ਭਾਰਤ ਵਿੱਚ ਕ੍ਰਿਕਟ ਪ੍ਰਤੀ ਲੋਕਾਂ ਦਾ ਪਿਆਰ ਅਤੇ ਸ਼ੌਕ ਲਗਭਗ ਹਰ ਦੂਜੇ ਵਿਅਕਤੀ ਵਿੱਚ ਦੇਖਿਆ ਜਾਂਦਾ ਹੈ। ਕ੍ਰਿਕਟ ਨੂੰ ਪਿਆਰ ਕਰਨ ਵਾਲੇ ਭਾਰਤੀ ਕ੍ਰਿਕਟ ਟੀਮ ਦੇ ਸਾਬਕਾ ਕਪਤਾਨ ਕਪਿਲ ਦੇਵ ਬਾਰੇ ਜ਼ਰੂਰ ਜਾਣਦੇ ਹੋਣਗੇ। ਕਪਿਲ ਦੇਵ ਨੇ ਭਾਰਤ ਲਈ ਪਹਿਲੀ ਵਾਰ ਵਿਸ਼ਵ ਕੱਪ ਜਿੱਤਿਆ ਸੀ। ਉਹ ਆਪਣੇ ਯੁੱਗ ਦੇ ਮਸ਼ਹੂਰ ਆਲਰਾਊਂਡਰ ਰਹੇ ਹਨ। ਕਪਿਲ ਦੇਵ ਨੇ 6 ਜਨਵਰੀ ਨੂੰ ਆਪਣਾ 63ਵਾਂ ਜਨਮਦਿਨ ਮਨਾਇਆ।
ਇਸ ਮੌਕੇ ਮਸ਼ਹੂਰ ਬਾਲੀਵੁੱਡ ਅਦਾਕਾਰ ਰਣਵੀਰ ਸਿੰਘ ਨੇ ਉਨ੍ਹਾਂ ਦੇ ਇਸ ਖ਼ਾਸ ਦਿਨ ‘ਤੇ ਉਨ੍ਹਾਂ ਨੂੰ ਖ਼ਾਸ ਅੰਦਾਜ਼ ਵਿੱਚ ਵਧਾਈ ਦਿੱਤੀ।ਰਣਵੀਰ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਕਪਿਲ ਦੇਵ ਨਾਲ ਆਪਣੀ ਇੱਕ ਤਸਵੀਰ ਪੋਸਟ ਕੀਤੀ ਅਤੇ ਮਹਾਨ ਕ੍ਰਿਕਟਰ ਕਪਿਲ ਦੇਵ ਲਈ ਇੱਕ ਖ਼ਾਸ ਨੋਟ ਲਿਖਿਆ। ਰਣਵੀਰ ਨੇ ਲਿਖਿਆ, “ਅਸਲੀ ਸਖ਼ਤ ਜਾਨ @therealkapildev ਨੂੰ ਜਨਮਦਿਨ ਮੁਬਾਰਕ।
ਇਹ ਮੇਰੇ ਲਈ ਸਨਮਾਨ ਦੀ ਗੱਲ ਹੈ ਕਿ ਸਕ੍ਰੀਨ ‘ਤੇ ਤੁਹਾਡੀ ਚੈਂਪੀਅਨ ਬਣਨ ਦੀ ਭਾਵਨਾ ਨੂੰ ਮੁੜ ਸੁਰਜੀਤ ਕਰ ਸਕਿਆ!” ਰਣਵੀਰ ਦੀ ਇਸ ਪੋਸਟ ਨੂੰ ਉਨ੍ਹਾਂ ਦੇ ਸਹਿ ਕਲਾਕਾਰਾਂ ਨੇ ਵੀ ਬਹੁਤ ਪਸੰਦ ਕੀਤਾ ਹੈ । ਯਸ਼ਪਾਲ ਸ਼ਰਮਾ ਦਾ ਕਿਰਦਾਰ ਨਿਭਾਉਣ ਵਾਲੇ ਜਤਿਨ ਸਰਨਾ ਨੇ ਦਿਲ ਵਾਲੇ ਈਮੋਜ਼ੀਸ ਦੇ ਨਾਲ ਦੋਹਾਂ ਦੀ ਤਾਰੀਫ਼ ਕੀਤੀ ‘ਤੇ ਲਿਖਿਆ ਦੋਨੋਂ ਕਾ ਜਵਾਬ ਨਹੀਂ। ਇਸ ਤੋਂ ਇਲਾਵਾ ਤੁਹਾਨੂੰ ਦੱਸ ਦਈਏ ਕਿ ਕਪਿਲ ਦੇਵ ਦਾ ਪੂਰਾ ਨਾਂ ਕਪਿਲ ਰਾਮ ਲਾਲ ਨਿਖੰਜ ਹੈ। ਉਨ੍ਹਾਂ ਦਾ ਜਨਮ 6 ਜਨਵਰੀ 1959 ਨੂੰ ਚੰਡੀਗੜ੍ਹ ‘ਚ ਹੋਇਆ ਸੀ। ਉਸਦੇ ਪਿਤਾ ਦਾ ਨਾਮ ਰਾਮ ਲਾਲ ਨਿਖੰਜ ਹੈ, ਜੋ ਇੱਕ ਠੇਕੇਦਾਰ ਕਮ ਬਿਲਡਰ ਸੀ। ਉਹਨਾਂ ਦਾ ਚੰਡੀਗੜ੍ਹ ਵਿੱਚ ਆਲੀਸ਼ਾਨ ਘਰ ਹੈ।
