ਮੁੰਬਈ : – IPL 2022 26 ਮਾਰਚ ਤੋਂ ਸ਼ੁਰੂ ਹੋਵੇਗਾ ਅਤੇ ਟੂਰਨਾਮੈਂਟ ਦਾ ਫਾਈਨਲ 29 ਮਈ ਨੂੰ ਖੇਡਿਆ ਜਾਵੇਗਾ। ਸ਼ੁੱਕਰਵਾਰ ਨੂੰ ਹੋਈ ਆਈਪੀਐਲ ਗਵਰਨਿੰਗ ਕੌਂਸਲ ਵਿੱਚ ਇਸ ਦਾ ਫੈਸਲਾ ਲਿਆ ਗਿਆ ਹੈ। ਲੀਗ ਪੜਾਅ ਦੇ ਸਾਰੇ 70 ਮੈਚ ਮਹਾਰਾਸ਼ਟਰ ਵਿੱਚ ਖੇਡੇ ਜਾਣਗੇ। 55 ਮੈਚ ਮੁੰਬਈ ਅਤੇ 15 ਪੁਣੇ ‘ਚ ਹੋਣਗੇ।
20 ਮੈਚ ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ ਅਤੇ ਡਾਕਟਰ ਡੀਵਾਈ ਪਾਟਿਲ ਸਟੇਡੀਅਮ ਵਿੱਚ ਖੇਡੇ ਜਾਣਗੇ, ਜਦੋਂ ਕਿ 15 ਮੈਚ ਬ੍ਰੇਬੋਰਨ ਸਟੇਡੀਅਮ ਵਿੱਚ ਖੇਡੇ ਜਾਣਗੇ। ਬਾਕੀ 15 ਮੈਚ ਪੁਣੇ ਦੇ ਐਮਸੀਏ ਇੰਟਰਨੈਸ਼ਨਲ ਸਟੇਡੀਅਮ ਵਿੱਚ ਹੋਣਗੇ। ਪਲੇਆਫ ਮੈਚ ਕਿੱਥੇ ਹੋਣਗੇ? ਇਸ ਬਾਰੇ ਕੋਈ ਅਧਿਕਾਰਤ ਬਿਆਨ ਸਾਹਮਣੇ ਨਹੀਂ ਆਇਆ ਹੈ। ਸਾਰੀਆਂ 10 ਟੀਮਾਂ ਵਾਨਖੇੜੇ ਅਤੇ ਡੀਵਾਈ ਪਾਟਿਲ ਵਿਖੇ 4-4 ਮੈਚ ਖੇਡਣਗੀਆਂ। ਇਸ ਤੋਂ ਇਲਾਵਾ ਟੀਮਾਂ ਨੂੰ ਪੁਣੇ ਅਤੇ ਬ੍ਰੇਬੋਰਨ ‘ਚ 3-3 ਮੈਚ ਖੇਡਣੇ ਹੋਣਗੇ।
2011 ਤੋਂ ਬਾਅਦ ਆਈਪੀਐਲ ਦੇ ਇਤਿਹਾਸ ਵਿੱਚ ਦੂਜੀ ਵਾਰ ਸਾਰੀਆਂ 10 ਟੀਮਾਂ ਨੂੰ ਦੋ ਵੱਖ-ਵੱਖ ਗਰੁੱਪਾਂ ਵਿੱਚ ਵੰਡਿਆ ਗਿਆ ਹੈ। ਗਰੁੱਪ ਏ ਵਿੱਚ ਮੁੰਬਈ ਇੰਡੀਅਨਜ਼, ਕੋਲਕਾਤਾ ਨਾਈਟ ਰਾਈਡਰਜ਼, ਰਾਜਸਥਾਨ ਰਾਇਲਜ਼, ਦਿੱਲੀ ਕੈਪੀਟਲਜ਼ ਅਤੇ ਲਖਨਊ ਸੁਪਰ ਜਾਇੰਟਸ ਨੂੰ ਰੱਖਿਆ ਗਿਆ ਹੈ। ਇਸ ਦੇ ਨਾਲ ਹੀ ਚੇਨਈ ਸੁਪਰ ਕਿੰਗਜ਼, ਸਨਰਾਈਜ਼ਰਸ ਹੈਦਰਾਬਾਦ, ਰਾਇਲ ਚੈਲੇਂਜਰਜ਼ ਬੈਂਗਲੁਰੂ, ਪੰਜਾਬ ਕਿੰਗਜ਼ ਅਤੇ ਗੁਜਰਾਤ ਟਾਈਟਨਸ ਨੂੰ ਗਰੁੱਪ ਬੀ ‘ਚ ਜਗ੍ਹਾ ਮਿਲੀ ਹੈ।
ਹਰ ਟੀਮ ਨੂੰ ਆਪਣੇ ਗਰੁੱਪ ਵਿੱਚ ਇੱਕ ਦੂਜੇ ਦੇ ਖਿਲਾਫ ਦੋ ਵਾਰ ਖੇਡਣ ਦਾ ਮੌਕਾ ਮਿਲੇਗਾ। ਦੂਜੇ ਗਰੁੱਪ ਦੀ ਕਿਸੇ ਇੱਕ ਟੀਮ ਵਿਰੁੱਧ ਦੋ ਮੈਚ ਖੇਡੇ ਜਾਣਗੇ। ਇਸ ਤੋਂ ਬਾਅਦ ਦੂਜੇ ਗਰੁੱਪ ਦੀਆਂ ਬਾਕੀ 4 ਟੀਮਾਂ ਨਾਲ 1-1 ਮੈਚ ਖੇਡਿਆ ਜਾਵੇਗਾ।
