ਕੇਂਦਰ ਸਰਕਾਰ ਨੇ ਸੋਨੇ ਅਤੇ ਇਸ ਦੇ ਗਹਿਣਿਆਂ ਦੀ ਵਿਕਰੀ ਅਤੇ ਖਰੀਦ ਨਾਲ ਸਬੰਧਤ ਨਿਯਮਾਂ ਵਿੱਚ ਵੱਡੇ ਬਦਲਾਅ ਕੀਤੇ ਹਨ। ਬਦਲਾਅ ਦੇ ਅਨੁਸਾਰ, 1 ਅਪ੍ਰੈਲ ਤੋਂ ਸੋਨੇ ਅਤੇ ਇਸ ਦੇ ਗਹਿਣਿਆਂ ‘ਤੇ ਲਾਜ਼ਮੀ ਤੌਰ ‘ਤੇ ਹਾਲਮਾਰਕਡ ਵਿਲੱਖਣ ਪਛਾਣ ਨੰਬਰ (HUID) ਹੋਣਾ ਚਾਹੀਦਾ ਹੈ। ਜੇਕਰ ਅਜਿਹਾ ਨਹੀਂ ਹੁੰਦਾ ਤਾਂ ਉਹ ਸੋਨਾ ਬਾਜ਼ਾਰ ਵਿੱਚ ਨਹੀਂ ਵਿਕ ਸਕਦਾ। ਖਪਤਕਾਰ ਮਾਮਲਿਆਂ ਦੇ ਵਿਭਾਗ ਦੇ ਵਧੀਕ ਸਕੱਤਰ ਨੇ ਦੱਸਿਆ ਕਿ ਵਰਤਮਾਨ ਵਿੱਚ 4 ਅਤੇ 6 ਅੰਕ ਵਾਲੇ ਹਾਲਮਾਰਕ ਵਰਤੇ ਜਾਂਦੇ ਹਨ।
ਮੰਤਰਾਲੇ ਦਾ ਕਹਿਣਾ ਹੈ ਕਿ ਹੁਣ ਸਿਰਫ਼ 6 ਅੰਕਾਂ ਵਾਲਾ ਹਾਲਮਾਰਕ ਹੀ ਵੈਧ ਹੋਵੇਗਾ। ਸਰਕਾਰ ਮੁਤਾਬਕ 4 ਅਤੇ 6 ਅੰਕਾਂ ਯਾਨੀ 2 ਵੱਖ-ਵੱਖ ਤਰ੍ਹਾਂ ਦੇ ਹਾਲਮਾਰਕ ਕਾਰਨ ਲੋਕ ਭੰਬਲਭੂਸੇ ਵਿਚ ਪੈ ਰਹੇ ਸਨ। ਇੱਕ ਹੋਰ ਬਦਲਾਅ ਹਾਲਮਾਰਕ ਦੇ ਲਿਖਣ ਦੇ ਤਰੀਕੇ ਵਿੱਚ ਕੀਤਾ ਗਿਆ. ਪਹਿਲਾਂ ਡਿਜਿਟ ਹਾਲਮਾਰਕਿੰਗ ਹੁੰਦੀ ਸੀ, ਜਿਸ ਨੂੰ ਅਲਫਾਨਿਊਮੇਰਿਕ (ਸੰਖਿਆਵਾਂ ਅਤੇ ਅੱਖਰਾਂ ਵਾਲੇ) ਵਿੱਚ ਬਦਲ ਦਿੱਤਾ ਗਿਆ ਹੈ। ਹੁਣ 4 ਅੰਕਾਂ ਦੀ ਹਾਲਮਾਰਕਿੰਗ ਪੂਰੀ ਤਰ੍ਹਾਂ ਬੰਦ ਹੋ ਜਾਵੇਗੀ।
ਦੱਸ ਦਈਏ ਕਿ ਜੋ ਸੋਨਾ ਤੁਸੀਂ ਸੁਨਿਆਰੇ ਤੋਂ ਖਰੀਦਦੇ ਹੋ, ਉਹ ਸ਼ੁੱਧ ਹੈ ਜਾਂ ਨਹੀਂ, ਇਸ ਦੀ ਜਾਂਚ ਬਿਊਰੋ ਆਫ਼ ਇੰਡੀਅਨ ਸਟੈਂਡਰਡਜ਼ ਭਾਵ ਬੀ.ਆਈ.ਐਸ ਕਰਦੀ ਹੈ ਇਹ ਸੰਸਥਾ ਸੋਨੇ, ਚਾਂਦੀ ਅਤੇ ਹੋਰ ਕੀਮਤੀ ਧਾਤਾਂ ਤੋਂ ਬਣੇ ਗਹਿਣਿਆਂ ਜਾਂ ਕਲਾਕ੍ਰਿਤੀਆਂ ਦੀ ਜਾਂਚ ਕਰਦੀ ਹੈ। ਜੇਕਰ ਧਾਤ ਸ਼ੁੱਧ ਹੈ, ਤਾਂ ਇਸ ਨੂੰ ਇੱਕ ਟੈਗ ਦਿੱਤਾ ਜਾਂਦਾ ਹੈ। ਇਸ ਸਾਰੀ ਪ੍ਰਕਿਰਿਆ ਨੂੰ ਹਾਲਮਾਰਕਿੰਗ ਕਿਹਾ ਜਾਂਦਾ ਹੈ। ਹੁਣ ਭਾਰਤ ਸਰਕਾਰ ਨੇ ਹੁਕਮ ਜਾਰੀ ਕਰਕੇ ਕਿਹਾ ਹੈ ਕਿ ਸੁਨਿਆਰੇ ਹਾਲਮਾਰਕਿੰਗ ਤੋਂ ਬਿਨਾਂ ਸੋਨੇ ਦੀ ਬਣੀ ਕੋਈ ਵੀ ਚੀਜ਼ ਨਹੀਂ ਵੇਚ ਸਕਣਗੇ।