ਵਾਰਾਣਸੀ ਦੀ ਗਿਆਨਵਾਪੀ ਮਸਜਿਦ ਸਰਵੇਖਣ ਦੇ ਆਖਰੀ ਦਿਨ ਸੋਮਵਾਰ ਨੂੰ ਹਿੰਦੂ ਪੱਖ ਵੱਲੋਂ ਗਿਆਨਵਾਪੀ ‘ਚ 12 ਫੁੱਟ 8 ਇੰਚ ਲੰਬਾ ਸ਼ਿਵਲਿੰਗ ਮਿਲਣ ਦਾ ਦਾਅਵਾ ਕੀਤਾ ਗਿਆ। ਇਸ ਤੋਂ ਬਾਅਦ ਜਿਸ ਜਗ੍ਹਾ ‘ਤੇ ਸ਼ਿਵਲਿੰਗ ਪਾਏ ਜਾਣ ਦਾ ਦਾਅਵਾ ਕੀਤਾ ਗਿਆ ਸੀ, ਉਸ ਨੂੰ ਅਦਾਲਤ ਨੇ ਸੀਲ ਕਰਨ ਦੇ ਹੁਕਮ ਦਿੱਤੇ ਸਨ। ਦੱਸ ਦਈਏ ਕਿ ਅਦਾਲਤ ਨੇ ਡੀਐਮ, ਪੁਲਿਸ ਕਮਿਸ਼ਨਰ ਅਤੇ ਸੀਆਰਪੀਐਫ ਕਮਾਂਡੈਂਟ ਨੂੰ ਇਸ ਨੂੰ ਸੁਰੱਖਿਅਤ ਰੱਖਣ ਦੀ ਨਿੱਜੀ ਜ਼ਿੰਮੇਵਾਰੀ ਦਿੱਤੀ । ਇਸ ਤੋਂ ਬਾਅਦ ਪ੍ਰਸ਼ਾਸਨ ਦੀ ਟੀਮ ਉੱਥੇ ਪਹੁੰਚੀ ਅਤੇ ਅਦਾਲਤ ਦੇ ਹੁਕਮਾਂ ਅਨੁਸਾਰ 9 ਤਾਲੇ ਲਗਾ ਕੇ ਸਬੂਤਾਂ ਨੂੰ ਸੀਲ ਕਰ ਦਿੱਤਾ। ਇਹ ਮਾਮਲਾ ਹੁਣ ਸੁਪਰੀਮ ਕੋਰਟ ਤੱਕ ਪਹੁੰਚ ਗਿਆ ਹੈ। ਗਿਆਨਵਾਪੀ ਮਸਜਿਦ ‘ਚ ਸਰਵੇ ਦੇ ਖਿਲਾਫ ਮੁਸਲਿਮ ਪੱਖ ਵੱਲੋਂ ਦਾਇਰ ਪਟੀਸ਼ਨ ‘ਤੇ ਅੱਜ ਸੁਣਵਾਈ ਹੋਵੇਗੀ।
ਇਸ ਦੌਰਾਨ AIMIM ਮੁਖੀ ਅਸਦੁਦੀਨ ਓਵੈਸੀ ਨੇ ਗਿਆਨਵਾਪੀ ਮਸਜਿਦ ਸਰਵੇਖਣ ਨੂੰ ਲੈ ਕੇ ਕੇਂਦਰ ਸਰਕਾਰ ‘ਤੇ ਵੱਡਾ ਹਮਲਾ ਕੀਤਾ ਹੈ। ਓਵੈਸੀ ਨੇ ਟਵੀਟ ਕਰਦਿਆਂ ਸ਼ਿਵਲਿੰਗ ਹੋਣ ਦੇ ਦਾਅਵੇ ‘ਤੇ ਸਵਾਲ ਖੜ੍ਹੇ ਕੀਤੇ ਹਨ। ਉਨ੍ਹਾਂ ਨੇ ਜਾਰੀ ਕੀਤੀ ਇੱਕ ਵੀਡੀਓ ਵਿੱਚ ਪੁੱਛਿਆ ਹੈ ਕਿ ਮਸਜਿਦ ਕਮੇਟੀ ਨੇ ਦੱਸਿਆ ਕਿ ਇਹ ਇੱਕ ਫੁਹਾਰਾਸੀ, ਸ਼ਿਵਲਿੰਗ ਨਹੀਂ। ਜੇਕਰ ਸ਼ਿਵਲਿੰਗ ਮਿਲਿਆ ਸੀ ਤਾਂ ਅਦਾਲਤ ਦੇ ਕਮਿਸ਼ਨਰ ਨੂੰ ਇਹ ਦੱਸਣਾ ਚਾਹੀਦਾ ਸੀ।
ਓਵੈਸੀ ਨੇ ਕਿਹਾ ਕਿ ”ਹੁਣ ਅਸੀਂ ਕੋਈ ਮਸਜਿਦ ਦੁਬਾਰਾ ਨਹੀਂ ਗਵਾਵਾਂਗੇ ਅਤੇ ਮਸਜਿਦ ਬਣੀ ਰਹੇਗੀ।” ਆਪਣੇ ਇਕ ਟਵੀਟ ‘ਚ ਓਵੈਸੀ ਨੇ ਗੁਜਰਾਤ ‘ਚ ਹੋਈ ਬੈਠਕ ਦਾ ਵੀਡੀਓ ਟੈਗ ਕੀਤਾ ਹੈ। ਇਸ ‘ਚ ਉਨ੍ਹਾਂ ਕਿਹਾ, ”ਜਦੋਂ ਮੈਂ 20-21 ਸਾਲ ਦਾ ਸੀ ਤਾਂ ਮੇਰੇ ਕੋਲੋਂ ਬਾਬਰੀ ਮਸਜਿਦ ਖੋਹ ਲਈ ਗਈ ਸੀ। ਹੁਣ ਅਸੀਂ 19-20 ਸਾਲ ਦੇ ਬੱਚਿਆਂ ਦੀਆਂ ਅੱਖਾਂ ਦੇ ਸਾਹਮਣੇ ਮਸਜਿਦ ਨੂੰ ਦੁਬਾਰਾ ਨਹੀਂ ਗੁਆਵਾਂਗੇ, ਇੰਸ਼ਾ ਅੱਲ੍ਹਾ।” ਓਵੈਸੀ ਨੇ ਕਿਹਾ, “ਗਿਆਨਵਾਪੀ ਮਸਜਿਦ ਇੱਕ ਮਸਜਿਦ ਸੀ ਅਤੇ ਜਦੋਂ ਤੱਕ ਅੱਲ੍ਹਾ ਦੁਨੀਆ ਨੂੰ ਕਾਇਮ ਰੱਖੇਗਾ, ਇਹ ਮਸਜਿਦ ਰਹੇਗੀ।”