ਹਰਿਆਣਾ ਦੇ ਭਿਵਾਨੀ ਜ਼ਿਲ੍ਹੇ ਦੇ ਤੋਸ਼ਾਮ ਇਲਾਕੇ ‘ਚ ਵਾਪਰੇ ਹਾਦਸੇ ਤੋਂ ਬਾਅਦ ਦੂਜੇ ਦਿਨ ਵੀ ਬਚਾਅ ਕਾਰਜ ਜਾਰੀ ਹੈ। ਹੁਣ ਵੱਡੇ-ਵੱਡੇ ਪੱਥਰਾਂ ਵਿੱਚ ਛੇਕ ਕਰਕੇ ਡਾਇਨਾਮਾਈਟ ਲਗਾ ਕੇ ਧਮਾਕੇ ਦੀ ਤਿਆਰੀ ਕੀਤੀ ਜਾਂਦੀ ਹੈ। ਇਸ ਦੇ ਲਈ ਘਟਨਾ ਸਥਾਨ ਅਤੇ ਆਸਪਾਸ ਦੇ ਇਲਾਕੇ ਨੂੰ ਸੀਲ ਕਰ ਦਿੱਤਾ ਗਿਆ ਹੈ। ਉਸ ਤੋਂ ਬਾਅਦ ਇਨ੍ਹਾਂ ਪੱਥਰਾਂ ਨੂੰ ਪਾਸੇ ਕਰ ਦਿੱਤਾ ਜਾਵੇਗਾ। ਮਲਬੇ ‘ਚੋਂ ਲਾਸ਼ਾਂ ਕੱਢਣ ਦਾ ਕੰਮ ਅਜੇ ਵੀ ਜਾਰੀ ਹੈ। ਮਰਨ ਵਾਲਿਆਂ ਦੀ ਗਿਣਤੀ 5 ਹੋ ਗਈ ਹੈ। ਮਲਬੇ ਹੇਠ 20 ਤੋਂ ਵੱਧ ਲੋਕਾਂ ਦੇ ਦੱਬੇ ਹੋਣ ਦਾ ਖਦਸ਼ਾ ਹੈ।
ਜ਼ਿਕਰਯੋਗ ਹੈ ਕਿ ਸ਼ਨੀਵਾਰ ਸਵੇਰੇ 8:30 ਵਜੇ ਅਰਾਵਲੀ ਪਹਾੜੀਆਂ ‘ਚ ਮਾਈਨਿੰਗ ਦੌਰਾਨ ਪਹਾੜ ਦੇ ਵੱਡੇ ਹਿੱਸੇ ‘ਚ ਦਰਾਰ ਆ ਗਈ ਸੀ। ਇਹ ਹਾਦਸਾ ਗੋਵਰਧਨ ਮਾਈਨਜ਼ ਖਾਨ ‘ਚ ਵਾਪਰਿਆ। ਇਸ ਵਿੱਚ 20 ਤੋਂ 25 ਲੋਕ ਪੱਥਰਾਂ ਦੇ ਹੇਠਾਂ ਦੱਬ ਗਏ। 4 ਪੋਕਲੇਨ ਮਸ਼ੀਨਾਂ, 2 ਹੌਲ ਮਸ਼ੀਨਾਂ, 2 ਟਰੈਕਟਰ ਅਤੇ 6 ਟਰਾਲੀਆਂ ਅਤੇ ਡੰਪਰ ਪੱਥਰਾਂ ਦੇ ਹੇਠਾਂ ਦੱਬ ਗਏ ਹਨ।
