ਛੱਤੀਸਗੜ੍ਹ ਪੁਲਿਸ ਨੇ ਸ਼ਾਤਿਰ ਚੋਰ ਲੋਕੇਸ਼ ਸ਼੍ਰੀਵਾਸ ਅਤੇ ਉਸ ਦੇ ਸਾਥੀ ਸ਼ਿਵ ਚੰਦਰਵੰਸ਼ੀ ਨੂੰ 25 ਕਿਲੋ ਸੋਨੇ ਸਮੇਤ ਕਾਬੂ ਕੀਤਾ ਹੈ। ਪੁਲਿਸ ਨੇ ਲੋਕੇਸ਼ ਸ਼੍ਰੀਵਾਸ ਕੋਲੋਂ 25 ਕਿਲੋ ਸੋਨੇ ਤੋਂ ਇਲਾਵਾ ਨਕਦੀ ਅਤੇ ਹੋਰ ਗਹਿਣੇ ਵੀ ਬਰਾਮਦ ਕੀਤੇ ਹਨ। ਦੁਰਗ ਪੁਲੀਸ ਨੇ ਲੋਕੇਸ਼ ਨੂੰ ਕੋਹਕਾ ਤੋਂ ਹਿਰਾਸਤ ਵਿੱਚ ਲਿਆ ਹੈ। ਮੁਲਜ਼ਮ ਲੋਕੇਸ਼ ਨੇ ਪੁੱਛਗਿੱਛ ਦੌਰਾਨ ਦੱਸਿਆ ਕਿ ਉਹ ਦਿੱਲੀ ਦੇ ਜੰਗਪੁਰਾ ਇਲਾਕੇ ਵਿੱਚ ਗਹਿਣਿਆਂ ਦੇ ਸ਼ੋਅਰੂਮ ਵਿੱਚ ਕਰੀਬ 20 ਘੰਟੇ ਰੁਕਿਆ ਸੀ।
ਬਿਲਾਸਪੁਰ ਦੇ ਐਸਪੀ ਸੰਤੋਸ਼ ਸਿੰਘ ਅਨੁਸਾਰ ਐਂਟੀ ਕਰਾਈਮ ਅਤੇ ਸਾਈਬਰ ਯੂਨਿਟ ਅਤੇ ਥਾਣਾ ਸਿਵਲ ਲਾਈਨ ਦੀ ਪੁਲੀਸ ਸ਼ਹਿਰ ਵਿੱਚ ਚੋਰੀ ਦੀਆਂ ਕਈ ਘਟਨਾਵਾਂ ਦੀ ਜਾਂਚ ਕਰ ਰਹੀ ਸੀ। ਪੁਲੀਸ ਨੂੰ ਮੁਲਜ਼ਮਾਂ ਦੀ ਕਵਾਰਧਾ ਵਿੱਚ ਮੌਜੂਦਗੀ ਬਾਰੇ ਪਤਾ ਲੱਗਾ ਸੀ। ਇਸ ਤੋਂ ਬਾਅਦ ਬਿਲਾਸਪੁਰ ਪੁਲਸ ਨੇ ਬੁੱਧਵਾਰ 27 ਸਤੰਬਰ ਨੂੰ ਉਥੇ ਛਾਪਾ ਮਾਰ ਕੇ ਇਕ ਦੋਸ਼ੀ ਸ਼ਿਵ ਚੰਦਰਵੰਸ਼ੀ ਨੂੰ ਗ੍ਰਿਫਤਾਰ ਕਰ ਲਿਆ। ਸ਼ਿਵ ਕੋਲੋਂ 23 ਲੱਖ ਰੁਪਏ ਦੇ ਗਹਿਣੇ ਵੀ ਮਿਲੇ ਸਨ। ਹਾਲਾਂਕਿ ਲੋਕੇਸ਼ ਸ਼੍ਰੀਵਾਸ ਉਥੋਂ ਭੱਜਣ ‘ਚ ਕਾਮਯਾਬ ਹੋ ਗਿਆ। ਇਸ ਤੋਂ ਬਾਅਦ ਪੁਲਸ ਨੇ ਲੋਕੇਸ਼ ਨੂੰ ਦੁਰਗ ਦੇ ਸਮ੍ਰਿਤੀ ਨਗਰ ਇਲਾਕੇ ਤੋਂ ਗ੍ਰਿਫਤਾਰ ਕਰ ਲਿਆ।
ਦੱਸਿਆ ਜਾ ਰਿਹਾ ਹੈ ਕਿ ਇਹ ਬਰਾਮਦ ਕੀਤਾ ਗਿਆ ਸਾਰਾ ਸਮਾਨ ਦਿੱਲੀ ਵਿੱਚ ਹੋਈ ਚੋਰੀ ਦਾ ਹੈ। ਲੋਕੇਸ਼ ਬਿਲਾਸਪੁਰ ਅਤੇ ਰਾਜਨੰਦਗਾਓਂ ਪੁਲਿਸ ਨੂੰ ਵੀ ਲੋੜੀਂਦਾ ਸੀ। ਇਸ ਤੋਂ ਪਹਿਲਾਂ ਵੀ ਦੁਰਗ ਪੁਲਿਸ ਨੇ ਆਕਾਸ਼ਗੰਗਾ ਵਿੱਚ ਪਰਖ ਜਵੈਲਰਜ਼ ਵਿੱਚ ਹੋਈ ਚੋਰੀ ਦੇ ਮਾਮਲੇ ਵਿੱਚ ਲੋਕੇਸ਼ ਸ਼੍ਰੀਵਾਸ ਨੂੰ 100 ਫੀਸਦੀ ਸਮਾਨ ਸਮੇਤ ਗ੍ਰਿਫਤਾਰ ਕਰਨ ਵਿੱਚ ਸਫਲਤਾ ਹਾਸਲ ਕੀਤੀ ਸੀ।