ਪਾਕਿਸਤਾਨ ਦੇ ਜੈਵਲਿਨ ਥ੍ਰੋਅਰ ਅਰਸ਼ਦ ਨਦੀਮ ਨੇ ਬਰਮਿੰਘਮ ਵਿੱਚ ਚੱਲ ਰਹੀਆਂ ਰਾਸ਼ਟਰਮੰਡਲ ਖੇਡਾਂ ਵਿੱਚ ਰਿਕਾਰਡ ਤੋੜ ਪ੍ਰਦਰਸ਼ਨ ਕੀਤਾ ਹੈ। ਲਹਿੰਦੇ ਪੰਜਾਬ (ਪਾਕਿਸਤਾਨ) ਦੇ ਖਾਨੇਵਾਲ ਦੇ ਅਰਸ਼ਦ ਨਦੀਮ ਨੇ ਕਾਮਨਵੈਲਥ ਖੇਡਾਂ ਵਿੱਚ ਐਤਵਾਰ ਰਾਤ ਨੂੰ ਜੈਵਲਿਨ ਥਰੋਅ ਵਿੱਚ 90.18 ਮੀਟਰ ਦੀ ਥਰੋਅ ਨਾਲ ਨਵਾਂ ਰਿਕਾਰਡ ਬਣਾਉਂਦਿਆਂ ਸੋਨੇ ਦਾ ਤਮਗਾ ਜਿੱਤਿਆ। ਅਰਸ਼ਦ ਦਾ ਇਹ ਵੱਡੇ ਖੇਡ ਮੰਚ ਉੱਤੇ ਪਹਿਲਾ ਗੋਲਡ ਮੈਡਲ ਹੈ। ਇਸ ਤੋਂ ਪਹਿਲਾ ਉਸ ਨੇ ਸੈਫ਼ ਖੇਡਾਂ ਵਿੱਚ ਸੋਨੇ ਅਤੇ ਏਸ਼ੀਅਨ ਖੇਡਾਂ ਵਿੱਚ ਕਾਂਸੀ ਦਾ ਤਮਗਾ ਜਿੱਤਿਆ ਹੈ।
25 ਵਰ੍ਹਿਆਂ ਦੇ ਅਰਸ਼ਦ ਨੇ ਬਾਂਹ ਦੇ ਦਰਦ ਦੇ ਬਾਵਜੂਦ ਆਪਣੇ ਕਰੀਅਰ ਦੀ ਬਿਹਤਰੀਨ ਥਰੋਅ ਸੁੱਟ ਕੇ ਗ੍ਰਨੇਡਾ ਦੇ ਵਿਸ਼ਵ ਚੈਂਪੀਅਨ ਐਂਡਰਸਨ ਪੀਟਰਜ਼ ਨੂੰ ਪਛਾੜਿਆ। ਪੀਟਰਜ਼ ਨੇ 88.64 ਮੀਟਰ ਥਰੋਅ ਨਾਲ ਚਾਂਦੀ ਦਾ ਤਮਗਾ ਜਿੱਤਿਆ। ਭਾਰਤ ਦੇ ਓਲੰਪਿਕ ਚੈਂਪੀਅਨ ਤੇ ਵਿਸ਼ਵ ਚੈਂਪੀਅਨਸ਼ਿਪ ਦੇ ਮੈਡਲਿਸਟ ਅਤੇ 2018 ਕਾਮਨਵੈਲਥ ਖੇਡਾਂ ਦੇ ਚੈਂਪੀਅਨ ਨੀਰਜ ਚੋਪੜਾ ਦੀ ਗੈਰਹਾਜਰੀ ਵਿੱਚ ਡੀਪੀ ਮਨੂ ਪੰਜਵੇਂ ਤੇ ਰੋਹਿਤ ਯਾਦਵ ਛੇਵੇਂ ਸਥਾਨ ਉੱਤੇ ਆਏ।
ਇਸ ਤੋਂ ਪਹਿਲਾ ਹਰ ਵੱਡੇ ਮੰਚ ਉੱਤੇ ਅਰਸ਼ਦ ਨਦੀਮ ਤੇ ਨੀਰਜ ਚੋਪੜਾ ਆਹਮੋ-ਸਾਹਮਣੇ ਰਹੇ ਹਨ। ਜਿੱਤ ਭਾਵੇਂ ਨੀਰਜ ਦੀ ਹੁੰਦੀ ਰਹੀ ਪਰ ਦੋਵੇਂ ਅਥਲੀਟਾਂ ਵਿਚਾਲੇ ਆਪਸੀ ਸਬੰਧ ਦੋਸਤੀ ਵਾਲੇ ਰਹੇ। ਨਦੀਮ ਦੀ ਇਹ ਜਿੱਤ ਇਸ ਲਈ ਵੀ ਖ਼ਾਸ ਹੈ ਕਿਉਂਕਿ ਜਿਹੜੇ ਔਖੇ ਹਾਲਾਤਾਂ ਵਿੱਚ ਉਹ ਤਿਆਰੀ ਕਰਦਾ ਰਿਹਾ, ਉਸ ਲਈ ਵੱਡੇ ਖੇਡ ਮੰਚ ਉੱਤੇ ਜਿੱਤਣਾ ਅਤੇ ਬਾਂਹ ਦੇ ਦਰਦ ਦੇ ਬਾਵਜੂਦ 90 ਮੀਟਰ ਜੈਵਲਿਨ ਪਾਰ ਕਰਨੀ ਵੱਡੀ ਗੱਲ ਹੈ।
