ਜਦੋਂ ਵੀ ਕੋਈ ਲੋਹੇ ਦੀ ਚੀਜ਼ ਲੰਬੇ ਸਮੇਂ ਲਈ ਪਾਣੀ ਦੇ ਸੰਪਰਕ ਵਿੱਚ ਰਹਿੰਦੀ ਹੈ, ਤਾਂ ਇਸ ਨੂੰ ਜੰਗਾਲ ਲੱਗ ਜਾਂਦਾ ਹੈ। ਇਹ ਜੰਗਾਲ ਕਿਸੇ ਵੀ ਔਜ਼ਾਰ, ਬਾਹਰੀ ਫਰਨੀਚਰ, ਕਾਰ ਜਾਂ ਘਰ ਦੇ ਦਰਵਾਜ਼ਿਆਂ ਅਤੇ ਖਿੜਕੀਆਂ ‘ਤੇ ਲੱਗ ਸਕਦਾ ਹੈ। ਪਰ ਇਸਦਾ ਮਤਲਬ ਇਹ ਨਹੀਂ ਹੈ ਕਿ ਤੁਸੀਂ ਇਸ ਜੰਗਾਲ ਨੂੰ ਹਟਾ ਨਹੀਂ ਸਕਦੇ. ਤੁਹਾਨੂੰ ਸਿਰਫ ਕੁਝ ਤਰੀਕੇ ਅਪਣਾਉਣੇ ਪੈਣਗੇ। ਅੱਜ ਅਸੀਂ ਤੁਹਾਨੂੰ ਪੁਰਾਣੀਆਂ ਜੰਗਾਲ ਵਾਲੀਆਂ ਚੀਜ਼ਾਂ ਨੂੰ ਆਸਾਨੀ ਨਾਲ ਸਾਫ ਕਰਨ ਦੇ ਕੁਝ ਆਸਾਨ ਤਰੀਕਿਆਂ ਬਾਰੇ ਦੱਸ ਰਹੇ ਹਾਂ।
ਤੁਸੀਂ ਬੇਕਿੰਗ ਸੋਡੇ ਦੀ ਵਰਤੋਂ ਕਰਕੇ ਖਿੜਕੀਆਂ ਅਤੇ ਦਰਵਾਜ਼ਿਆਂ ‘ਤੇ ਲੱਗੀ ਜੰਗਾਲ ਤੋਂ ਛੁਟਕਾਰਾ ਪਾ ਸਕਦੇ ਹੋ। ਇਸਦੇ ਲਈ ਤੁਹਾਨੂੰ ਪਾਣੀ ਵਿੱਚ ਬੇਕਿੰਗ ਸੋਡਾ ਮਿਲਾ ਕੇ ਇੱਕ ਗਾੜ੍ਹਾ ਪੇਸਟ ਤਿਆਰ ਕਰਨਾ ਹੋਵੇਗਾ। ਫਿਰ ਇਸ ਨੂੰ ਜੰਗਾਲ ਵਾਲੀ ਜਗ੍ਹਾ ‘ਤੇ ਲਗਾਓ ਅਤੇ ਕੁਝ ਦੇਰ ਲਈ ਛੱਡ ਦਿਓ। ਅੰਤ ਵਿੱਚ, ਇਸਨੂੰ ਟੂਥਬਰਸ਼ ਨਾਲ ਸਾਫ਼ ਕਰੋ।
ਤੁਸੀਂ ਨਿੰਬੂ ਅਤੇ ਨਮਕ ਦੀ ਮਦਦ ਨਾਲ ਜੰਗਾਲ ਨੂੰ ਹਟਾ ਸਕਦੇ ਹੋ। ਇਸ ਦੇ ਲਈ ਤੁਹਾਨੂੰ ਜੰਗਾਲ ਵਾਲੀ ਜਗ੍ਹਾ ‘ਤੇ ਨਮਕ ਪਾ ਕੇ ਪਰਤ ਬਣਾਉਣੀ ਹੋਵੇਗੀ। ਫਿਰ ਇਸ ‘ਤੇ ਨਿੰਬੂ ਦਾ ਰਸ ਪਾ ਦਿਓ ਹੁਣ ਇਸ ਨੂੰ ਲਗਭਗ 3 ਘੰਟੇ ਲਈ ਇਸ ਤਰ੍ਹਾਂ ਹੀ ਰਹਿਣ ਦਿਓ। ਫਿਰ ਅੰਤ ਵਿੱਚ ਇਸ ਨੂੰ ਨਿੰਬੂ ਦੇ ਛਿਲਕੇ ਨਾਲ ਰਗੜ ਕੇ ਸਾਫ਼ ਕਰੋ। ਤੁਸੀਂ ਦੇਖੋਗੇ ਕਿ ਜੰਗਾਲ ਦੂਰ ਹੋ ਗਿਆ ਹੈ।
ਚਿੱਟੇ ਸਿਰਕੇ ਨੂੰ ਵਰਤ ਕੇ ਵੀ ਜੰਗਾਲ ਵਾਲੀਆਂ ਖਿੜਕੀਆਂ ਅਤੇ ਦਰਵਾਜ਼ਿਆਂ ਨੂੰ ਸਾਫ ਕੀਤਾ ਜਾ ਸਕਦਾ ਹੈ। ਜੰਗਾਲ ਵਾਲੀਆਂ ਖਿੜਕੀਆਂ ਅਤੇ ਦਰਵਾਜ਼ਿਆਂ ਉਪਰ ਕੁਝ ਘੰਟਿਆਂ ਲਈ ਚਿੱਟੇ ਸਿਰਕੇ ਨੂੰ ਪਾਓ ਅਤੇ ਇੰਝ ਹੀ ਭਿਜਿਆ ਰਹਿਣ ਦਿਓ। ਹੁਣ ਸਿਰਕੇ ‘ਚ ਡੁਬੋਇਆ ਹੋਇਆ ਕੱਪੜਾ ਲਓ ਅਤੇ ਫਿਰ ਇਸ ਨਾਲ ਦਰਵਾਜ਼ਿਆਂ ਅਤੇ ਖਿੜਕੀਆਂ ਨੂੰ ਸਾਫ਼ ਕਰੋ।
ਆਲੂ ਅਤੇ ਭਾਂਡੇ ਧੋਣ ਵਾਲੇ ਸਾਬਣ ਨਾਲ ਵੀ ਸਭ ਤੋਂ ਪੁਰਾਣੀ ਜੰਗਾਲ ਨੂੰ ਦੂਰ ਕੀਤਾ ਜਾ ਸਕਦਾ ਹੈ। ਤੁਹਾਨੂੰ ਸਭ ਤੋਂ ਪਹਿਲਾਂ ਇੱਕ ਆਲੂ ਨੂੰ ਦੋ ਹਿੱਸਿਆਂ ਵਿੱਚ ਕੱਟਣਾ ਹੈ ਅਤੇ ਇਸਨੂੰ ਡਿਸ਼ ਵਾਸ਼ ਸਾਬਣ ਵਿੱਚ ਡੁਬੋ ਕੇ ਜੰਗਾਲ ਵਾਲੀ ਥਾਂ ‘ਤੇ ਰਗੜਨਾ ਹੈ। ਅਜਿਹਾ ਕਰਨ ਨਾਲ ਜੰਗਾਲ ਦੂਰ ਹੋ ਸਕਦਾ ਹੈ।
