰਾਤ ਟਾਈਟਨਸ ਦੀ ਕਪਤਾਨੀ ਸੰਭਾਲ ਲਈ ਹੈ। ਹਾਰਦਿਕ ਪੰਡਯਾ ਨੇ ਦੱਸਿਆ ਹੈ ਕਿ ਉਹ ਇਸ ਆਈਪੀਐੱਲ ਵਿੱਚ ਆਪਣੀ ਟੀਮ ਲਈ ਵਧੀਆ ਕਪਤਾਨ ਸਾਬਤ ਹੋਣਾ ਚਾਹੁੰਦੇ ਹਨ। ਗੁਜਰਾਤ ਟਾਈਟਨਸ ਦੀ ਜਰਸੀ ਲਾਂਚ ਕਰਨ ਮੌਕੇ ਹਾਰਦਿਕ ਨੇ ਕਿਹਾ ਕਿ ਜੇਕਰ ਟੀਮ ਜਿੱਤਦੀ ਹੈ ਤਾਂ ਇਸ ਦਾ ਸਾਰਾ ਸਿਹਰਾ ਨੌਜਵਾਨ ਖਿਡਾਰੀਆਂ ਨੂੰ ਜਾਵੇਗਾ। ਇਸ ਦੇ ਨਾਲ ਹੀ ਜੇਕਰ ਟੀਮ ਹਾਰਦੀ ਹੈ ਤਾਂ ਸਾਰੀ ਜ਼ਿੰਮੇਵਾਰੀ ਉਨ੍ਹਾਂ ਦੀ ਹੋਵੇਗੀ।
ਜ਼ਿਕਰਯੋਗ ਹੈ ਕਿ ਆਈਪੀਐਲ ਵਿੱਚ ਹੁਣ ਤੱਕ ਖੇਡੇ ਗਏ ਕੁੱਲ 92 ਮੈਚਾਂ ਵਿੱਚ ਹਾਰਦਿਕ ਨੇ 153.91 ਦੀ ਸਟ੍ਰਾਈਕ ਰੇਟ ਨਾਲ 1,476 ਦੌੜਾਂ ਬਣਾਈਆਂ ਹਨ। ਇਸ ਦੌਰਾਨ ਉਨ੍ਹਾਂ ਦੇ ਬੱਲੇ ‘ਤੇ 97 ਚੌਕੇ ਅਤੇ 98 ਛੱਕੇ ਲੱਗੇ ਹਨ। ਇਸ ਤੋਂ ਇਲਾਵਾ ਹਾਰਦਿਕ ਨੇ ਗੇਂਦਬਾਜ਼ੀ ‘ਚ ਵੀ 42 ਵਿਕਟਾਂ ਲਈਆਂ ਹਨ। ਇਸ ਦੇ ਨਾਲ ਹੀ ਦਸ ਦਈਏ ਕਿ ਹਾਰਦਿਕ ਪਹਿਲੀ ਵਾਰ ਕਪਤਾਨੀ ਕਰਨਗੇਅਤੇ ਫਿਲਹਾਲ ਉਹ ਭਾਰਤੀ ਟੀਮ ਤੋਂ ਬਾਹਰ ਚੱਲ ਰਹੇ ਹਨ। ਅਜਿਹੇ ‘ਚ ਜੇਕਰ ਹਾਰਦਿਕ ਨੂੰ ਫਿਰ ਤੋਂ ਭਾਰਤੀ ਟੀਮ ‘ਚ ਆਉਣਾ ਹੈ ਤਾਂ ਇਸ ਆਈਪੀਐੱਲ ਨੂੰ ਆਪਣੇ ਲਈ ਖਾਸ ਬਣਾਉਣਾ ਹੋਵੇਗਾ।