ਜ਼ਿਲ੍ਹਾ ਕੁੱਲੂ ਦੀ ਮਨੀਕਰਨ ਘਾਟੀ ਵਿੱਚ ਦੇਰ ਰਾਤ ਇੱਕ ਵਾਹਨ ਵਿੱਚ ਜ਼ਬਰਦਸਤ ਧਮਾਕਾ ਹੋਇਆ। ਧਮਾਕਾ ਇਨਾਂ ਜ਼ੋਰਦਾਰ ਸੀ ਕਿ ਗੱਡੀ ਦੇ ਚੀਥੜੇ ਉੱਡ ਗਏ ਅਤੇ ਕਾਫੀ ਦੇਰ ਤੱਕ ਲੋਕ ਇਕ ਦੂਜੇ ਨੂੰ ਧਮਾਕੇ ਬਾਰੇ ਪੁੱਛਦੇ ਰਹੇ ਕਿ ਇਹ ਅੱਤਵਾਦੀ ਹਮਲਾ ਸੀ ਜਾਂ ਨਹੀਂ। ਦਸ ਦਈਏ ਕਿ ਇਹ ਕਾਰ ਕਰੀਬ ਦੋ ਮਹੀਨਿਆਂ ਤੋਂ ਸੜਕ ਦੇ ਕਿਨਾਰੇ ਖੜ੍ਹੀ ਸੀ। ਇਸ ਦੇ ਮਾਲਕ ਦਾ ਘਰ ਸੜਕ ਦੇ ਉੱਪਰ ਪਿੰਡ ਮਤੇਔਂਡਾ ਵਿੱਚ ਹੈ।
ਦਸ ਦਈਏ ਕਿ ਮਣੀਕਰਨ ਰੋਡ ‘ਤੇ ਟੈਕਸੀ ਨੰਬਰ ਐਚਪੀ 01 ਕੇ 2185 ਵਿੱਚ ਇਹ ਧਮਾਕਾ ਹੋਇਆ ਜਿਸ ਤੋਂ ਬਾਅਦ ਗੱਡੀ ਦੋ ਹਿਸਿਆ ‘ਚ ਟੁੱਟੀ ਹੋਈ ਮਿਲੀ। ਧਮਾਕੇ ਤੋਂ ਬਾਅਦ ਆਸਪਾਸ ਦੇ ਲੋਕ ਸਹਿਮ ਗਏ। ਇਸ ਦੀ ਜਾਂਚ ਲਈ ਵਧੀਕ ਪੁਲੀਸ ਸੁਪਰਡੈਂਟ ਸਾਗਰ ਚੰਦਰ ਰਾਤ ਕਰੀਬ ਡੇਢ ਵਜੇ ਹੀ ਮੌਕੇ ’ਤੇ ਪੁੱਜੇ। ਸ਼ਨੀਵਾਰ ਨੂੰ ਮੰਡੀ ਤੋਂ ਐਫਐਸਐਲ ਦੀ ਟੀਮ ਨੂੰ ਜਾਂਚ ਲਈ ਬੁਲਾਇਆ ਗਿਆ ਹੈ। ਫਿਲਹਾਲ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਧਮਾਕਾ ਵਾਹਨ ‘ਚ ਸ਼ਾਰਟ ਸਰਕਟ ਕਾਰਨ ਹੋਇਆ ਜਾਂ ਹੋਰ ਕਾਰਨਾਂ ਕਰਕੇ ਹੋਇਆ।