ਬਾਹੂਬਲੀ ਵਾਂਗ 1000 ਸਾਲ ਪੁਰਾਣੇ ਪੁਰਾਤਨ ਕਿਲ੍ਹੇ ਅਤੇ 2255 ਦਾ ਭਵਿੱਖ ਦਿਖੇਗਾ ਫਿਲਮ ’ਚ
ਰੇਡੂਆ ਦੀ ਸਫ਼ਲਤਾ ਤੋਂ ਬਾਅਦ ਹੁਣ ਇਸ ਦਾ ਪਾਰਟ-2 ਰੇਡੂਆ ਰਿਟਰਨ ਫਿਲਮ ਬਣਨ ਜਾ ਰਹੀ ਹੈ ਜਿਸ ਦੀ ਸ਼ੂਟਿੰਗ ਸਮਰਾਲਾ ਨੇਡ਼੍ਹੇ ਮਹਿਲ ਫਾਰਮ ਵਿਚ ਪਿਛਲੇ ਕਈ ਦਿਨਾਂ ਤੋਂ ਵੱਡੇ-ਵੱਡੇ ਸੈੱਟ ਲਗਾ ਕੇ ਕੀਤੀ ਜਾ ਰਹੀ ਹੈ। ਇਸ ਫਿਲਮ ਦੇ ਡਾਇਰੈਕਟਰ ਅਤੇ ਅਦਾਕਾਰ ਨਵ ਬਾਜਵਾ ਨਾਲ ਫਿਲਮ ਦੀ ਸ਼ੂਟਿੰਗ ਬਾਰੇ ਜਦੋਂ ਗੱਲਬਾਤ ਹੋਈ ਤਾਂ ਉਨ੍ਹਾਂ ਦੱਸਿਆ ਕਿ ਇਹ ਪਹਿਲੀ ਪੰਜਾਬੀ ਫਿਲਮ ਹੈ ਜਿਸ ਵਿਚ ਨਵੀਂ ਤਕਨੀਕ ਵੀ.ਐੱਫ.ਐਕਸ ਦਾ ਇਸਤੇਮਾਲ ਕੀਤਾ ਜਾ ਰਿਹਾ ਹੈ ਜੋ ਕਿ ਸੁਪਰਹਿੱਟ ਫਿਲਮ ਬਾਹੂਬਲੀ ਵੀ ਇਸ ਤਕਨੀਕ ਨਾਲ ਬਣਾਈ ਗਈ ਸੀ। ਉਨ੍ਹਾਂ ਦੱਸਿਆ ਕਿ ਰੇਡੂਆ ਰਿਟਰਨ ਵਿਚ ਅੱਜ ਤੋਂ 1000 ਸਾਲ ਪੁਰਾਣਾ ਪੁਰਾਤਨ ਕਿਲ੍ਹੇ, ਉਸ ਸਮੇਂ ਦਾ ਜਨ-ਜੀਵਨ ਦਿਖਾਇਆ ਜਾਵੇਗਾ ਅਤੇ ਨਾਲ ਹੀ ਸੰਨ 2255 ਦੇ ਭਵਿੱਖ ਵਿਚ ਦੁਨੀਆ ਕਿਸ ਤਰ੍ਹਾਂ ਦੀ ਹੋਵੇਗੀ ਉਸ ਨੂੰ ਵੀ ਦਿਖਾਇਆ ਜਾਵੇਗਾ ਜਿਸ ਵਿਚ ਪੂਰੀ ਟੀਮ ਬਡ਼ੀ ਤਨਦੇਹੀ ਨਾਲ ਕੰਮ ਕਰ ਰਹੀ ਹੈ। ਡਾਇਰੈਕਟਰ ਨਵ ਬਾਜਵਾ ਨੇ ਦੱਸਿਆ ਕਿ ਇਹ ਪੰਜਾਬੀ ਫਿਲਮ 10 ਕਰੋਡ਼ ਤੋਂ ਵੱਧ ਹੈ ਜਿਸਦੇ ਪ੍ਰੋਡਿਊਸਰ ਪ੍ਰਵਾਸੀ ਪੰਜਾਬੀ ਅਨਿਲ ਸ਼ਰਮਾ ਅਤੇ ਅਨੁਪਮਾ ਹਨ। ਉਨ੍ਹਾਂ ਦੱਸਿਆ ਕਿ ਸਮਰਾਲਾ ਨੇਡ਼੍ਹੇ ਗੁਰਪ੍ਰਤਾਪ ਭੁੱਲਰ ਵਲੋਂ ਬਡ਼ਾ ਹੀ ਖੂਬਸੂਰਤ ਮਹਿਲ ਫਾਰਮ ਬਣਾਇਆ ਗਿਆ ਜਿਸ ਵਿਚ ਪੁਰਾਤਨ ਵਿਰਸੇ ਨਾਲ ਸਬੰਧਿਤ ਵੱਡੇ-ਵੱਡੇ ਸੈੱਟ ਲਗਾਏ ਗਏ ਹਨ। ਉਨ੍ਹਾਂ ਕਿਹਾ ਕਿ ਫਾਰਮ ’ਚ ਫਿਲਮ ਦਾ ਕਾਫ਼ੀ ਹਿੱਸਾ ਫਿਲਮਾਇਆ ਜਾ ਰਿਹਾ ਹੈ ਜਿੱਥੇ ਕਿ ਰੇਗਿਸਤਾਨ, ਪੁਰਾਤਨ ਕਿਲ੍ਹੇ ਦਿਖਾਏ ਜਾ ਰਹੇ ਹਨ। ਨਵ ਬਾਜਵਾ ਨੇ ਦੱਸਿਆ ਕਿ ਇਹ ਪਹਿਲੀ ਪੰਜਾਬੀ ਫਿਲਮ ਹੈ ਜਿਸ ਵਿਚ ਗ੍ਰੇਟ ਖਲੀ ਵੀ ਭੂਮਿਕਾ ਨਿਭਾ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਇਸ ਫਿਲਮ ਵਿਚ ਜੋ ਉਨ੍ਹਾਂ ਦੀ ਜੋ ਪੁਸ਼ਾਕ ਤਿਆਰ ਹੋਈ ਹੈ ਉਹ ਸੁਪਰਮੈਨ ਦੀ ਤਰਜ਼ ’ਤੇ ਹੈ ਜੋ ਕਿ ਵਿਸ਼ੇਸ਼ ਤੌਰ ’ਤੇ ਅਮਰੀਕਾ ਤੋਂ ਤਿਆਰ ਕਰਵਾਈ ਗਈ। ਇਸ ਤੋਂ ਇਲਾਵਾ ਸਾਰੇ ਹੀ ਅਦਾਕਾਰਾਂ ਦੇ ਪੁਸ਼ਾਕਾਂ ਨੂੰ ਤਿਆਰ ਕਰਨ ਲਈ ਸਾਰੀ ਟੀਮ ਨੇ ਸਖ਼ਤ ਮਿਹਨਤ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਫਿਲਮ ਦੇ ਮੁੱਖ ਅਦਾਕਾਰਾਂ ਵਿਚ ਯੋਗਰਾਜ ਸਿੰਘ, ਗੁਰਪ੍ਰੀਤ ਸਿੰਘ ਘੁੱਗੀ, ਬੀ.ਐੱਨ ਸ਼ਰਮਾ, ਮਾਹਿਰਾ ਸ਼ਰਮਾ ਅਤੇ ਸਤਿੰਦਰ ਸੱਤੀ ਤੋਂ ਇਲਾਵਾ ਮੇਰੇ ਪਿਤਾ ਡਾ. ਗੁਰਜੀਤ ਬਾਜਵਾ ਵੀ ਨਜ਼ਰ ਆਉਣਗੇ। ਨਵ ਬਾਜਵਾ ਨੇ ਦੱਸਿਆ ਕਿ ਕੋਸ਼ਿਸ਼ ਹੈ ਕਿ ਇਹ ਫਿਲਮ ਨਵੰਬਰ-ਦਸੰਬਰ 2022 ਤੱਕ ਮੁਕੰਮਲ ਕਰ ਦਰਸ਼ਕਾਂ ਲਈ ਸਿਨੇਮਾ ਘਰਾਂ ਵਿਚ ਰਿਲੀਜ਼ ਕਰ ਦਿੱਤੀ ਜਾਵੇਗੀ ਅਤੇ ਜਿਸ ਤਰ੍ਹਾਂ ਰੇਡੂਆ ਨੂੰ ਲੋਕਾਂ ਨੇ ਅਥਾਹ ਪਿਆਰ ਦਿੱਤਾ ਉਸੇ ਤਰ੍ਹਾਂ ਰੇਡੂਆ ਰਿਟਰਨ ਨੂੰ ਵੀ ਸੁਪਰਹਿੱਟ ਬਣਾਉਣਗੇ। ਪ੍ਰਸਿੱਧ ਅਦਾਕਾਰ ਯੋਗਰਾਜ ਸਿੰਘ ਇਸ ਫਿਲਮ ਵਿਚ ਮਹਾਰਾਜਾ ਵੀਰ ਸਿੰਘ ਦੇ ਕਿਰਦਾਰ ਵਿਚ ਨਜ਼ਰ ਆਉਣਗੇ। ਉਨ੍ਹਾਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਉਹ ਪਹਿਲੀ ਵਾਰ ਕਿਸੇ ਫਿਲਮ ’ਚ ਰਾਜੇ ਦਾ ਕਿਰਦਾਰ ਨਿਭਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਅੱਜ ਉਨ੍ਹਾਂ ਨੂੰ ਮੁਗਲ-ਏ-ਆਜ਼ਮ ਵਿਚ ਜਿਸ ਤਰ੍ਹਾਂ ਪ੍ਰਿਥਵੀਰਾਜ ਕਪੂਰ ਨੇ ਕਿਰਦਾਰ ਨਿਭਾਇਆ ਸੀ ਉਹ ਵੀ ਇਸ ਕਿਰਦਾਰ ਨੂੰ ਨਿਭਾਉਣ ਲਈ ਸਖ਼ਤ ਮਿਹਨਤ ਕਰ ਰਹੇ ਹਨ ਅਤੇ ਪੁਰਾਤਨ ਮਹਾਰਾਜਿਆਂ ਦੀਆਂ ਕਿਤਾਬਾਂ ਪਡ਼੍ਹ ਉਨ੍ਹਾਂ ਦੇ ਸੁਭਾਅ ਤੇ ਸਟਾਇਲ ਨੂੰ ਸਮਝ ਇਹ ਕਿਰਦਾਰ ਨਿਭਾਉਣਗੇ। ਹਰੇਕ ਕਿਰਦਾਰ ਨੂੰ ਬਾਖੂਬੀ ਨਿਭਾਉਣ ਵਾਲੇ ਅਦਾਕਾਰ ਗੁਰਪ੍ਰੀਤ ਸਿੰਘ ਘੁੱਗੀ ਨੇ ਕਿਹਾ ਕਿ ਰੇਡੂਆ ਰਿਟਰਨ ਮਨੋਰੰਜਨ ਭਰਪੂਰ ਫਿਲਮ ਹੋਵੇਗੀ ਅਤੇ ਸਿਨੇਮਾਘਰਾਂ ਵਿਚ ਆ ਕੇ ਲੋਕ ਖੁਦ ਨੂੰ ਤਰੋਤਾਜ਼ਾ ਮਹਿਸੂਸ ਕਰਨਗੇ। ਉਨ੍ਹਾਂ ਕਿਹਾ ਕਿ ਫਿਲਮ ਵਿਚ ਕਾਮੇਡੀ ਦੇ ਨਾਲ-ਨਾਲ ਦਰਸ਼ਕਾਂ ਨੂੰ ਸਮਾਜ ਨੂੰ ਸੇਧ ਦੇਣ ਵਾਲੇ ਸੰਦੇਸ਼ ਵੀ ਦਿੱਤੇ ਗਏ ਹਨ ਇਸ ਲਈ ਰੇਡੂਆ ਤੋਂ ਬਾਅਦ ਰੇਡੂਆ ਰਿਟਰਨ ਵੀ ਦਰਸ਼ਕਾਂ ਦੀ ਪਹਿਲੀ ਪਸੰਦ ਬਣੇਗੀ। ਦਿਨ ਸਮੇਂ ਅੱਤ ਦੀ ਗਰਮੀ ਹੋਣ ਕਾਰਨ ਫਿਲਮ ਦੇ ਅਦਾਕਾਰਾਂ ਨੂੰ ਸ਼ੂਟਿੰਗ ਕਰਨ ਵਿਚ ਮੁਸ਼ਕਿਲ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਇਸ ਲਈ ਮਹਿਲ ਫਾਰਮ ਹਾਊਸ ਵਿਚ ਲਗਾਏ ਗਏ ਸੈੱਟਾਂ ਦੌਰਾਨ ਅਜਿਹੀਆਂ ਅਧੁਨਿਕ ਲਾਈਟਾਂ ਲਗਾਈਆਂ ਗਈਆਂ ਹਨ ਜੋ ਰਾਤ ਨੂੰ ਵੀ ਦਿਨ ਬਣਾ ਦਿੰਦੀਆਂ ਹਨ। ਨਵ ਬਾਜਵਾ ਨੇ ਦੱਸਿਆ ਕਿ ਅਧੁਨਿਕ ਲਾਈਟਾਂ ਵਿਸ਼ੇਸ਼ ਤੌਰ ’ਤੇ ਵੱਡੀਆਂ ਕ੍ਰੇਨਾਂ ਨਾਲ ਸੈੱਟ ’ਤੇ ਲਗਾਈਆਂ ਗਈਆਂ ਹਨ ਤਾਂ ਜੋ ਸ਼ੂਟਿੰਗ ਦੌਰਾਨ ਇਹ ਲੱਗੇ ਕਿ ਦਿਨ ਦਾ ਮਾਹੌਲ ਹੈ। ਉਨ੍ਹਾਂ ਕਿਹਾ ਕਿ ਸਾਰੇ ਹੀ ਅਦਾਕਾਰ ਰਾਤ 11 ਵਜੇ ਤੋਂ ਲੈ ਕੇ ਸਵੇਰ 7 ਵਜੇ ਸ਼ੂਟਿੰਗ ਕਰਦੇ ਹਨ ਅਤੇ ਸਾਰੀ ਟੀਮ ਦੀ ਸਖ਼ਤ ਮਿਹਨਤ ਵੱਡੇ ਪਰਦੇ ’ਤੇ ਦੇਖਣ ਨੂੰ ਮਿਲੇਗੀ।