ਚੰਡੀਗੜ੍ਹ : – ਅਕਾਲੀ ਦਲ 1920 ਦੇ ਪ੍ਰਧਾਨ ਰਵੀਇੰਦਰ ਸਿੰਘ ਸਾਬਕਾ ਸਪੀਕਰ ਪੰਜਾਬ ਵਿਧਾਨ ਸਭਾ ਨੇ ਦੋਸ਼ ਲਾਇਆ ਕਿ ਕਾਂਗਰਸ ਪਾਰਟੀ ਤੇ ਇਸ ਦੀ ਲੀਡਰਸ਼ਿਪ ਨੇ ‘ ਪਾੜੋ ਤੇ ਰਾਜ ਕਰੋ’ ਦੀ ਨੀਤੀ ਤੇ ਵੱਖ-ਵੱਖ ਫਿਰਕਿਆਂ ਨੂੰ ਇੱਕਠੇ ਨਹੀ ਹੋਣ ਦਿੱਤਾ , ਜਿਸ ਕਾਰਨ ਘੱਟ ਗਿਣਤੀਆਂ ਰਾਜਸੀ , ਧਾਰਮਿਕ , ਸਮਾਜਿਕ ਤੇ ਆਰਥਕ ਮੰਚ ਤੇ ਉਭਰ ਨਹੀ ਸਕੀਆਂ। ਰਵੀਇੰਦਰ ਸਿੰਘ ਨੇ ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਸਾਬਕਾ , ਪ੍ਰਧਾਨ ਸੁਨੀਲ ਜਾਖੜ ਦੇ ਹਵਾਲੇ ਨਾਲ ਕਿਹਾ ਕਿ ਰਾਹੁਲ ਗਾਂਧੀ ਨੇ ਸ਼ਿਮਲੇ ਜਾਣ ਸਮੇਂ ਉਨਾ ਨੂੰ ਨਾਲ ਰੱਖਦਿਆਂ ਭਰੋਸਾ ਦਿੱਤਾ ਸੀ ਕਿ ਉਹ ਪੰਜਾਬ ਦੇ ਮੁੱਖ – ਮੰਤਰੀ ਹੋਣਗੇ ਪਰ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਮੁੱਖ –ਮੰਤਰੀ ਦਾ ਅਹੁਦਾ ਛੱਡਣ ਬਾਅਦ ਸੁਨੀਲ ਜਾਖੜ ਨੂੰ ਬੜੇ ਕੂਟਨੀਤਕ ਢੰਗ ਨਾਲ ਇਕ ਪਾਸੇ ਕਰ ਦਿੱਤਾ ਕਿ ਉਹ ਹਿੰਦੂ ਹਨ ਤੇ ਪੰਜਾਬ ਦਾ ਮੁੱਖ ਮੰਤਰੀ ਸਿੱਖ ਚਿਹਰਾ ਚਾਹੀਦਾ ਹੈ , ਜਿਸ ਨਾਲ ਹਿੰਦੂ – ਸਿੱਖ ਭਾਈਚਾਰੇ ਚ ਅੰਦਰੂਨੀ ਮਤਭੇਦ ਪੈਦਾ ਹੋਣੇ ਕੁਦਰਤੀ ਸਨ, ਇਸ ਕਾਰਨ ਸੁਨੀਲ ਜਾਖੜ ਨੂੰ ਨਿੱਜੀ ਤੇ ਜੰਨਤਕ ਜਲੀਲ ਹੋਣਾ ਪਿਆ।
ਸੁਨੀਲ ਜਾਖੜ ਨੇ ਸੱਜਰੇ ਬਿਆਨ ਚ ਆਪਣੀ ਹੱਤਕ ਦਾ ਦਰਦ ਜਨਤਕ ਕੀਤਾ ਹੈ ਕਿ ਮੈਨੂੰ 42 ਫੀਸਦੀ , ਸੁਖਜਿੰਦਰ ਸਿੰਘ ਰੰਧਾਵਾ 16 ਫੀਸਦੀ , ਮਹਾਰਾਣੀ ਪ੍ਰਨੀਤ ਕੌਰ 12 ਫੀਸਦੀ , ਨਵਜੋਤ ਸਿੰਘ ਸਿੱਧੂ 6 ਫੀਸਦੀ ਅਤੇ ਚਰਨਜੀਤ ਸਿੰਘ ਚੰਨੀ ਕੇਵਲ ਦੋ ਫੀਸਦੀ ਹਾਸਲ ਕਰਕੇ ਮੁੱਖ ਮੰਤਰੀ ਬਣਾ ਦਿੱਤੇ ਗਏ , ਜਾਖੜ ਦਾ ਦਰਦ ਵਾਜਬ ਹੈ। ਪੰਜਾਬ ਗੁਰੂਆਂ , ਪੀਰਾਂ ਦੀ ਧਰਤੀ ਹੈ। ਸਿੱਖ ਸਾਂਝੀ ਵਾਲਤਾ ਤੇ ਯਕੀਨ ਰੱਖਦੇ ਹਨ। ਸਚਖੰਡ ਹਰਿੰਮੰਦਰ ਸਾਹਿਬ ਦੇ ਦਰਵਾਜੇ ਸਭਨਾ ਲਈ 24 ਘੰਟੇ ਖੁਲੇ ਰਹਿੰਦੇ ਹਨ। ਸਿੱਖ ਧਰਮ ਚ ਜਾਤ-ਪਾਤ , ਫਿਰਕਾਪ੍ਰਸਤੀ ਦਾ ਕੋਈ ਰੌਲਾ ਨਹੀ ਪਰ ਕਾਂਗਰਸ ਪਾਰਟੀ ਹਮੇਸ਼ਾਂ ਹੀ ’ਪਾੜੋ ਤੇ ਰਾਜ ਕਰੋ’ ਦੀ ਨੀਤੀ ਤੇ ਚਲਦਿਆ ਭਾਰਤੀਆਂ ਨੂੰ ਫਿਰਕੂ ਲੀਹਾਂ ਤੇ ਅੰਗਰੇਜਾਂ ਵਾਂਗ ਵੰਡਿਆਂ । ਪੰਡਤ ਜਵਾਹਰ ਲਾਲ ਨਹਿਰੂ , ਇੰਦਰਾਗਾਂਧੀ ਨੂੰ ਸਿੱਖ ਹਮੇਸ਼ਾਂ ਰੜਕਦੇ ਸਨ ਜਿੰਨਾ ਅਜਾਦੀ ਸੰਗਰਾਮ ਚ ਅਥਾਹ ਕੁਰਬਾਨੀਆ ਕੀਤੀਆਂ ।
ਪਰ ਉਨਾਂ ਪੰਜਾਬ ਸਬੰਧੀ ਕੀਤੇ ਵਾਅਦੇ ਪੂਰੇ ਕਰਨ ਦੀ ਥਾਂ , ਲੰਬਾ ਸਮਾਂ ਪੰਜਾਬੀ ਸੂਬਾ ਹੀ ਬਣਨ ਨਹੀ ਦਿੱਤਾ ਜਦ ਕਿ ਆਂਧਰਾ ਪ੍ਰਦੇਸ਼ 1953 ਵਿੱਚ ਹੀ ਮਦਰਾਸ ਤੋਂ ਵੱਖਰਾ ਕਰਕੇ ਅਲੱਗ ਪ੍ਰਾਂਤ ਬਣਾ ਦਿੱਤਾ ਸੀ । ਪਰ ਇੰਦਰਾ ਗਾਂਧੀ ਨੇ ਪੰਜਾਬ ਦੇ ਟੋਟੇ ਕਰਕੇ 1-11-1966 ਨੂੰ ਬੜੇ ਅੰਦੋਲਨਾ ਬਾਅਦ , ਇਸ ਨੂੰ ਮਾਨਤਾ ਦਿੱਤੀ ਗਈ । ਸਾਬਕਾ ਸਪੀਕਰ ਨੇ ਬੜੇ ਅਫਸੋਸ ਨਾਲ ਕਿਹਾ ਕਿ ਇੰਦਰਾ ਗਾਂਧੀ ਵੱਲੋਂ ਸੱਚਖੰਡ ਸ਼੍ਰੀ ਹਰਿਮੰਦਰ ਸਾਹਿਬ ਤੇ ਫੌਜੀ ਹਮਲਾ ਕਰਕੇ , ਸ੍ਰੀ ਅਕਾਲ ਤਖਤ ਸਾਹਿਬ ਨੂੰ ਤੋਪਾਂ ਨਾਲ ਉਡਾਇਆ , ਦਿੱਲੀ ਚ ਸਿੱਖ ਕਤਲ ਕੀਤੇ ਪੰਜਾਬ ਬਰਬਾਦ ਕਰਨ ਲਈ ਦਰਿਆਈ ਪਾਣੀਆਂ, ਡੈਮਾਂ ਤੇ ਖੁਦ ਕੰਟਰੋਲ ਕਰਕੇ , ਸੂਬੇ ਨੂੰ ਆਰਥਕ ਤੋਰ ਤੇ ਬਰਬਾਦ ਕੀਤਾ ।
ਰਵੀਇੰਦਰ ਸਿੰਘ ਮੁਤਾਬਕ , ਜੇਕਰ ਕਾਂਗਰਸੀ ਨੇਤਾਵਾਂ ਖਾਸ ਕਰਕੇ ਨਹਿਰੂ – ਇੰਦਰਾ ਨੇ ਦੇਸ਼ ਨੂੰ ਫਿਰਕੂ ਲੀਹਾਂ ਤੇ ਨਾ ਵੰਡਿਆਂ ਹੁੰਦਾ ਤਾਂ ਅੱਜ ਵਰਗੇ ਹਲਾਤ ਕਦੇ ਵੀ ਨਾ ਬਣਦੇ । ਅਜਾਦੀ ਬਾਅਦ ਧਰਮ – ਨਿਰਪੱਖ ਸੋਚ ਮਜਬੂਤ ਹੋਣੀ ਚਾਹੀਦੀ ਸੀ ਪਰ ਅਜਿਹਾ ਨਹੀ ਹੋ ਸਕਿਆ , ਜਿਸ ਦੇ ਸਿੱਟੇ ਵੱਜੋਂ ਘੱਟ ਗਿਣਤੀਆਂ ਨੂੰ ਹੁਕਮਰਾਨ ਬਰਬਾਦ ਕਰਨ ਤੇ ਤੁਲੇ ਹਨ।
