ਯੂਕਰੇਨ : – ਰੂਸ ਅਤੇ ਯੂਕਰੇਨ ਦਾ ਯੁੱਧ ਅੱਜ ਤੀਜੇ ਦਿਨ ਵੀ ਜਾਰੀ ਹੈ| ਦੱਸਿਆ ਜਾ ਰਿਹਾ ਹੈ ਕਿ ਰੂਸੀ ਫੌਜੀ ਕਿਸੇ ਵੀ ਸਮੇਂ ਯੂਕਰੇਨ ਦੀ ਰਾਜਧਾਨੀ ਅੰਦਰ ਦਾਖਲ ਹੋ ਸਕਦੇ ਹਨ। ਯੁੱਧ ਦੇ ਤੀਜੇ ਦਿਨ ਰੂਸੀ ਫੌਜੀ ਯੂਕਰੇਨ ਦੀ ਰਾਜਧਾਨੀ ਕੀਵ ਦੇ ਨਜ਼ਦੀਕ ਪਹੁੰਚ ਗਏ ਹਨ। ਕੀਵ ਅਤੇ ਆਸਪਾਸ ਦੇ ਇਲਾਕਿਆਂ ਵਿੱਚ ਯੂਕਰੇਨ ਦੇ ਸੈਨਿਕ ਅਤੇ ਰੂਸੀ ਸੈਨਿਕ ਆਹਮੋ-ਸਾਹਮਣੇ ਹੋ ਗਏ ਹਨ।
ਤੀਜੇ ਦਿਨ ਦੇ ਅੰਤ ਤੱਕ ਰੂਸੀ ਫੌਜੀ ਕੀਵ ਦੇ ਨੇੜੇ ਪਹੁੰਚ ਗਏ ਹਨ। ਹੁਣ ਉਹ ਕਈ ਪਾਸਿਆਂ ਤੋਂ ਕੀਵ ਨੂੰ ਘੇਰਾ ਪਾ ਕੇ ਰਾਜਧਾਨੀ ਵਿੱਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਯੂਕਰੇਨ ਦੀਆਂ ਫੌਜਾਂ ਨੇ ਮੋਰਚਾ ਸੰਭਾਲ ਲਿਆ ਹੈ ਤਾਂ ਜੋ ਰੂਸੀ ਫੌਜੀ ਰਾਜਧਾਨੀ ਵਿੱਚ ਦਾਖਲ ਨਾ ਹੋ ਸਕਣ।
ਇਸ ਦੌਰਾਨ ਆਮ ਲੋਕਾਂ ਨੇ ਕੀਵ ਦੇ ਬਚਾਅ ਲਈ ਬੰਦੂਕਾਂ ਚੁੱਕੀਆਂ ਹਨ। ਉਹ ਘਰ, ਛੱਤਾਂ ਅਤੇ ਸੜਕਾਂ ‘ਤੇ ਤਾਇਨਾਤ ਰਹਿ ਕੇ ਰੂਸੀ ਦੀ ਫੌਜ ਦਾ ਮੁਕਾਬਲਾ ਅਤੇ ਯੂਕਰੇਨ ਦੀ ਫੌਜ ਦਾ ਸਾਥ ਦੇਣ ਲਈ ਡੱਟ ਗਏ ਹਨ। ਇਨ੍ਹਾਂ ਵਿੱਚੋਂ ਕਈ ਤਾਂ ਦੋ ਰਾਤਾਂ ਤੱਕ ਨਹੀਂ ਸੌਂ ਸਕੇ ਅਤੇ ਆਪਣੇ ਵਤਨ ਦੀ ਰਾਖੀ ਵਿੱਚ ਰੁੱਝੇ ਹੋਏ ਹਨ। ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਕਿਹਾ ਕਿ ਅੱਜ ਦੀ ਰਾਤ ਦੇਸ਼ ਦੇ ਭਵਿੱਖ ਦਾ ਫੈਸਲਾ ਕਰੇਗੀ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਰੂਸੀਆਂ ਨੂੰ ਰੋਕਣ ਲਈ ਡਟ ਕੇ ਖੜ੍ਹੇ ਹੋਣ।
