ਹਰਿਆਣਾ ਦੇ ਚਰਖੀ ਦਾਦਰੀ ਦੇ ਕੁਬਜਾਨਗਰ ਨੇੜੇ ਸ਼ੁੱਕਰਵਾਰ ਸਵੇਰੇ ਚੱਲਦੀ ਸਕੂਲ ਬੱਸ ‘ਚ ਸ਼ਾਰਟ ਸਰਕਟ ਕਾਰਨ ਅੱਗ ਲੱਗ ਗਈ। ਘਟਨਾ ਸਮੇਂ ਬੱਸ ਵਿੱਚ 12 ਵਿਦਿਆਰਥੀ ਸਵਾਰ ਸਨ, ਜਿਨ੍ਹਾਂ ਨੂੰ ਡਰਾਈਵਰ-ਆਪ੍ਰੇਟਰ ਨੇ ਬੱਸ ਰੋਕ ਕੇ ਬਚਾ ਲਿਆ। ਮਾਮਲੇ ਦੀ ਸੂਚਨਾ ਮਿਲਦੇ ਹੀ ਫਾਇਰ ਬ੍ਰਿਗੇਡ ਅਤੇ ਪੁਲਿਸ ਵਿਭਾਗ ਦੀ ਟੀਮ ਵੀ ਮੌਕੇ ‘ਤੇ ਪਹੁੰਚ ਗਈ। ਹਾਦਸੇ ਵਿੱਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ।
ਜਾਣਕਾਰੀ ਅਨੁਸਾਰ ਕਾਨ੍ਹੜਾ ਸਥਿਤ ਸ਼੍ਰੀ ਰਾਮ ਪਬਲਿਕ ਸਕੂਲ ਦੀ ਬੱਸ ਸ਼ੁੱਕਰਵਾਰ ਸਵੇਰੇ ਬੱਚਿਆਂ ਨੂੰ ਲੈ ਕੇ ਪਿਚੋਪਾ ਕਲਾਂ ਅਤੇ ਕੁਬਜਨਗਰ ਰੂਟ ਤੋਂ ਸਕੂਲ ਆ ਰਹੀ ਸੀ। ਜਦੋਂ ਇਹ ਬੱਸ ਸਵੇਰ ਕਰੀਬ 7.30 ਵਜੇ ਕੁਬਜਾਨਗਰ ਨੇੜੇ ਪਹੁੰਚੀ ਤਾਂ ਸ਼ਾਰਟ ਸਰਕਟ ਹੋਣ ਕਾਰਨ ਬੱਸ ਨੂੰ ਅੱਗ ਲੱਗ ਗਈ। ਡਰਾਈਵਰ ਤੇ ਆਪਰੇਟਰ ਨੇ ਸਮਝਦਾਰੀ ਦਿਖਾਉਂਦੇ ਹੋਏ ਬੱਸ ‘ਚ ਸਵਾਰ ਸਾਰੇ 12 ਵਿਦਿਆਰਥੀਆਂ ਨੂੰ ਬੱਸ ‘ਚੋਂ ਬਾਹਰ ਕੱਢ ਲਿਆ। ਘਟਨਾ ਦੌਰਾਨ ਬੱਸ ਵਿੱਚ ਕੋਈ ਵੀ ਅਧਿਆਪਕ ਸਵਾਰ ਨਹੀਂ ਸੀ।
ਘਟਨਾ ਦਾ ਪਤਾ ਲੱਗਦਿਆਂ ਹੀ ਸਕੂਲ ਮੈਨੇਜਮੈਂਟ ਕਮੇਟੀ ਨੇ ਤੁਰੰਤ ਇਕ ਹੋਰ ਗੱਡੀ ਮੌਕੇ ‘ਤੇ ਭੇਜ ਦਿੱਤੀ। ਇਹ ਗੱਡੀ ਵਿਦਿਆਰਥੀਆਂ ਨੂੰ ਲੈ ਕੇ ਸਕੂਲ ਪਹੁੰਚੀ। ਇਸ ਦੇ ਨਾਲ ਹੀ ਸਕੂਲ ਪ੍ਰਬੰਧਕ ਕਮੇਟੀ ਨੇ ਸੂਝ-ਬੂਝ ਅਤੇ ਮੁਸਤੈਦੀ ਦਿਖਾਉਣ ਲਈ ਡਰਾਈਵਰ ਅਤੇ ਆਪਰੇਟਰ ਦੀ ਸ਼ਲਾਘਾ ਕੀਤੀ।