ਤੂਫਾਨ ਪੈਂਗ (ਨਾਲਗੇ) ਫਿਲੀਪੀਨਜ਼ ਵਿੱਚ ਤਬਾਹੀ ਮਚਾ ਰਿਹਾ ਹੈ। ਇਸ ਕਾਰਨ ਇੱਥੇ ਭਾਰੀ ਮੀਂਹ ਪੈ ਰਿਹਾ ਹੈ। ਕਈ ਰਾਜਾਂ ਵਿੱਚ ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ ਹਨ। ਭਾਰੀ ਮੀਂਹ ਕਾਰਨ ਹੜ੍ਹ ਵੀ ਆ ਗਏ ਹਨ। ਰਿਪੋਰਟਸ ਮੁਤਾਬਿਕ 27 ਅਕਤੂਬਰ ਤੋਂ ਹੁਣ ਤੱਕ 100 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਇਸ ਨਾਲ 10 ਲੱਖ ਲੋਕ ਪ੍ਰਭਾਵਿਤ ਹੋਏ ਹਨ। ਹੜ੍ਹਾਂ ਅਤੇ ਜ਼ਮੀਨ ਖਿਸਕਣ ਨਾਲ ਮਾਗੁਇੰਦਨਾਓ ਅਤੇ ਬੈਂਗਸਾਮੋਰੋ ਸੂਬੇ ਸਭ ਤੋਂ ਵੱਧ ਪ੍ਰਭਾਵਿਤ ਹਨ। ਇਨ੍ਹਾਂ ਇਲਾਕਿਆਂ ਵਿਚ ਸਭ ਤੋਂ ਵੱਧ 53 ਮੌਤਾਂ ਹੋਈਆਂ ਹਨ। ਡਿਜ਼ਾਸਟਰ ਰਿਸਪਾਂਸ ਏਜੰਸੀ ਮੁਤਾਬਕ 69 ਲੋਕ ਜ਼ਖਮੀ ਹੋਏ ਹਨ ਅਤੇ 63 ਲਾਪਤਾ ਹਨ।
ਇਸ ਤੋਂ ਇਲਾਵਾ ਮੀਮਾਰੋਪਾ, ਬਾਈਕੋਲ, ਪੱਛਮੀ ਵਿਸਾਯਾਸ, ਜ਼ੈਂਬੋਆਂਗਾ, ਦੱਖਣੀ ਕੋਟਾਬਾਟੋ, ਸੁਲਤਾਨ ਕੁਦਰਤ, ਸਾਰੰਗਾਨੀ, ਜਨਰਲ ਸੈਂਟੋਸ ਸਿਟੀ ਆਦਿ ਖੇਤਰ ਤੂਫਾਨ ਨਾਲ ਪ੍ਰਭਾਵਿਤ ਹੋਏ ਹਨ। ਖੇਤੀਬਾੜੀ ਵਿਭਾਗ ਨੇ ਦੱਸਿਆ ਕਿ 8,608 ਕਿਸਾਨ ਅਤੇ ਮਛੇਰੇ ਪ੍ਰਭਾਵਿਤ ਹੋਏ ਹਨ। ਇਨ੍ਹਾਂ ਵਿੱਚ ਚਾਵਲ, ਮੱਕੀ, ਉੱਚ ਮੁੱਲ ਵਾਲੀਆਂ ਫਸਲਾਂ ਅਤੇ ਮੱਛੀ ਪਾਲਣ ਆਦਿ ਸ਼ਾਮਲ ਹਨ। ਖੇਤੀਬਾੜੀ ਵਿਭਾਗ ਨੇ ਕਿਹਾ ਕਿ ਪ੍ਰਭਾਵਿਤ ਕਿਸਾਨਾਂ ਨੂੰ ਚੌਲ, ਮੱਕੀ ਅਤੇ ਮਿਸ਼ਰਤ ਸਬਜ਼ੀਆਂ ਦੇ ਬੀਜ ਵੰਡੇ ਜਾਣਗੇ, ਜਦੋਂ ਕਿ ਮੱਛੀ ਪਾਲਣ ਅਤੇ ਜਲ ਸਰੋਤਾਂ ਤੋਂ ਪ੍ਰਭਾਵਿਤ ਮਛੇਰਿਆਂ ਨੂੰ ਵੀ ਸਹਾਇਤਾ ਪ੍ਰਦਾਨ ਕੀਤੀ ਜਾਵੇਗੀ।
