ਜੇਕਰ ਦੱਖਣ ਸਿਨੇਮਾ ਦੇ ਦਮਦਾਰ ਅਭਿਨੇਤਾ ਦੀ ਗੱਲ ਕਰੀਏ ਤਾਂ ਇਸ ਵਿਚ ਰਾਣਾ ਡੱਗੂਬਾਤੀ ਦਾ ਨਾਂ ਵੀ ਆਉਂਦਾ ਹੈ। ਆਪਣੀ ਦਮਦਾਰ ਅਦਾਕਾਰੀ ਦੇ ਦਮ ‘ਤੇ ਰਾਣਾ ਡੱਗੂਬਾਤੀ ਨੇ ਸਿਨੇਮਾ ਜਗਤ ‘ਚ ਖਾਸ ਪਛਾਣ ਬਣਾਈ ਹੈ। ਸਾਊਥ ਦੀ ਬਲਾਕਬਸਟਰ ਫਿਲਮ ‘ਬਾਹੂਬਲੀ’ ‘ਚ ਭੱਲਾਲ ਦੇਵ ਦੇ ਕਿਰਦਾਰ ਨਾਲ ਪ੍ਰਸ਼ੰਸਕਾਂ ਦੇ ਦਿਲਾਂ ‘ਚ ਖਾਸ ਜਗ੍ਹਾ ਬਣਾਉਣ ਵਾਲੇ ਰਾਣਾ ਡੱਗੂਬਾਤੀ ਨੂੰ ਲੈ ਕੇ ਵੱਡੀ ਖਬਰ ਸਾਹਮਣੇ ਆ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਜਾਇਦਾਦ ਵਿਵਾਦ ਨੂੰ ਲੈ ਕੇ ਕਥਿਤ ਤੌਰ ‘ਤੇ ਰਾਣਾ ਡੱਗੂਬਾਤੀ ਅਤੇ ਉਸ ਦੇ ਪਿਤਾ ਸੁਰੇਸ਼ ਬਾਬੂ ਖਿਲਾਫ ਪੁਲਸ ਕੇਸ ਦਰਜ ਕੀਤਾ ਗਿਆ ਹੈ। ਨਿਊਜ਼ 18 ਦੀ ਖ਼ਬਰ ਮੁਤਾਬਕ ਸਾਲ 2014 ‘ਚ ਰਾਣਾ ਡੱਗੂਬਾਤੀ ਅਤੇ ਸੁਰੇਸ਼ ਬਾਬੂ ਨੇ ਹੈਦਰਾਬਾਦ ਦੀ ਫਿਲਮ ਸਿਟੀ ਨੇੜੇ ਆਪਣੀ ਜ਼ਮੀਨ ਪ੍ਰਮੋਦ ਕੁਮਾਰ ਨਾਂ ਦੇ ਕਾਰੋਬਾਰੀ ਨੂੰ ਹੋਟਲ ਲਈ ਲੀਜ਼ ‘ਤੇ ਦਿੱਤੀ ਸੀ।
ਦੱਸਿਆ ਜਾਂਦਾ ਹੈ ਕਿ ਰਾਣਾ ਡੱਗੂਬਾਤੀ ਦੇ ਪਿਤਾ ਸੁਰੇਸ਼ ਬਾਬੂ ਨੇ ਆਪਣੀ ਜ਼ਮੀਨ 18 ਕਰੋੜ ਰੁਪਏ ਵਿੱਚ ਵੇਚਣ ਦਾ ਫੈਸਲਾ ਕੀਤਾ ਸੀ, ਜਿਸ ਕਾਰਨ ਸੁਰੇਸ਼ ਬਾਬੂ ਨੇ ਜ਼ਮੀਨ ਖਾਲੀ ਕਰਨ ਲਈ ਪ੍ਰਮੋਦ ਕੁਮਾਰ ਨੂੰ 5 ਕਰੋੜ ਰੁਪਏ ਵੀ ਦਿੱਤੇ ਸਨ। ਜਿਸ ਤੋਂ ਬਾਅਦ ਪ੍ਰਮੋਦ ਦੇ ਇਸ਼ਾਰੇ ‘ਤੇ ਜ਼ਮੀਨ ਖਾਲੀ ਨਾ ਕਰਨ ਦਾ ਮਾਮਲਾ ਵੀ ਦਰਜ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਪ੍ਰਮੋਦ ਕੁਮਾਰ ਨੇ ਵੀ ਅਦਾਲਤ ਵਿੱਚ ਪਹੁੰਚ ਕੀਤੀ ਅਤੇ ਆਪਣੀ ਪੁਲਿਸ ਸ਼ਿਕਾਇਤ ਵਿੱਚ ਦੱਸਿਆ ਕਿ ਉਸ ਨੂੰ 5 ਕਰੋੜ ਰੁਪਏ ਦਾ ਕੋਈ ਭੁਗਤਾਨ ਨਹੀਂ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਵਿਅਕਤੀ ਨੇ ਇਹ ਵੀ ਦੋਸ਼ ਲਾਇਆ ਹੈ ਕਿ ਰਾਣਾ ਡੱਗੂਬਾਤੀ ਅਤੇ ਸੁਰੇਸ਼ ਬਾਬੂ ਨੇ ਉਸ ਨੂੰ ਜ਼ਮੀਨ ਖਾਲੀ ਕਰਨ ਦੀ ਧਮਕੀ ਦਿੱਤੀ ਹੈ। ਅਜਿਹੇ ‘ਚ ਪ੍ਰਮੋਦ ਨੇ ਰਾਣਾ ਡੱਗੂਬਾਤੀ ਅਤੇ ਸੁਰੇਸ਼ ਬਾਬੂ ‘ਤੇ ਜ਼ਮੀਨ ਹੜੱਪਣ ਦਾ ਪੁਲਸ ਕੇਸ ਦਰਜ ਕਰਵਾਇਆ ਹੈ।
