ਛੱਤੀਸਗੜ੍ਹ ਦੇ ਕਾਂਕੇਰ ਜ਼ਿਲ੍ਹੇ ‘ਚ ਬਲੋਦ ਦੇ ਦਲੀ ਰਾਜਹਾਰਾ ਤੋਂ ਭਾਨੂਪ੍ਰਤਾਪਪੁਰ, ਅੰਤਾਗੜ੍ਹ, ਦੁਰਗ, ਰਾਏਪੁਰ ਜਾਣ ਵਾਲੀ ਇੱਕ ਯਾਤਰੀ ਰੇਲਗੱਡੀ ਹਾਦਸੇ ਦਾ ਸ਼ਿਕਾਰ ਹੋ ਗਈ। ਯਾਤਰੀ ਟਰੇਨ ਪਟੜੀ ‘ਤੇ ਡਿੱਗੇ ਬੋਹੜ ਦੇ ਦਰੱਖਤ ਨਾਲ ਟਕਰਾ ਗਈ। ਹਾਦਸੇ ਵਿੱਚ ਟਰੇਨ ਚਲਾਕ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਇਹ ਘਟਨਾ ਭਾਨੂਪ੍ਰਤਾਪਪੁਰ ਦੇ ਮੂਲੇ ਕੈਂਪ ਨੇੜੇ ਵਾਪਰੀ।
ਟਰੇਨ ਦੇ ਜ਼ਖਮੀ ਲੋਕੋ ਪਾਇਲਟ ਦਾ ਨਾਂ ਪਵਨ ਕੁਮਾਰ ਟੰਡਨ ਦੱਸਿਆ ਜਾ ਰਿਹਾ ਹੈ। ਪਾਇਲਟ ਨੂੰ ਨੇੜਲੇ ਹਸਪਤਾਲ ਲਿਜਾਇਆ ਗਿਆ ਹੈ, ਜਿੱਥੇ ਉਸ ਦਾ ਇਲਾਜ ਚੱਲ ਰਿਹਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਜ਼ਿਆਦਾਤਰ ਯਾਤਰੀ ਬੋਗੀਆਂ ਖਾਲੀ ਸਨ, ਜਿਸ ਕਾਰਨ ਕੁਝ ਹੀ ਯਾਤਰੀ ਟਰੇਨ ‘ਚ ਸਵਾਰ ਸਨ। ਸਾਰੇ ਯਾਤਰੀ ਸੁਰੱਖਿਅਤ ਹਨ।
ਜਾਣਕਾਰੀ ਮੁਤਾਬਕ ਟਰੇਨ ਦਾ ਅਗਲਾ ਹਿੱਸਾ ਬੁਰੀ ਤਰ੍ਹਾਂ ਨਾਲ ਨੁਕਸਾਨਿਆ ਗਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਇੰਜਣ ਦੇ ਦੋਵੇਂ ਪਹੀਏ ਪਟੜੀ ਤੋਂ ਹੇਠਾਂ ਆ ਗਏ, ਜਿਸ ਕਾਰਨ ਟਰੇਨ ਪਟੜੀ ‘ਤੇ ਹੀ ਫਸ ਗਈ। ਦੱਸਿਆ ਜਾ ਰਿਹਾ ਹੈ ਕਿ ਕਰੀਬ 4 ਘੰਟੇ ਦੀ ਮਿਹਨਤ ਤੋਂ ਬਾਅਦ ਇੰਜਣ ਨੂੰ ਟਰੈਕ ‘ਤੇ ਚੜਾਇਆ ਗਿਆ।