ਛੱਤੀਸਗੜ੍ਹ ਦੇ ਜਸ਼ਪੁਰ ਜ਼ਿਲੇ ‘ਚ ਬੀਤੀ ਰਾਤ ਇਕ ਹਾਥੀ ਨੇ ਚਾਰ ਲੋਕਾਂ ਨੂੰ ਕੁਚਲ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ। ਮਰਨ ਵਾਲਿਆਂ ਵਿੱਚੋਂ ਤਿੰਨ ਇੱਕ ਹੀ ਪਰਿਵਾਰ ਨਾਲ ਸਬੰਧਤ ਹਨ। ਇਸ ਦੇ ਨਾਲ ਹੀ ਇੱਕ ਵਿਅਕਤੀ ਗੁਆਂਢ ਦਾ ਰਹਿਣ ਵਾਲਾ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਰਾਤ ਨੂੰ ਹਾਥੀ ਨੇ ਘਰ ਨੂੰ ਵੀ ਤਬਾਹ ਕਰ ਦਿੱਤਾ। ਇਹ ਘਟਨਾ ਬਗੀਚਾ ਨਗਰ ਪੰਚਾਇਤ ਦੇ ਗਮਹਰੀਆ ਇਲਾਕੇ ਦੀ ਹੈ। ਹਾਥੀ ਨੇ ਸ਼ੁੱਕਰਵਾਰ ਦੇਰ ਰਾਤ ਕਰੀਬ 12 ਵਜੇ ਹਮਲਾ ਕੀਤਾ।
ਜਾਣਕਾਰੀ ਅਨੁਸਾਰ ਘਰ ‘ਚ ਸੁੱਤੇ ਪਏ ਦੋ ਭਰਾਵਾਂ ਅਤੇ ਇਕ ਲੜਕੀ ਨੂੰ ਹਾਥੀ ਨੇ ਬੁਰੀ ਤਰਾਂ ਕੁਚਲ ਕੇ ਮਾਰ ਦਿੱਤਾ। ਰੌਲਾ ਸੁਣ ਕੇ ਜਦੋਂ ਗੁਆਂਢ ਦਾ ਇੱਕ ਨੌਜਵਾਨ ਬਾਹਰ ਆਇਆ ਤਾਂ ਉਸ ‘ਤੇ ਵੀ ਹਾਥੀ ਨੇ ਹਮਲਾ ਕਰ ਦਿੱਤਾ। ਮ੍ਰਿਤਕਾਂ ਵਿੱਚ ਰਾਮਕੇਸ਼ਵਰ ਸੋਨੀ (35 ਸਾਲ), ਉਸਦੀ ਧੀ ਰਵਿਤਾ ਸੋਨੀ (9 ਸਾਲ), ਰਾਮਕੇਸ਼ਵਰ ਦਾ ਭਰਾ ਅਜੈ ਸੋਨੀ (25 ਸਾਲ) ਅਤੇ ਗੁਆਂਢੀ ਅਸ਼ਵਿਨ ਕੁਜੂਰ (28 ਸਾਲ) ਸ਼ਾਮਲ ਹਨ।
ਡੀਐਫਓ ਜਿਤੇਂਦਰ ਉਪਾਧਿਆਏ ਨੇ ਦੱਸਿਆ ਕਿ ਜੰਗਲਾਤ ਵਿਭਾਗ ਅਤੇ ਹਥੀ ਮਿੱਤਰ ਦਲ ਲਗਾਤਾਰ ਹਾਥੀਆਂ ’ਤੇ ਨਜ਼ਰ ਰੱਖ ਰਹੇ ਹਨ ਪਰ ਜਿਸ ਹਾਥੀ ਨੇ ਹਮਲਾ ਕਕੀਤਾ ਹੈ, ਉਸ ਦੀ ਆਦਤ ਘਰਾਂ ਨੂੰ ਤੋੜਨ ਅਤੇ ਇਨਸਾਨਾਂ ’ਤੇ ਹਮਲਾ ਕਰਨ ਦੀ ਬਣ ਗਈ ਹੈ। ਜ਼ਿਲ੍ਹੇ ਵਿੱਚ 4 ਜੰਗਲੀ ਖੇਤਰਾਂ ਵਿੱਚ 38 ਹਾਥੀ ਘੁੰਮ ਰਹੇ ਹਨ। ਇਸ ਹਾਥੀ ਨੂੰ ਕਿਸੇ ਹੋਰ ਥਾਂ ਸ਼ਿਫਟ ਕਰਨ ਦੀ ਯੋਜਨਾ ਬਣਾਈ ਜਾ ਰਹੀ ਹੈ।
ਡੀਐਫਓ ਨੇ ਦੱਸਿਆ ਕਿ ਚਾਰੋਂ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਗਿਆ ਹੈ। ਇਸ ਦੇ ਨਾਲ ਹੀ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ 25-25 ਹਜ਼ਾਰ ਰੁਪਏ ਦੀ ਤੁਰੰਤ ਮੁਆਵਜ਼ਾ ਰਾਸ਼ੀ ਦਿੱਤੀ ਗਈ ਹੈ। ਭਵਿੱਖ ਵਿੱਚ ਵੀ ਉਨ੍ਹਾਂ ਦੀ ਮਦਦ ਕੀਤੀ ਜਾਵੇਗੀ।