ਆਲ ਇੰਡੀਆ ਮਜਲਿਸ-ਏ-ਇਤੇਹਾਦੁਲ ਦੇ ਚੀਫ ਅਸਦੁਦੀਨ ਓਵੈਸੀ ਉਪਰ 3 ਫਰਵਰੀ ਦੀ ਸ਼ਾਮ ਜਾਨਲੇਵਾ ਹਮਲਾ ਹੋਣ ਬਾਅਦ ਓਵੈਸੀ ਵਾਲ-ਵਾਲ ਬਚੇ। ਦਰਅਸਲ ਹਾਪੁੜ ਜ਼ਿਲੇ ‘ਚ ਪਿਲਖੁਵਾ ਥਾਣੇ ਦੇ ਛਿਜਰਸੀ ਟੋਲ ਪਲਾਜ਼ਾ ‘ਤੇ ਪਹਿਲਾਂ ਤੋਂ ਖੜ੍ਹੇ ਦੋ ਨੌਜਵਾਨਾਂ ਨੇ ਓਵੈਸੀ ਦੀ ਕਾਰ ‘ਤੇ ਗੋਲੀਆਂ ਚਲਾ ਦਿੱਤੀਆਂ। ਤਿੰਨੋ ਗੋਲੀਆਂ ਓਵੈਸੀ ਦੀ ਕਾਰ ਤੇ ਲੱਗੀਆਂ। ਹਮਲੇ ਤੋਂ ਬਾਅਦ ਗ੍ਰਹਿ ਮੰਤਰਾਲੇ ਨੇ ਅਸਦੁਦੀਨ ਓਵੈਸੀ ਨੂੰ ਜ਼ੈੱਡ ਸ਼੍ਰੇਣੀ ਦੀ ਸੁਰੱਖਿਆ ਦਿੱਤੀ ਹੈ।
ਹੁਣ ਓਵੈਸੀ ਦੇ ਸੁਰੱਖਿਆ ਘੇਰੇ ਵਿੱਚ ਸੀਆਰਪੀਐਫ ਦੇ ਜਵਾਨ ਹੋਣਗੇ। ਯਾਨੀ ਹੁਣ ਓਵੈਸੀ ਦੀ ਜ਼ੈੱਡ ਸ਼੍ਰੇਣੀ ਦੀ ਸੁਰੱਖਿਆ ‘ਚ 4 ਤੋਂ 6 ਐੱਨਐੱਸਜੀ ਕਮਾਂਡੋ ਅਤੇ ਪੁਲਸ ਮੁਲਾਜ਼ਮਾਂ ਸਮੇਤ 22 ਜਵਾਨ ਤਾਇਨਾਤ ਹੋਣਗੇ। ਦੂਜੇ ਪਾਸੇ ਪੁਲਿਸ ਸ਼ੁੱਕਰਵਾਰ ਨੂੰ ਦੋ ਹਮਲਾਵਰਾਂ ਸ਼ੁਭਮ ਅਤੇ ਸਚਿਨ ਨੂੰ ਅਦਾਲਤ ਵਿੱਚ ਪੇਸ਼ ਕਰ ਸਕਦੀ ਹੈ।
ਸੂਬੇ ਦੇ ਏਡੀਜੀ ਲਾਅ ਐਂਡ ਆਰਡਰ ਪ੍ਰਸ਼ਾਂਤ ਕੁਮਾਰ ਨੇ ਦੱਸਿਆ ਕਿ ਮੁਲਜ਼ਮਾਂ ਨੇ 2013-14 ਦੌਰਾਨ ਅਯੁੱਧਿਆ ਵਿੱਚ ਰਾਮ ਮੰਦਰ ਬਾਰੇ ਸੰਸਦ ਮੈਂਬਰ ਦੇ ਧਰਮ ਵਿਰੋਧੀ ਭਾਸ਼ਣ ਅਤੇ ਓਵੈਸੀ ਦੀਆਂ ਟਿੱਪਣੀਆਂ ਤੋਂ ਦੁਖੀ ਹੋ ਕੇ ਇਸ ਘਟਨਾ ਨੂੰ ਅੰਜਾਮ ਦਿੱਤਾ।