ਚੰਡੀਗੜ/ਜਲੰਧਰ, 26 ਜੁਲਾਈ : – ਬਹੁਜਨ ਸਮਾਜ ਪਾਰਟੀ ਦੇ ਸੂਬਾ ਪ੍ਰਧਾਨ ਸਰਦਾਰ ਜਸਵੀਰ ਸਿੰਘ ਗੜ੍ਹੀ ਨੇ ਪ੍ਰੈੱਸ ਨੋਟ ਜਾਰੀ ਕਰਦਿਆਂ ਕਿਹਾ ਕਿ ਪੰਜਾਬ ਦੇ ਐਡਵੋਕੇਟ ਜਨਰਲ ਅਨਮੋਲ ਰਤਨ ਸਿੱਧੂ ਨੂੰ ਹਟਾਉਣ ਦਾ ਸਵਾਗਤ ਤਾਂ ਹੈ, ਪ੍ਰੰਤੂ ਐਡਵੋਕੇਟ ਸਿੱਧੂ ਵਲੋਂ ਹਾਈਕੋਰਟ ਵਿੱਚ ਦਾਖ਼ਲ ਪਟੀਸ਼ਨ ਵਿਚ ਦਲਿਤ ਸਮਾਜ ਨੂੰ ਆ-ਕਾਰਜਕੁਸ਼ਲ ਦੱਸਣ ਖ਼ਿਲਾਫ਼ ਆਮ ਆਦਮੀ ਪਾਰਟੀ ਦੀ ਪੰਜਾਬ ਸਰਕਾਰ ਨੇ ਪੰਜਾਬ ਰਾਜ ਅਨੁਸੂਚਿਤ ਜਾਤੀ ਅਤਿਆਚਾਰ ਰੋਕੂ ਐਕਟ 1989 ਤਹਿਤ ਕੋਈ ਵੀ ਕੇਸ ਦਰਜ ਨਾ ਕਰਨਾ, ਦਲਿਤ ਵਿਰੋਧੀ ਕਾਰਵਾਈ ਹੈ। ਆਮ ਆਦਮੀ ਪਾਰਟੀ ਆਪਣੀ ਸਰਕਾਰ ਦੇ ਚਾਰ ਮਹੀਨਿਆਂ ਦੌਰਾਨ ਲਗਾਤਾਰ ਦਲਿਤ ਵਿਰੋਧੀ ਫੈਂਸਲੇ ਲੈ ਰਹੀ ਹੈ ਜਿਸ ਨਾਲ ਪੰਜਾਬ ਸਰਕਾਰ ਦਾ ਦਲਿਤ ਵਿਰੋਧੀ ਚੇਹਰਾ ਬੇਨਕਾਬ ਹੋਇਆ ਹੈ। ਸ ਗੜ੍ਹੀ ਨੇ ਕਿਹਾ ਕਿ ਅਨਮੋਲ ਰਤਨ ਸਿੱਧੂ ਦਾ ਅਸਤੀਫ਼ਾ ਬਹੁਜਨ ਸਮਾਜ ਦੇ ਲੋਕਾਂ ਦੀ ਜਿੱਤ ਹੈ। ਬਹੁਜਨ ਸਮਾਜ ਪਾਰਟੀ ਨੇ ਅਨਮੋਲ ਰਤਨ ਸਿੱਧੂ ਖ਼ਿਲਾਫ਼ 14 ਜੁਲਾਈ ਨੂੰ ਦਲਿਤ ਵਰਗ ਲਈ ਜਾਤੀਵਾਦੀ ਸੋਚ ਰੱਖਣ ਖ਼ਿਲਾਫ਼ ਸੜਕ ਤੇ ਉੱਤਰਕੇ ਸਾਰੇ ਪੰਜਾਬ ਦੇ 23 ਜਿਲ੍ਹਾ ਹੈੱਡ-ਕੁਆਰਟਰ ਤੇ ਜੋਰਦਾਰ ਪ੍ਰਦਰਸ਼ਨ ਕੀਤੇ ਸਨ ਅਤੇ ਕਾਰਵਾਈ ਹਿਤ ਗਵਰਨਰ ਨੂੰ ਮੈਮੋਰੰਡਮ ਦਿੱਤੇ ਸਨ। ਇਸਦੇ ਨਾਲ ਹੀ ਬਸਪਾ ਨੇ 26 ਜੁਲਾਈ ਤਕ ਦਾ ਅਲਟੀਮੇਟਮ ਸਰਕਾਰ ਨੂੰ ਦਿੱਤਾ ਸੀ, ਜਿਸ ਸਬੰਧੀ 27 ਜੁਲਾਈ ਨੂੰ ਬਸਪਾ ਦੀ ਸੂਬਾ ਮੀਟਿੰਗ ਬੁਲਾਈ ਜਾ ਚੁੱਕੀ ਹੈ। ਸਿਰਫ 10 ਦਿਨਾਂ ਦੇ ਦਬਾਅ ਹੇਠ ਅਨਮੋਲ ਰਤਨ ਸਿੱਧੂ ਅਤੇ ਪੰਜਾਬ ਸਰਕਾਰ ਮੈਦਾਨ ਛੱਡਕੇ ਭੱਜ ਚੁੱਕੀ ਹੈ, ਪ੍ਰੰਤੂ ਬਸਪਾ ਐਸ.ਸੀ. ਐਕਟ ਦਾ ਪਰਚਾ ਦਰਜ਼ ਹੋਣ ਤੱਕ ਪੰਜਾਬ ਸਰਕਾਰ ਅੱਗੇ ਇਹ ਮਾਮਲਾ ਉਠਾਉਂਦੀ ਰਹੇਗੀ। ਬਸਪਾ ਨੇ ਸਰਕਾਰ ਅੱਗੇ 178 ਲਾਅ ਅਫਸਰਾਂ ਦੀਆਂ ਪੋਸਟਾਂ ਅਤੇ ਹੋਰ ਠੇਕੇ ਤੇ ਭਾਰਤੀ ਵਿਚ ਵੀ ਰਾਖਵਾਂਕਰਨ ਲਾਗੂ ਕਰਨ ਦੀ ਅਪੀਲ ਵੀ ਕੀਤੀ।