ਸੰਗੀਤਕਾਰ ਸਲੀਮ ਮਰਚੈਂਟ ਨੇ ਬੀਤੇ ਦਿਨ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦਾ ਗੀਤ ‘ਜਾਂਦੀ ਵਾਰ’ ਦੇ 2 ਸਤੰਬਰ ਨੂੰ ਰਿਲੀਜ਼ ਨਾ ਹੋਣ ਦੀ ਜਾਣਕਾਰੀ ਦਿੱਤੀ। ਕਿਉਕਿ ਗੀਤ ‘ਜਾਂਦੀ ਵਾਰ’ ਦੇ ਰਿਲੀਜ਼ ਹੋਣ ‘ਤੇ ਸਿੱਧੂ ਦੇ ਪਿਤਾ ਬਲਕੌਰ ਸਿੰਘ ਅਤੇ ਮਾਤਾ ਚਰਨ ਕੌਰ ਅਤੇ ਸਿੱਧੂ ਦੇ ਪ੍ਰਸ਼ੰਸ਼ਕਾਂ ਨੇ ਇਤਰਾਜ਼ ਜਤਾਇਆ ਸੀ। ਇਸ ਲਈ ਗੀਤ ਨੂੰ ਹੁਣ ਸਿੱਧੂ ਦੇ ਮਾਪਿਆਂ ਨਾਲ ਸਲਾਹ ਕਰਕੇ ਹੀ ਰਿਲੀਜ਼ ਕੀਤਾ ਜਾਵੇਗਾ। ਗੀਤ ‘ਜਾਂਦੀ ਵਾਰ’ ਦੀ ਰਿਲੀਜ਼ ਤਾਰੀਕ ਮੁਲਤਵੀ ਹੋਣ ‘ਤੇ ਪੰਜਾਬੀ ਗੀਤਕਾਰ ਤੇ ਲੇਖਕ ਬੰਟੀ ਬੈਂਸ ਨੇ ਇੰਸਟਾਗ੍ਰਾਮ ‘ਤੇ ਸਟੋਰੀ ਸਾਂਝੀ ਕਰ ਸੰਗੀਤਕਾਰ ਸਲੀਮ ਮਰਚੈਂਟ ਦੇ ਨਾਂ ਇੱਕ ਮੈਸੇਜ ਲਿਖਿਆ।
ਇਸ ਮੈਸੇਜ ਰਾਹੀਂ ਬੰਟੀ ਕਹਿੰਦੇ ਹਨ “ਸਤਿਕਾਰਯੋਗ ਸਲੀਮ ਸਰ, ਆਖਰਕਾਰ ਤੁਸੀਂ ਸਿੱਧੂ ਦੇ ਫ਼ੈਨਜ਼ ਦਾ ਮਾਣ ਰੱਖ ਲਿਆ, ਸਿੱਧੂ ਦੇ ਮਾਪਿਆਂ ਦਾ ਮਾਣ ਰੱਖ ਲਿਆ। ਹਾਲਾਂਕਿ ਪਹਿਲਾਂ ਤੁਸੀਂ ਸਿੱਧੂ ਦਾ ਗੀਤ ਰਿਲੀਜ਼ ਕਰਨ ਨੂੰ ਲੈ ਕੇ ਅੜੇ ਰਹੇ। ਇੱਥੋਂ ਤੱਕ ਕਿ ਤੁਸੀਂ ਤੇ ਸੁਲੇਮਾਨ ਨੇ ਸਿੱਧੂ ਦੇ ਫ਼ੈਨਜ਼ ਨੂੰ ਇਹ ਤੱਕ ਕਿਹਾ ਸੀ ਕਿ ਜੋ ਕੁੱਝ ਕਰਨਾ ਕਰ ਲਓ, ਭਾਵੇਂ ਕੋਰਟ ਲੈ ਜਾਓ, ਗੀਤ ਤਾਂ ਰਿਲੀਜ਼ ਹੋ ਕੇ ਰਹੂਗਾ ਪਰ ਸਿੱਧੂ ਦੇ ਫ਼ੈਨਜ਼ ਦਾ ਧੰਨਵਾਦ ਜਿਹੜੇ ਇਸ ਸਮੇਂ ਉਨ੍ਹਾਂ ਦੇ ਪਰਿਵਾਰ ਨਾਲ ਖੜ੍ਹੇ ਰਹੇ ਕਿਉਂਕਿ ਸਿੱਧੂ ਦੇ ਫ਼ੈਨਜ਼ ਉਨ੍ਹਾਂ ਦੇ ਪਰਿਵਾਰ ਦਾ ਭਲਾ ਚਾਹੁੰਦੇ ਹਨ। ਸਿੱਧੂ ਨੇ ‘ਜਾਂਦੀ ਵਾਰ’ ਗਾਣੇ ਨੂੰ ਖੁਦ ਗਾਇਆ ਸੀ, ਇੱਥੋਂ ਤੱਕ ਕਿ ਗੀਤ ਦੇ ਬੋਲ ਵੀ ਖੁਦ ਲਿਖੇ ਸਨ। ਇਸ ਕਰਕੇ ਸਿੱਧੂ ਦੀ ਮਿਹਨਤ ਦੀ ਕਮਾਈ ‘ਤੇ ਉਨ੍ਹਾਂ ਦੇ ਮਾਪਿਆਂ ਦਾ ਹੱਕ ਹੈ।”
ਇਸ ਦੇ ਨਾਲ ਹੀ ਇਕ ਹੋਰ ਮੈਸੇਜ ਸਾਂਝਾ ਕਰਦਿਆਂ ਬੰਟੀ ਬੈਂਸ ਨੇ ਸੰਗੀਤਕਾਰ ਸਲੀਮ ਮਰਚੈਂਟ ‘ਤੇ ਸਿੱਧੂ ਦੇ ਗੀਤ ਤੋਂ ਜੰਮ ਕੇ ਆਰਥਿਕ ਫ਼ਾਇਦਾ ਚੁੱਕਣ ਦਾ ਦੋਸ਼ ਵੀ ਲਾਇਆ ਹੈ ਉਨ੍ਹਾਂ ਦਾ ਕਹਿਣਾ ਹੈ ਕਿ “ਸਲੀਮ ਮਰਚੈਂਟ ਨੇ ਸਿੱਧੂ ਦੀ ਮੌਤ ਦਾ ਫ਼ਾਇਦਾ ਲੈਣ ਦੀ ਕੋਸ਼ਿਸ਼ ਕੀਤੀ। ਮਰਚੈਂਟ ਨੇ ਸਿੱਧੂ ਦੇ ਗੀਤ ਤੋਂ ਜੰਮ ਕੇ ਆਰਥਿਕ ਫ਼ਾਇਦਾ ਲਿਆ। ਬੈਂਸ ਨੇ ਇਹ ਵੀ ਦੋਸ਼ ਲਾਇਆ ਕਿ “ਮਰਚੈਂਟ ਨੇ ਸਿੱਧੂ ਦੇ ਸਾਈਨ (ਦਸਤਖਤ) ਤੇ ਉਨ੍ਹਾਂ ਦੇ ਬਰੈਂਡ ਦੀ ਟੀ-ਸ਼ਰਟਾਂ ਨੂੰ ਆਪਣੇ ਫ਼ਾਇਦੇ ਲਈ 4 ਗੁਣਾ ਕੀਮਤ ‘ਤੇ ਵੇਚਿਆ। ਮਰਚੈਂਟ ਨੇ ਸਿੱਧੂ ਦੇ ਸਾਈਨ ਤੇ ਆਟੋਗਰਾਫ਼ ਨੂੰ ਸਾਢੇ 23 ਹਜ਼ਾਰ ਦੀ ਕੀਮਤ ਤੱਕ ਵਿਚ ਵੇਚਿਆ, ਇਹ ਬਹੁਤ ਬੁਰੀ ਗੱਲ ਹੈ।”
