ਜ਼ੀਰਕਪੁਰ , 22 ਦਸੰਬਰ 2021 – ਟਰੱਕ ਯੂਨੀਅਨ ਦੇ ਮੈਂਬਰਾਂ ਨੇ ਮੰਗਲਵਾਰ ਸ਼ਾਮ ਨੂੰ ਸਾਬਕਾ ਮੁੱਖ ਮੰਤਰੀ ਤੇ ਪੰਜਾਬ ਲੋਕ ਕਾਂਗਰਸ ਪਾਰਟੀ ਦੇ ਸੂਬਾ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਦਾ ਘੇਰਾਓ ਕੀਤਾ। ਇਸ ਦੌਰਾਨ ਟਰੱਕ ਯੂਨੀਅਨ ਦੇ ਮੈਂਬਰਾਂ ਨੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਪੌਣਾ ਘੰਟਾ ਘੇਰਾ ਪਾਈ ਰੱਖਿਆ ਅਤੇ ਅਖੀਰ ਕੈਪਟਨ ਅਮਰਿੰਦਰ ਨੇ ਉਨ੍ਹਾਂ ਤੋਂ ਯੂਨੀਅਨਾਂ ਭੰਗ ਕਰਨ ਲਈ ਮੁਆਫੀ ਮੰਗੀ ਤੇ ਸਰਕਾਰ ਆਉਣ ’ਤੇ ਸਾਰੀਆਂ ਮੰਗਾਂ ਮੰਨਣ ਦਾ ਭਰੋਸਾ ਦਿੱਤਾ। ਇਸ ਮਗਰੋਂ ਟਰੱਕ ਅਪਰੇਟਰ ਯੂਨੀਅਨ ਨੇ ਕੈਪਟਨ ਦਾ ਖਹਿੜਾ ਛੱਡਿਆ।
ਟਰੱਕ ਯੂਨੀਅਨ ਦੀ 16 ਰੋਜ਼ਾ ਹੜਤਾਲ ਚਾਲ ਰਹੀ ਹੈ ਅਤੇ ਇਸ ਦੌਰਾਨ ਕੈਪਟਨ ਆਪਣੇ ਕਾਫਲੇ ਨਾਲ ਰਾਜਪੁਰਾ ਤੋਂ ਸਿਆਸੀ ਪ੍ਰੋਗਰਾਮ ਵਿੱਚੋਂ ਚੰਡੀਗੜ੍ਹ ਪਰਤ ਰਹੇ ਸੀ ਕਿ ਟਰੱਕ ਯੂਨੀਅਨਾਂ ਨੂੰ ਇਸ ਗੱਲ ਦੀ ਖ਼ਬਰ ਮਿਲ ਗਈ। ਇਸ ਦੌਰਾਨ ਨੇ ਕੈਪਟਨ ਦੇ ਕਾਫ਼ਲੇ ਨੂੰ ਰੂਫ ਲਾਈਟ ਪੁਆਇੰਟ ਤੋਂ ਏਅਰ ਪੋਰਟ ਰੋਡ ਵੱਲ ਮੁੜਨ ਮੌਕੇ ਟਰੱਕ ਯੂਨੀਅਨ ਦੇ ਮੈਂਬਰਾਂ ਨੇ ਸੜਕ ‘ਤੇ ਲੇਟ ਕੇ ਘੇਰ ਲਿਆ। ਉਨ੍ਹਾਂ ਨੂੰ ਉਦੋਂ ਤੱਕ ਅੱਗੇ ਨਹੀਂ ਵਧਣ ਦਿੱਤਾ ਜਦੋਂ ਤੱਕ ਕੈਪਟਨ ਅਮਰਿੰਦਰ ਸਿੰਘ ਨੇ ਕਾਰ ਤੋਂ ਹੇਠਾਂ ਉਤਰ ਕੇ ਮੁਆਫ਼ੀ ਨਹੀਂ ਮੰਗੀ।
