ਭਾਰਤ ‘ਚ ਚੱਲ ਰਹੇ ਕ੍ਰਿਕਟ ਵਿਸ਼ਵ ਕੱਪ ਦੌਰਾਨ ਟੀਮ ਇੰਡੀਆ ਨੂੰ ਵੱਡਾ ਝਟਕਾ ਲੱਗਾ ਹੈ। ਹਾਰਦਿਕ ਪੰਡਯਾ ਟੂਰਨਾਮੈਂਟ ਤੋਂ ਬਾਹਰ ਹੋ ਗਏ ਹਨ। ਹਾਰਦਿਕ ਪੰਡਯਾ ਦੀ ਥਾਂ ‘ਤੇ ਪ੍ਰਸਿਧ ਕ੍ਰਿਸ਼ਨਾ ਨੂੰ ਹੁਣ ਟੀਮ ‘ਚ ਸ਼ਾਮਲ ਕੀਤਾ ਗਿਆ। ਦੱਸ ਦੇਈਏ ਕਿ ਹਾਰਦਿਕ ਪੰਡਯਾ ਬੰਗਲਾਦੇਸ਼ ਦੇ ਖਿਲਾਫ ਮੈਚ ‘ਚ ਜ਼ਖਮੀ ਹੋ ਗਏ ਸਨ। ਪੰਡਯਾ ਅਜੇ ਵੀ ਉਸ ਸੱਟ ਤੋਂ ਉਭਰ ਨਹੀਂ ਸਕੇ ਹਨ। ਅਤੇ ਆਖਿਰਕਾਰ ਪੰਡਯਾ ਨੂੰ ਹੁਣ ਵਿਸ਼ਵ ਕੱਪ ਤੋਂ ਬਾਹਰ ਹੋਣਾ ਪਿਆ।
ਜ਼ਿਕਰਯੋਗ ਹੈ ਕਿ ਟੀਮ ਇੰਡੀਆ ਇਸ ਸਮੇਂ ਵਿਸ਼ਵ ਕੱਪ ‘ਚ ਸਭ ਤੋਂ ਮਜ਼ਬੂਤ ​​ਨਜ਼ਰ ਆ ਰਹੀ ਹੈ। ਟੀਮ ਇੰਡੀਆ ਨੇ ਆਪਣੇ ਸਾਰੇ 7 ਮੈਚ ਜਿੱਤੇ ਹਨ। ਭਾਰਤ ਦੇ ਸਾਹਮਣੇ ਕੋਈ ਵੀ ਟੀਮ ਟਿਕ ਨਹੀਂ ਸਕੀ। ਪੰਡਯਾ ਵੀ ਟੀਮ ਇੰਡੀਆ ਦੇ ਮਜ਼ਬੂਤ ​​ਹੋਣ ਦਾ ਕਾਰਨ ਸਨ। ਪੰਡਯਾ ਗੇਂਦਬਾਜ਼ੀ ਅਤੇ ਬੱਲੇਬਾਜ਼ੀ ਦੋਵਾਂ ‘ਚ ਸ਼ਾਨਦਾਰ ਹਨ। ਪਰ ਹੁਣ ਉਹ ਵਿਸ਼ਵ ਕੱਪ ਤੋਂ ਬਾਹਰ ਹੋ ਗਏ ਹਨ।
ਹਾਰਦਿਕ ਬੰਗਲਾਦੇਸ਼ ਖਿਲਾਫ ਖੇਡੇ ਗਏ ਮੈਚ ‘ਚ 9ਵੇਂ ਅਤੇ ਆਪਣੇ ਪਹਿਲੇ ਓਵਰ ‘ਚ ਜ਼ਖਮੀ ਹੋ ਗਏ ਸਨ। ਤੀਜੀ ਗੇਂਦ ‘ਤੇ ਹਾਰਦਿਕ ਦਾ ਗਿੱਟਾ ਮੁੜ ਗਿਆ ਅਤੇ ਉਹ ਕ੍ਰੀਜ਼ ‘ਤੇ ਬੈਠ ਗਏ। ਮੈਡੀਕਲ ਟੀਮ ਨੇ ਸੱਟ ਨੂੰ ਦੇਖਿਆ ਅਤੇ ਉਨ੍ਹਾਂ ਨੂੰ ਮੈਦਾਨ ਤੋਂ ਬਾਹਰ ਲੈ ਗਏ। ਹਾਰਦਿਕ ਦੀ ਜਗ੍ਹਾ ਵਿਰਾਟ ਕੋਹਲੀ ਗੇਂਦਬਾਜ਼ੀ ਕਰਨ ਆਏ। ਬੰਗਲਾਦੇਸ਼ ਦੇ ਖਿਲਾਫ ਸੱਟ ਲੱਗਣ ਤੋਂ ਬਾਅਦ ਪੰਡਯਾ 22 ਅਕਤੂਬਰ ਨੂੰ ਧਰਮਸ਼ਾਲਾ ‘ਚ ਨਿਊਜ਼ੀਲੈਂਡ ਖਿਲਾਫ ਖੇਡੇ ਗਏ ਮੈਚ ਲਈ ਪੁਣੇ ਤੋਂ ਟੀਮ ਨਾਲ ਨਹੀਂ ਗਏ ਸਨ। ਉਹ ਪੁਣੇ ਤੋਂ ਬੈਂਗਲੁਰੂ ਵਿੱਚ ਨੈਸ਼ਨਲ ਕ੍ਰਿਕਟ ਅਕੈਡਮੀ (NCA) ਵਿੱਚ ਚਲੇ ਗਏ। ਵਰਤਮਾਨ ਵਿੱਚ ਉਹ ਐਨਸੀਏ ਵਿੱਚ ਹੀ ਡਾਕਟਰਾਂ ਦੀ ਨਿਗਰਾਨੀ ਹੇਠ ਹਨ।