ਸੋਮਵਾਰ ਨੂੰ ਇੰਡੀਅਨ ਪ੍ਰੀਮੀਅਰ ਲੀਗ (IPL) ਦੇ ਅਗਲੇ ਪੰਜ ਸੀਜ਼ਨ (2023 ਤੋਂ 2027) ਲਈ ਮੀਡੀਆ ਅਧਿਕਾਰਾਂ ਦੀ ਨਿਲਾਮੀ ਦਾ ਦੂਜਾ ਦਿਨ ਹੈ। ਦੂਜੇ ਦਿਨ ਦੀ ਪ੍ਰਕਿਰਿਆ ਸ਼ੁਰੂ ਹੋ ਗਈ ਹੈ। ਇਸਦੇ ਸ਼ੁਰੂਆਤੀ ਪੜਾਅ ਵਿੱਚ, ਭਾਰਤੀ ਉਪ ਮਹਾਂਦੀਪ ਲਈ ਟੀਵੀ ਅਤੇ ਡਿਜੀਟਲ ਅਧਿਕਾਰ ਵੇਚੇ ਗਏ ਹਨ। ਸੂਤਰਾਂ ਦੀ ਮੰਨੀਏ ਤਾਂ ਟੀਵੀ ਰਾਈਟਸ 57 ਕਰੋੜ ਪ੍ਰਤੀ ਮੈਚ ਅਤੇ ਡਿਜੀਟਲ ਰਾਈਟਸ 48 ਕਰੋੜ ਪ੍ਰਤੀ ਮੈਚ ਦੇ ਹਿਸਾਬ ਨਾਲ ਵੇਚੇ ਗਏ ਹਨ। ਇਨ੍ਹਾਂ ਦੀ ਕੁੱਲ ਬੋਲੀ 43,255 ਕਰੋੜ ਹੈ। ਟੀਵੀ ਪੈਕੇਜ 23,575 ਕਰੋੜ ਰੁਪਏ ਅਤੇ ਡਿਜੀਟਲ ਪੈਕੇਜ 19,680 ਕਰੋੜ ਰੁਪਏ ਵਿੱਚ ਵੇਚਿਆ ਗਿਆ ਸੀ।
ਖਰੀਦਦਾਰ ਦੇ ਨਾਂ ਦਾ ਖੁਲਾਸਾ ਨਹੀਂ ਕੀਤਾ ਗਿਆ ਹੈ। ਪਿਛਲੀ ਨਿਲਾਮੀ ‘ਚ ਇਨ੍ਹਾਂ ਅਧਿਕਾਰਾਂ ਨੂੰ ਸਟਾਰ ਨੇ 16,348 ਕਰੋੜ ‘ਚ ਖਰੀਦਿਆ ਸੀ। ਅਜਿਹੇ ‘ਚ ਇਸ ਵਾਰ ਟੀਵੀ ਅਤੇ ਡਿਜੀਟਲ ਰਾਈਟਸ ਪਿਛਲੀ ਵਾਰ ਦੇ ਮੁਕਾਬਲੇ ਢਾਈ ਗੁਣਾ ਜ਼ਿਆਦਾ ਹਨ। ਸੂਤਰਾਂ ਮੁਤਾਬਕ ਪਹਿਲੇ ਦਿਨ ਐਤਵਾਰ ਤੱਕ ਬੋਲੀ ਦੀ ਰਕਮ 43 ਹਜ਼ਾਰ 50 ਕਰੋੜ ਰੁਪਏ ਹੋ ਗਈ ਸੀ। ਇਸ ਵਿੱਚ ਹੋਰ ਵਾਧਾ ਹੋ ਸਕਦਾ ਹੈ। ਸਭ ਤੋਂ ਵੱਧ ਬੋਲੀ ਕਿਸ ਨੇ ਲਗਾਈ, ਇਸ ਦਾ ਖੁਲਾਸਾ ਨਹੀਂ ਕੀਤਾ ਗਿਆ। ਰਾਈਟਸ ਜਿੱਤਣ ਵਾਲੀ ਕੰਪਨੀ ਦੇ ਨਾਂ ਦਾ ਅੱਜ ਐਲਾਨ ਕੀਤਾ ਜਾ ਸਕਦਾ ਹੈ।
ਸੂਤਰਾਂ ਨੇ ਦੱਸਿਆ ਕਿ ਹੁਣ ਬੀਸੀਸੀਆਈ ਨੂੰ ਆਈਪੀਐਲ ਦੇ ਇੱਕ ਮੈਚ ਲਈ 105.5 ਕਰੋੜ ਰੁਪਏ ਮਿਲਣਗੇ। ਇਸ ਤਰ੍ਹਾਂ, ਇੱਕ ਮੈਚ ਦੇ ਪ੍ਰਸਾਰਣ ਅਧਿਕਾਰਾਂ ਦੇ ਅਨੁਸਾਰ, ਆਈਪੀਐਲ ਹੁਣ ਦੁਨੀਆ ਦੀ ਦੂਜੀ ਸਭ ਤੋਂ ਮਹਿੰਗੀ ਲੀਗ ਬਣ ਗਈ ਹੈ। ਆਈਪੀਐਲ ਨੇ ਈਪੀਐਲ (86 ਕਰੋੜ ਰੁਪਏ ਪ੍ਰਤੀ ਮੈਚ) ਨੂੰ ਮਾਤ ਦਿੱਤੀ ਹੈ। ਹੁਣ ਸਿਰਫ ਅਮਰੀਕਾ ਦੀ ਨੈਸ਼ਨਲ ਫੁੱਟਬਾਲ ਲੀਗ (NFL) ਨੂੰ ਇਸ ਤੋਂ ਵੱਧ ਪੈਸਾ ਮਿਲਿਆ ਹੈ। NFL ਨੂੰ ਹਰ ਮੈਚ ਦੇ ਪ੍ਰਸਾਰਣ ਅਧਿਕਾਰਾਂ ਲਈ 133 ਕਰੋੜ ਰੁਪਏ ਮਿਲਦੇ ਹਨ।