ਨਵੀਂ ਦਿੱਲੀ : – ਦਿੱਲੀ ਸਰਕਾਰ ਨੇ ਕੋਰੋਨਾ ਦੇ ਮਾਮਲਿਆਂ ਵਿੱਚ ਗਿਰਾਵਟ ਅਤੇ ਇਨਫੈਕਸ਼ਨ ਦਰ ਦੇ ਮੱਦੇਨਜ਼ਰ ਦਿੱਲੀ ਦੇ ਲੋਕਾਂ ਨੂੰ ਰਾਹਤ ਨੂੰ ਰਾਹਤ ਦਿੰਦਿਆਂ ਹੁਣ ਨਿੱਜੀ ਵਾਹਨਾਂ ਵਿੱਚ ਸਫਰ ਕਰਨ ਵਾਲਿਆਂ ਲਈ ਮਾਸਕ ਦੀ ਸ਼ਰਤ ਹਟਾ ਦਿੱਤੀ ਹੈ।
ਪਰ ਟੈਕਸੀ ਅਤੇ ਕੈਬ ਸਮੇਤ ਸਾਰੇ ਜਨਤਕ ਵਾਹਨਾਂ ਵਿੱਚ ਮਾਸਕ ਤੋਂ ਛੋਟ ਨਹੀਂ ਹੋਵੇਗੀ ਅਤੇ ਮਾਸਕ ਲਗਾਉਣੀ ਲਾਜ਼ਮੀ ਹੋਵੇਗਾ। ਫੇਸ ਮਾਸਕ ਨਾ ਪਾਉਣ ‘ਤੇ ਜੁਰਮਾਨੇ ਦੀ ਰਕਮ ਵੀ 2,000 ਰੁਪਏ ਤੋਂ ਘਟਾ ਕੇ 500 ਰੁਪਏ ਕਰ ਦਿੱਤੀ ਗਈ ਹੈ। ਇਸ ਦੇ ਨਾਲ ਹੀ ਰਾਤ ਦੇ ਕਰਫਿਊ ਸਮੇਤ ਸਾਰੀਆਂ ਪਾਬੰਦੀਆਂ ਵੀ ਹਟਾ ਲਈਆਂ ਗਈਆਂ ਹਨ। ਇਹ ਸਾਰੇ ਪ੍ਰਬੰਧ ਸੋਮਵਾਰ ਤੋਂ ਪ੍ਰਭਾਵੀ ਮੰਨੇ ਜਾਣਗੇ।
ਸ਼ੁੱਕਰਵਾਰ ਨੂੰ ਹੋਈ ਬੈਠਕ ਤੋਂ ਬਾਅਦ ਦਿੱਲੀ ਡਿਜ਼ਾਸਟਰ ਮੈਨੇਜਮੈਂਟ ਅਥਾਰਟੀ (ਡੀਡੀਐੱਮਏ) ਨੇ ਸ਼ਨੀਵਾਰ ਨੂੰ ਇਸ ਸਬੰਧ ‘ਚ ਹੁਕਮ ਜਾਰੀ ਕੀਤੇ। ਸਪੱਸ਼ਟ ਕੀਤਾ ਗਿਆ ਹੈ ਕਿ ਜੇਕਰ ਕੋਰੋਨਾ ਸੰਕ੍ਰਮਣ ਫਿਰ ਵਧਦਾ ਹੈ ਤਾਂ ਲੋੜ ਅਨੁਸਾਰ ਪਾਬੰਦੀਆਂ ਨੂੰ ਵਾਪਸ ਲਿਆਂਦਾ ਜਾਵੇਗਾ।
ਹੁਕਮਾਂ ਦੇ ਅਨੁਸਾਰ, ਸਕੂਲੀ ਸਿੱਖਿਆ 31 ਮਾਰਚ ਤੱਕ ਹਾਈਬ੍ਰਿਡ ਮੋਡ ਵਿੱਚ ਰਹੇਗੀ, ਯਾਨੀ ਕਿ ਕਲਾਸਾਂ ਆਨਲਾਈਨ ਅਤੇ ਆਫਲਾਈਨ ਦੋਵੇਂ ਤਰ੍ਹਾਂ ਨਾਲ ਚੱਲਦੀਆਂ ਰਹਿਣਗੀਆਂ। ਹਾਈਬ੍ਰਿਡ ਮੋਡ ਨੂੰ ਖਤਮ ਕਰਨ ਅਤੇ 1 ਅਪ੍ਰੈਲ ਤੋਂ ਸ਼ੁਰੂ ਹੋਣ ਵਾਲੇ ਨਵੇਂ ਅਕਾਦਮਿਕ ਸੈਸ਼ਨ ਤੋਂ ਆਮ ਕਲਾਸਾਂ ਸ਼ੁਰੂ ਕਰਨ ਦੀ ਇਜਾਜ਼ਤ ਵੀ ਦਿੱਤੀ ਗਈ ਹੈ। ਹਾਲਾਂਕਿ, ਕੋਵਿਡ ਨਾਲ ਸਬੰਧਤ ਚੌਕਸੀ ਵਰਤਣੀ ਜ਼ਰੂਰੀ ਹੋਵੇਗੀ।