ਹਾਕੀ ਇੰਡੀਆ ਨੇ FIH ਮਹਿਲਾ ਹਾਕੀ ਪ੍ਰੋ ਲੀਗ ਲਈ ਭਾਰਤੀ ਟੀਮ ਦਾ ਐਲਾਨ ਕਰ ਦਿੱਤਾ ਹੈ ਗੋਲਕੀਪਰ ਸਵਿਤਾ ਨੂੰ 22 ਮੈਂਬਰੀ ਭਾਰਤੀ ਟੀਮ ਦਾ ਕਪਤਾਨ ਬਣਾਇਆ ਗਿਆ ਹੈ, ਜਦਕਿ ਦੀਪ ਗ੍ਰੇਸ ਨੂੰ ਉਪ-ਕਪਤਾਨ ਬਣਾਇਆ ਗਿਆ ਹੈ। । ਇਹ ਟੀਮ 26 ਅਤੇ 27 ਫਰਵਰੀ ਨੂੰ ਸਪੇਨ ਦੇ ਖਿਲਾਫ ਦੋ ਮੈਚ ਖੇਡੇਗੀ। ਦੋਵੇਂ ਮੈਚ ਸ਼ਾਮ ਨੂੰ ਭੁਵਨੇਸ਼ਵਰ ਵਿੱਚ ਖੇਡੇ ਜਾਣਗੇ। ਦਸ ਦਈਏ ਕਿ ਟੀਮ ‘ਚ ਕੁਝ ਨਵੇਂ ਚਿਹਰਿਆਂ ਨੂੰ ਵੀ ਮੌਕਾ ਦਿੱਤਾ ਗਿਆ ਹੈ।
ਟੀਮ ਦੀ ਚੋਣ ਬਾਰੇ ਭਾਰਤੀ ਮਹਿਲਾ ਹਾਕੀ ਟੀਮ ਦੇ ਮੁੱਖ ਕੋਚ ਜੈਨੇਕ ਸਕੋਪਮੈਨ ਨੇ ਕਿਹਾ ਕਿ ਉਹ ਸਪੇਨ ਖ਼ਿਲਾਫ਼ ਹੋਣ ਵਾਲੇ ਮੈਚ ਨੂੰ ਲੈ ਕੇ ਉਤਸ਼ਾਹਿਤ ਹਨ। ਓਮਾਨ ਤੋਂ ਪਰਤਣ ਤੋਂ ਬਾਅਦ ਟੀਮ ਨੇ ਦੋ ਹਫ਼ਤਿਆਂ ਤੱਕ ਚੰਗਾ ਅਭਿਆਸ ਕੀਤਾ ਹੈ। ਟੀਮ ਵਿੱਚ ਚੁਣੇ ਗਏ 22 ਖਿਡਾਰੀ ਇਹ ਦਿਖਾਉਣ ਲਈ ਤਿਆਰ ਹੋਣਗੇ ਕਿ ਉਹ ਸਪੇਨ ਖ਼ਿਲਾਫ਼ ਕੀ ਕਰ ਸਕਦੇ ਹਨ।
ਇਨ੍ਹੀਂ ਦਿਨੀਂ ਭਾਰਤੀ ਮਹਿਲਾ ਟੀਮ ਭੁਵਨੇਸ਼ਵਰ 'ਚ ਅਭਿਆਸ ਕਰ ਰਹੀ ਹੈ। ਟੀਮ ਦਾ ਹਰ ਮੈਂਬਰ ਚੰਗੇ ਪ੍ਰਦਰਸ਼ਨ ਲਈ ਪਸੀਨਾ ਵਹਾ ਰਿਹਾ ਹੈ। ਇਸ ਮੈਚ ਦਾ ਇੰਤਜ਼ਾਰ ਕਰ ਰਹੇ ਸਿਰਸਾ ਦੇ ਲੋਕਾਂ ਲਈ ਸੋਮਵਾਰ ਨੂੰ ਖੁਸ਼ਖਬਰੀ ਆਈ ਕਿ ਉਨ੍ਹਾਂ ਦੀ ਪਿਆਰੀ ਸਵਿਤਾ ਪੂਨੀਆ ਨੂੰ ਭਾਰਤੀ ਮਹਿਲਾ ਟੀਮ ਦਾ ਕਪਤਾਨ ਬਣਾਇਆ ਗਿਆ ਹੈ।
ਕਪਤਾਨ ਸਵਿਤਾ ਦੇ ਪਿਤਾ ਮਹਿੰਦਰ ਪੂਨੀਆ ਨੇ ਆਪਣੀ ਧੀ ਨੂੰ ਮਿਲੀ ਜਿੰਮੇਵਾਰੀ ਲਈ ਅਸ਼ੀਰਵਾਦ ਦਿੱਤਾ ਹੈ ਅਤੇ ਉਸਦੇ ਉਜਵਲ ਭਵਿੱਖ ਦੀ ਕਾਮਨਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਭਾਵੇਂ ਟੀਮ ਇੰਡੀਆ ਨੇ ਓਲੰਪਿਕ 'ਚ ਕੋਈ ਤਮਗਾ ਨਹੀਂ ਜਿੱਤਿਆ ਹੈ ਪਰ ਟੀਮ ਇੰਡੀਆ ਨੇ ਦੇਸ਼ ਦੇ ਲੋਕਾਂ ਦਾ ਦਿਲ ਜ਼ਰੂਰ ਜਿੱਤ ਲਿਆ ਹੈ।
