ਆਈਪੀਐਲ ਦੇ 48ਵੇਂ ਮੈਚ ਵਿੱਚ ਪੰਜਾਬ ਕਿੰਗਜ਼ ਅਤੇ ਗੁਜਰਾਤ ਟਾਈਟਨਸ ਦੀਆਂ ਟੀਮਾਂ ਆਹਮੋ-ਸਾਹਮਣੇ ਹੋਣਗੀਆਂ। ਇਹ ਮੈਚ ਮੁੰਬਈ ਦੇ ਡੀਵਾਈ ਪਾਟਿਲ ਸਟੇਡੀਅਮ ਵਿੱਚ ਖੇਡਿਆ ਜਾਵੇਗਾ। ਗੁਜਰਾਤ ਟਾਈਟਨਸ 9 ਮੈਚਾਂ ਵਿੱਚ ਅੱਠ ਜਿੱਤਾਂ ਨਾਲ 16 ਅੰਕਾਂ ਨਾਲ ਪਹਿਲੇ ਸਥਾਨ ‘ਤੇ ਬਰਕਰਾਰ ਹੈ। ਉਸਦੀ ਨੈੱਟ ਰਨ ਰੇਟ +0.377 ਹੈ।
ਦੂਜੇ ਪਾਸੇ ਪੰਜਾਬ ਕਿੰਗਜ਼ 9 ਮੈਚ ਖੇਡ ਕੇ ਚਾਰ ਮੈਚ ਜਿੱਤਣ ‘ਚ ਕਾਮਯਾਬ ਰਹੀ ਹੈ ਅਤੇ ਇਸ ਸਮੇਂ 8 ਅੰਕਾਂ ਨਾਲ ਅੰਕ ਸੂਚੀ ‘ਚ ਸੱਤਵੇਂ ਸਥਾਨ ‘ਤੇ ਹੈ। ਉਸਦੀ ਨੈੱਟ ਰਨ-ਰੇਟ -0.470 ਹੈ।
ਜਦੋਂ ਪੰਜਾਬ ਨੇ ਚੇਨਈ ਨੂੰ 11 ਦੌੜਾਂ ਨਾਲ ਹਰਾਇਆ ਤਾਂ ਅਜਿਹਾ ਲੱਗ ਰਿਹਾ ਸੀ ਕਿ ਉਹ ਟੂਰਨਾਮੈਂਟ ‘ਚ ਵਾਪਸੀ ਕਰ ਸਕਦਾ ਹੈ। ਪਰ ਆਪਣੇ ਅਗਲੇ ਮੈਚ ਵਿੱਚ ਪੰਜਾਬ ਕਿੰਗਜ਼ ਲਖਨਊ ਸੁਪਰ ਜਾਇੰਟਸ ਤੋਂ 20 ਦੌੜਾਂ ਨਾਲ ਹਾਰ ਗਈ। ਪੰਜਾਬ ਦੀ ਕਹਾਣੀ ਸਾਲ ਦਰ ਸਾਲ ਇਹੋ ਜਿਹੀ ਹੀ ਰਹੀ ਹੈ। ਇਸ ਟੀਮ ਦੇ ਖਿਡਾਰੀ ਕੁਝ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਉਮੀਦ ਪੈਦਾ ਕਰਦੇ ਹਨ ਅਤੇ ਫਿਰ ਆਖਰੀ ਸਮੇਂ ‘ਤੇ ਪ੍ਰਸ਼ੰਸਕਾਂ ਨੂੰ ਨਿਰਾਸ਼ ਕਰਦੇ ਹਨ।
ਜੇਕਰ ਪੰਜਾਬ ਨੇ ਚੋਟੀ ਦੀਆਂ 4 ਟੀਮਾਂ ‘ਚ ਜਗ੍ਹਾ ਬਣਾਉਣੀ ਹੈ ਤਾਂ ਇਸ ਦੇ ਹਰ ਖਿਡਾਰੀ ਨੂੰ ਆਪਣੀ ਭੂਮਿਕਾ ਨੂੰ ਸਮਝ ਕੇ ਜਿੱਤ ‘ਚ ਯੋਗਦਾਨ ਪਾਉਣਾ ਹੋਵੇਗਾ।
ਪੰਜਾਬ ਦੇ ਖਿਲਾਫ ਅੱਜ ਦੇ ਮੈਚ ‘ਚ ਗੁਜਰਾਤ ਦੀ ਟੀਮ ਮੈਨੇਜਮੈਂਟ ਕੁਝ ਅਜਿਹੇ ਖਿਡਾਰੀਆਂ ਨੂੰ ਮੌਕਾ ਦੇ ਸਕਦੀ ਹੈ, ਜਿਨ੍ਹਾਂ ਨੂੰ ਹੁਣ ਤੱਕ ਖੇਡਣ ਦਾ ਮੌਕਾ ਨਹੀਂ ਮਿਲਿਆ। ਇਸ ਦਾ ਫਾਇਦਾ ਇਹ ਹੋਵੇਗਾ ਕਿ ਜੇਕਰ ਪਲੇਆਫ ਦੌਰਾਨ ਕਿਸੇ ਕਾਰਨ ਟੀਮ ਦੇ ਸੁਮੇਲ ਨੂੰ ਬਦਲਣਾ ਪੈਂਦਾ ਹੈ ਤਾਂ ਗੁਜਰਾਤ ਕੋਲ ਪਹਿਲਾਂ ਤੋਂ ਹੀ ਵਿਕਲਪ ਤਿਆਰ ਹੋਣਗੇ।