ਬਿੱਗ ਬੌਸ 13 ਨਾਲ ਆਪਣੀ ਖਾਸ ਪਛਾਣ ਬਣਾਉਣ ਵਾਲੀ ਪੰਜਾਬ ਦੀ ਕੈਟਰੀਨਾ ਕੈਫ ਸ਼ਹਿਨਾਜ਼ ਕੌਰ ਗਿੱਲ ਦਾ ਜਨਮ ਅੱਜ ਦੇ ਹੀ ਦਿਨ 1993 ਵਿੱਚ ਇੱਕ ਸਿੱਖ ਪਰਿਵਾਰ ਵਿੱਚ ਹੋਇਆ ਸੀ। ਸ਼ਹਿਨਾਜ਼ ਦੀ ਮਾਂ ਪਰਮਿੰਦਰ ਕੌਰ ਗਿੱਲ ਨੇ ਇਕ ਇੰਟਰਵਿਊ ਦੌਰਾਨ ਖੁਲਾਸਾ ਕੀਤਾ ਸੀ ਕਿ ਜਦੋਂ ਸ਼ਹਿਨਾਜ਼ 16-17 ਸਾਲ ਦੀ ਸੀ ਤਾਂ ਹਰ ਕੋਈ ਉਸ ਨੂੰ ਕੈਟਰੀਨਾ ਕਹਿ ਕੇ ਬੁਲਾਉਂਦੇ ਸਨ। ਉਦੋਂ ਤੋਂ ਹੀ ਸ਼ਹਿਨਾਜ਼ ਨੇ ਆਪਣੇ ਆਪ ਨੂੰ ਪੰਜਾਬ ਦੀ ਕੈਟਰੀਨਾ ਕਹਿਣਾ ਸ਼ੁਰੂ ਕਰ ਦਿੱਤਾ ਸੀ।
ਤੁਹਾਨੂੰ ਦੱਸ ਦੇਈਏ ਕਿ ਬਿੱਗ ਬੌਸ ਵਿੱਚ ਵੀ ਅਦਾਕਾਰਾ ਨੇ ਕਈ ਵਾਰ ਖੁਦ ਨੂੰ ਪੰਜਾਬ ਦੀ ਕੈਟਰੀਨਾ ਕੈਫ ਦੱਸਿਆ ਸੀ। ਉਦੋਂ ਤੋਂ ਉਹ ਇਸੇ ਨਾਂ ਨਾਲ ਮਸ਼ਹੂਰ ਹੋ ਗਈ। ਕਿਹਾ ਜਾਂਦਾ ਹੈ ਕਿ ਸ਼ਹਿਨਾਜ਼ ਨੇ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ, ਪੰਜਾਬ ਤੋਂ ਗ੍ਰੈਜੂਏਟ ਹੋਣ ਤੋਂ ਬਾਅਦ ਆਪਣਾ ਅਦਾਕਾਰੀ ਕਰੀਅਰ ਸ਼ੁਰੂ ਕੀਤਾ ਸੀ। 2015 ਵਿੱਚ, ਉਸਨੇ ਗੁਰਵਿੰਦਰ ਬਰਾੜ ਦੀ ਪੰਜਾਬੀ ਐਲਬਮ ‘ਸ਼ਿਵ ਦੀ ਕਿਤਾਬ’ ਨਾਲ ਆਪਣੀ ਅਦਾਕਾਰੀ ਦੀ ਸ਼ੁਰੂਆਤ ਕੀਤੀ। ਇਸ ਤੋਂ ਬਾਅਦ ਅਦਾਕਾਰਾ ‘ਮਾਝੇ ਦੀ ਜੱਟੀ’, ‘ਪਿੰਡਾਂ ਦੀਆ ਕੁੜੀਆਂ’ ਅਤੇ ਪੰਜਾਬੀ ਗਾਇਕ ਗੈਰੀ ਸੰਧੂ ਦੇ ਟਾਈਟਲ ਗੀਤ ‘ਯੇ ਬੇਬੀ ਰੀਮਿਕਸ’ ਵਿੱਚ ਵੀ ਨਜ਼ਰ ਆਈ।
ਹੌਲੀ-ਹੌਲੀ ਉਹ ਪੂਰੇ ਪੰਜਾਬ ਦੀ ਕੈਟਰੀਨਾ ਕੈਫ ਬਣਨ ਲੱਗੀ। ਬਿੱਗ ਬੌਸ ਨੇ ਸ਼ਹਿਨਾਜ਼ ਨੂੰ ਨਾਂ ਮਹਿਜ਼ ਪ੍ਰਸਿੱਧੀ ਦਿੱਤੀ ਸਗੋਂ ਇੱਕ ਵਧੀਆ ਦੋਸਤ ਵੀ ਦਿੱਤਾ। ਜੀ ਹਾਂ, ਅਸੀਂ ਗੱਲ ਕਰ ਰਹੇ ਹਾਂ ਮਰਹੂਮ ਅਦਾਕਾਰ ਸਿਧਾਰਥ ਸ਼ੁਕਲਾ ਦੀ। ਸਿਡਨਾਜ਼ (ਸਿਧਾਰਥ ਅਤੇ ਸ਼ਹਿਨਾਜ਼) ਨੇ ਬਿੱਗ ਬੌਸ ਦੇ 13ਵੇਂ ਸੀਜ਼ਨ ਵਿੱਚ ਜਿੰਨੀ ਪ੍ਰਸਿੱਧੀ ਹਾਸਲ ਕੀਤੀ, ਉਹ ਬਿੱਗ ਬੌਸ ਦੇ ਇਤਿਹਾਸ ਵਿੱਚ ਸ਼ਾਇਦ ਹੀ ਕਿਸੇ ਜੋੜੇ ਨੇ ਹਾਸਲ ਕੀਤੀ ਹੋਵੇ।
ਅੱਜ ਸ਼ਹਿਨਾਜ਼ ਨੇ ਆਪਣੇ ਦਮ ‘ਤੇ ਆਪਣੀ ਵੱਖਰੀ ਪਛਾਣ ਬਣਾ ਲਈ ਹੈ। ਸ਼ਹਿਨਾਜ਼ ਨੇ ਮੋਸਟ ਡਿਜ਼ਾਇਰੇਬਲ ਵੂਮੈਨ 2019 ਅਤੇ 2020 ਵਿੱਚ ਟਾਪ 20 ਵਿੱਚ ਆਪਣੀ ਜਗ੍ਹਾ ਬਣਾਈ ਸੀ। ਉਹ ਫਿਲਮਫੇਅਰ ਦੇ ਡਿਜੀਟਲ ਕਵਰ ਪੇਜ ‘ਤੇ ਵੀ ਦਿਖਾਈ ਦਿੱਤੀ। ਇਸ ਤੋਂ ਇਲਾਵਾ ਉਸ ਨੂੰ ਪ੍ਰੋਮਿਸਿੰਗ ਫਰੈਸ਼ ਫੇਸ ਦਾ ਸਨਮਾਨ ਵੀ ਮਿਲਿਆ ਚੁੱਕਾ ਹੈ।
