ਸਾਲ 2018 ਤੋਂ ਬਾਅਦ IPL ਦੀ ਪਹਿਲੀ ਵੱਡੀ ਨਿਲਾਮੀ ਹੋਣ ਜਾ ਰਹੀ ਹੈ। ਆਈਪੀਐਲ 2018 ਦੀ ਮੈਗਾ ਨਿਲਾਮੀ ਵਿੱਚ ਕੁੱਲ 8 ਟੀਮਾਂ ਸਨ। ਇਸ ਵਾਰ ਨਿਲਾਮੀ ਵਿੱਚ 10 ਟੀਮਾਂ ਹਿੱਸਾ ਲੈਣਗੀਆਂ। ਇਸ ਸਾਲ ਆਈਪੀਐਲ ਦੀ ਮੈਗਾ ਨਿਲਾਮੀ 12 ਅਤੇ 13 ਫਰਵਰੀ ਨੂੰ ਹੋਵੇਗੀ। ਬੀਸੀਸੀਆਈ ਨੇ ਸ਼ਨੀਵਾਰ ਨੂੰ 1,214 ਖਿਡਾਰੀਆਂ ਦੀ ਸੂਚੀ ਜਾਰੀ ਕੀਤੀ। ਇਨ੍ਹਾਂ ਖਿਡਾਰੀਆਂ ਵਿੱਚੋਂ 896 ਭਾਰਤੀ ਅਤੇ 318 ਵਿਦੇਸ਼ੀ ਖਿਡਾਰੀ ਹਨ।
IPL 2022 ਲਈ 33 ਖਿਡਾਰੀਆਂ ਨੂੰ ਰਿਟੇਨ ਕੀਤਾ ਹੈ। 8 ਟੀਮਾਂ ਨੇ 27 ਖਿਡਾਰੀਆਂ ਨੂੰ ਰਿਟੇਨ ਕੀਤਾ ਹੈ। ਇਸ ਦੇ ਨਾਲ ਹੀ ਆਈਪੀਐਲ ਦੀਆਂ 2 ਨਵੀਆਂ ਟੀਮਾਂ ਨੇ 6 ਖਿਡਾਰੀਆਂ ਨੂੰ ਆਪਣੀ ਟੀਮ ਵਿੱਚ ਸ਼ਾਮਲ ਕੀਤਾ ਹੈ। ਕੇਐਲ ਰਾਹੁਲ ਨੂੰ ਲਖਨਊ ਨੇ 17 ਕਰੋੜ ਵਿੱਚ ਆਪਣੀ ਟੀਮ ਨਾਲ ਜੋੜਿਆ ਹੈ।
ਦੋ ਦਿਨ ਚੱਲਣ ਵਾਲੀ ਇਸ ਮੈਗਾ ਨਿਲਾਮੀ ਵਿੱਚ 10 ਟੀਮਾਂ ਹਿੱਸਾ ਲੈ ਰਹੀਆਂ ਹਨ। ਨਿਲਾਮੀ ਵਿੱਚ 270 ਕੈਪਡ ਖਿਡਾਰੀ, 903 ਅਨਕੈਪਡ ਖਿਡਾਰੀ ਅਤੇ 41 ਸਹਿਯੋਗੀ ਦੇਸ਼ਾਂ ਦੇ ਖਿਡਾਰੀਆਂ ਨੂੰ ਰਜਿਸਟਰ ਕੀਤਾ ਗਿਆ ਹੈ। ਹਰੇਕ ਫਰੈਂਚਾਈਜ਼ੀ ਦੀ ਟੀਮ ਵਿੱਚ 25 ਖਿਡਾਰੀ ਹਨ, ਨਿਲਾਮੀ ਵਿੱਚ 217 ਖਿਡਾਰੀ ਖਰੀਦੇ ਜਾਣਗੇ। ਇਨ੍ਹਾਂ ਵਿਚ 70 ਵਿਦੇਸ਼ੀ ਖਿਡਾਰੀਆਂ ਦੇ ਨਾਂ ਸ਼ਾਮਲ ਹੋਣਗੇ। ਮੰਨਿਆ ਜਾ ਰਿਹਾ ਹੈ ਕਿ ਸਾਰੀਆਂ ਟੀਮਾਂ ਆਪਣੇ ਖਿਡਾਰੀਆਂ ਦੇ ਕੋਟੇ ਨੂੰ ਪੂਰਾ ਕਰਨਗੀਆਂ। ਅਜਿਹੇ ‘ਚ ਨਿਲਾਮੀ ‘ਚ 200 ਤੋਂ ਜ਼ਿਆਦਾ ਖਿਡਾਰੀਆਂ ਦੇ ਨਾਵਾਂ ਦੀ ਬੋਲੀ ਲੱਗਣ ਦੀ ਪੂਰੀ ਸੰਭਾਵਨਾ ਹੈ।
