ਪੌਲੀਵੁੱਡ ਦੇ ਮਸ਼ਹੂਰ ਗਾਇਕ ਤੇ ਅਦਾਕਾਰ ਪਰਮੀਸ਼ ਵਰਮਾ ਆਏ ਦਿਨ ਆਪਣੇ ਨਵੇਂ ਲੁੱਕਸ ਨਵੇਂ ਗੀਤਾਂ ਤੇ ਪ੍ਰੋਜੈਕਟਾਂ ਨੂੰ ਲੈ ਕੇ ਸੁਰਖਿਆਂ ਵਿੱਚ ਰਹਿੰਦੇ ਹਨ। ਪਰੀਸ਼ਮ ਵਰਮਾ ਮੁੜ ਇੱਕ ਵਾਰ ਫੇਰ ਆਪਣੀ ਅਗਲੀ ਫ਼ਿਲਮ ਮੈਂ ਤੇ ਬਾਪੂ ਨੂੰ ਲੈ ਸੁਰਖਿਆਂ ਵਿੱਚ ਹਨ। ਹੁਣ ਪਰਮੀਸ਼ ਨੇ ਆਪਣੀ ਇਸ ਫ਼ਿਲਮ ਦਾ ਪੋਸਟਰ ਫੈਨਜ਼ ਨਾਲ ਸ਼ੇਅਰ ਕੀਤਾ ਹੈ। ਪਰਮੀਸ਼ ਵਰਮਾ ਨੇ ਵੀ ਆਪਣੇ ਦਰਸ਼ਕਾਂ ਨੂੰ ਤੋਹਫਾ ਦੇ ਦਿੱਤਾ ਹੈ। ਜੀ ਹਾਂ ਉਨ੍ਹਾਂ ਦੀ ਮੋਸਟ ਅਵੇਟਡ ਫ਼ਿਲਮ ‘ਮੈਂ ਤੇ ਬਾਪੂ’ ਦੀ ਝਲਕ ਦੇਖਣ ਲਈ ਦਰਸ਼ਕ ਬਹੁਤ ਹੀ ਬੇਸਬਰੀ ਦੇ ਨਾਲ ਉਡੀਕ ਕਰ ਰਹੇ ਸਨ। ਇੰਤਜ਼ਾਰ ਦੀਆਂ ਘੜੀਆਂ ਹੋਈਆਂ ਖਤਮ ਤੇ ਫ਼ਿਲਮ ਦਾ ਟ੍ਰੇਲਰ ਦਰਸ਼ਕਾਂ ਦੀ ਕਚਹਿਰੀ ‘ਚ ਹਾਜ਼ਿਰ ਹੈ। ‘ਮੈਂ ਤੇ ਬਾਪੂ’ ਫ਼ਿਲਮ ਦਾ ਕਮਾਲ ਦਾ ਟ੍ਰੇਲਰ ਸੋਸ਼ਲ ਮੀਡੀਆ ਉੱਤੇ ਖੂਬ ਧੱਕ ਪਾ ਰਿਹਾ ਹੈ। ਟ੍ਰੇਲਰ ‘ਚ ਨਜ਼ਰ ਆ ਰਿਹਾ ਹੈ ਕਿ ਪਰਮੀਸ਼ ਵਰਮਾ ਆਪਣਾ ਵਿਆਹ ਕਰਵਾਉਣ ਚਾਹੁੰਦੇ ਨੇ।
ਪਰ ਪਰਮੀਸ਼ ਵਰਮਾ ਦੇ ਹੋਣ ਵਾਲੇ ਸਹੁਰੇ ਵਿਆਹ ਤੋਂ ਬਾਅਦ ਉਸ ਨੂੰ ਕੈਨੇਡਾ ਵੱਸਣ ਦੀ ਗੱਲ ਕਹਿੰਦੇ ਹਨ। ਪਰ ਪਰਮੀਸ਼ ਵਰਮਾ ਨੂੰ ਪਤਾ ਹੈ ਕਿ ਉਸਦਾ ਬਾਪੂ ਨਹੀਂ ਮੰਨੇਗਾ, ਇਸ ਲਈ ਉਹ ਆਪਣੇ ਪਿਤਾ ਦਾ ਇੱਕਲਾਪਣ ਦੂਰ ਕਰਨ ਲਈ ਆਪਣੇ ਲਈ ਮਾਂ ਤੇ ਪਿਤਾ ਲਈ ਪਤਨੀ ਲੱਭਣ ਲੱਗ ਜਾਂਦਾ ਹੈ। ਆਪਣੇ ਪਿਤਾ ਨੂੰ ਦੂਜੇ ਵਿਆਹ ਦੇ ਲਈ ਪਰਮੀਸ਼ ਵਰਮਾ ਰਾਜੀ ਕਰ ਲੈਂਦਾ ਹੈ। ਪਰ ਕਹਾਣੀ ‘ਚ ਦਿਲਚਸਪ ਮੋੜ ਆ ਜਾਂਦਾ ਹੈ ਜਦੋਂ ਪਰਮੀਸ਼ ਵਰਮਾ ਦੇ ਹੋਣ ਵਾਲੇ ਸਹੁਰੇ ਪਰਿਵਾਰ ਪਰਮੀਸ਼ ਦੇ ਪਿਤਾ ਦੇ ਵਿਆਹ ਉੱਤੇ ਇਤਰਾਜ ਚੁੱਕਦੇ ਹਨ। ਫਿਰ ਪਰਮੀਸ਼ ਵਰਮਾ ਵੀ ਆਪਣੇ ਪਿਤਾ ਨੂੰ ਵਿਆਹ ਕਰਨ ਤੋਂ ਮਨਾ ਕਰਦਾ ਹੈ, ਪਰ ਉਸ ਵੇਲੇ ਬਾਪੂ ਅੱੜ ਜਾਂਦਾ ਹੈ। ਜਿਸ ਕਰਕੇ ਦੋਵੇਂ ਜਣੇ ਘਰ ‘ਚ ਵੰਡ ਕਰ ਲੈਂਦੇ ਹਨ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਪਰਮੀਸ਼ ਘੋੜੀ ਚੜ੍ਹਦੇ ਨੇ ਜਾਂ ਫਿਰ ਬਾਪੂ, ਇਸ ਗੱਲ ਦਾ ਖੁਲਾਸਾ ਤਾਂ ਸਿਨੇਮਾ ਘਰ ਜਾ ਕੇ ਹੀ ਹੋਵੇਗਾ। ਦਰਸ਼ਕਾਂ ਵੱਲੋਂ ਟ੍ਰੇਲਰ ਨੂੰ ਰੱਜ ਕੇ ਪਿਆਰ ਮਿਲ ਰਿਹਾ ਹੈ ਤੇ ਹਰ ਇੱਕ ਨੂੰ ਪਿਓ-ਪੁੱਤ ਦੀ ਕਮਿਸਟਰੀ ਖੂਬ ਪਸੰਦ ਆ ਰਹੀ ਹੈ।
