ਰਾਜਸਥਾਨ ਦੇ ਸੀਕਰ ਸ਼ਹਿਰ ਤੋਂ ਇੱਕ ਅਨੋਖਾ ਮਾਮਲਾ ਸਾਹਮਣੇ ਆਇਆ ਹੈ। ਸੀਕਰ ਸ਼ਹਿਰ ਦੇ ਹਾਰਟ ਸਰਜਨ ਡਾਕਟਰ ਵੀ.ਕੇ ਜੈਨ ਦਾ ਤੋਤਾ ਤਿੰਨ ਦਿਨ ਤੋਂ ਲਾਪਤਾ ਹੋ ਗਿਆ ਹੈ। ਦਸਿਆ ਜਾ ਰਿਹਾ ਹੈ ਕਿ ਤਿੰਨ ਦਿਨ ਪਹਿਲਾ ਘਰ ਦੀ ਛੱਤ ਤੇ ਪਰਿਵਾਰ ਮੈਂਬਰ ਤੋਤੇ ਨੂੰ ਕੁੱਝ ਖਿਲਾ ਰਹੇ ਸਨ ਜਿਸ ਤੋਂ ਬਾਅਦ ਤੋਤਾ ਉੱਡ ਗਿਆ ਅਤੇ ਅਜੇ ਤੱਕ ਵਾਪਿਸ ਨਹੀਂ ਆਇਆ। ਤੋਤੇ ਦੇ ਲਾਪਤਾ ਹੋਣ ਤੋਂ ਬਾਅਦ ਡਾਕਟਰ ਦੀ ਪਤਨੀ ਨੇ ਖਾਣਾ-ਪੀਣਾ ਤੱਕ ਛੱਡ ਦਿੱਤਾ।
ਇਸ ਅਨੋਖੇ ਪੰਛੀ ਪ੍ਰੇਮ ‘ਚ ਡਾਕਟਰ ਨੇ ਤੋਤੇ ਨੂੰ ਲੱਭਣ ਲਈ ਲੱਖਾਂ ਰੁਪਏ ਖਰਚ ਕੀਤੇ। ਉਹਨਾਂ ਨੇ ਅਖਬਾਰ ਦੇ ਪਹਿਲੇ ਪੰਨੇ ‘ਤੇ ਮਿਸਿੰਗ ਦਾ ਇਸ਼ਤਿਹਾਰ ਛਪਵਾ ਲਿਆ। ਸ਼ਹਿਰ ‘ਚ ਪੋਸਟਰ-ਪੈਂਫਲੇਟ ਵੰਡੇ, ਸੋਸ਼ਲ ਮੀਡੀਆ ਰਾਹੀਂ ਸੰਦੇਸ਼ ਵੀ ਦਿੱਤੇ। ਡਾਕਟਰ ਵੀ.ਕੇ ਜੈਨ ਨੇ ਤੋਤੇ ਨੂੰ ਲੱਭਣ ਵਾਲੇ ਨੂੰ ਇਨਾਮ ਦੇਣ ਦਾ ਐਲਾਨ ਕੀਤਾ ਗਿਆ ਹੈ। ਡਾਕਟਰ ਵੀ ਕੇ ਜੈਨ ਦਾ ਕਹਿਣਾ ਹੈ, ‘ਜੇਕਰ ਕੋਈ ਤੋਤੇ ਨੂੰ ਲੱਭ ਕੇ ਸਾਨੂੰ ਸੂਚਿਤ ਕਰਦਾ ਹੈ ਤਾਂ ਮੈਂ ਉਸ ਨੂੰ ਖੁਸ਼ੀ ਖੁਸ਼ੀ ਇਕ ਲੱਖ ਰੁਪਏ ਦੇ ਦੇਵਾਂਗਾ।
ਡਾ: ਜੈਨ ਨੇ ਦੱਸਿਆ ਕਿ ਇਹ ਤੋਤਾ ਇੱਕ ਦੁਰਲੱਭ ਪ੍ਰਜਾਤੀ ਦਾ ਹੈ। ਇਹ ਇੱਕ ਹਜ਼ਾਰ ਤੋਂ ਵੱਧ ਸ਼ਬਦ ਬੋਲਦਾ ਹੈ। ਹਰ ਕਿਸੇ ਨਾਲ ਗੱਲ ਕਰਦਾ ਸੀ, ਜਦੋਂ ਕੁਝ ਵੀ ਪੁੱਛਦਾ ਸੀ ਤਾਂ ਜਵਾਬ ਦਿੰਦਾ ਸੀ। ਉਸ ਨੂੰ ਸਰਿੰਜ ਨਾਲ ਜੂਸ ਅਤੇ ਦੁੱਧ ਪਿਲਾਇਆ ਜਾਂਦਾ ਸੀ। ਪਰਿਵਾਰਕ ਮੈਂਬਰ ਅਤੇ ਹਸਪਤਾਲ ਦਾ ਸਟਾਫ ਦਿਨ-ਰਾਤ ਤੋਤੇ ਦੀ ਭਾਲ ਕਰ ਰਿਹਾ ਹੈ।
