ਜਾਪਾਨ ‘ਚ ਭਾਰੀ ਬਰਫਬਾਰੀ ਹੋ ਰਹੀ ਹੈ। ਇਸ ਕਾਰਨ 17 ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ 93 ਲੋਕ ਜ਼ਖਮੀ ਦੱਸੇ ਜਾ ਰਹੇ ਹਨ। ਆਮ ਤੌਰ ‘ਤੇ ਜਾਪਾਨ ਵਿੱਚ ਬਰਫ਼ਬਾਰੀ ਦੌਰਾਨ ਬਰਫ਼ ਇਕੱਠੀ ਨਹੀਂ ਹੁੰਦੀ ਹੈ। ਪਰ ਇਸ ਸਾਲ ਘਰਾਂ ਅਤੇ ਸੜਕਾਂ ‘ਤੇ 2 ਫੁੱਟ ਤੱਕ ਬਰਫ ਜਮ੍ਹਾਂ ਹੋ ਗਈ ਹੈ। ਇਸ ਕਾਰਨ ਕਈ ਵਾਹਨ ਫਸ ਗਏ। ਕਰੀਬ 20 ਹਜ਼ਾਰ ਘਰਾਂ ਦੀ ਬਿਜਲੀ ਵੀ ਗੁੱਲ ਹੋ ਗਈ ਹੈ।
ਜਾਪਾਨ ਡਿਜ਼ਾਸਟਰ ਮੈਨੇਜਮੈਂਟ ਏਜੰਸੀ ਮੁਤਾਬਿਕ 24 ਦਸੰਬਰ ਤੱਕ ਇਕ ਹਫਤੇ ਤੱਕ ਚੱਲੀ ਬਰਫਬਾਰੀ ‘ਚ 11 ਲੋਕਾਂ ਦੀ ਮੌਤ ਹੋ ਗਈ ਸੀ ਪਰ ਕ੍ਰਿਸਮਸ ‘ਤੇ ਬਰਫਬਾਰੀ ਤੇਜ਼ ਹੋ ਗਈ ਅਤੇ 7 ਲੋਕਾਂ ਦੀ ਮੌਤ ਹੋ ਗਈ। ਹੁਣ ਤੱਕ ਕੁੱਲ 17 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਇਨ੍ਹਾਂ ‘ਚੋਂ ਕਈ ਲੋਕ ਬਰਫ ਸਾਫ ਕਰਦੇ ਸਮੇਂ ਛੱਤ ਤੋਂ ਹੇਠਾਂ ਡਿੱਗ ਗਏ। ਨਾਗਈ ਸ਼ਹਿਰ ‘ਚ ਇਕ 70 ਸਾਲਾ ਔਰਤ ਦੀ ਉਸ ਸਮੇਂ ਮੌਤ ਹੋ ਗਈ ਜਦੋਂ ਉਸ ਦੇ ਘਰ ਦੀ ਛੱਤ ‘ਤੇ ਜੰਮੀ ਬਰਫ ਉਸ ‘ਤੇ ਡਿੱਗ ਗਈ।
ਇਸ ਨਾਲ ਆਵਾਜਾਈ ਵੀ ਕਾਫੀ ਪ੍ਰਭਾਵਿਤ ਹੋਈ ਹੈ। ਟੋਕੀਓ ਤੋਂ ਆਉਣ-ਜਾਣ ਵਾਲੀਆਂ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਪਟੜੀਆਂ ‘ਤੇ ਬਰਫ ਜਮ੍ਹਾਂ ਹੋ ਗਈ ਹੈ, ਇਸ ਕਾਰਨ ਕਈ ਟਰੇਨਾਂ ਵੀ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਜੰਮੀ ਬਰਫ ਕਾਰਨ ਸੜਕਾਂ ‘ਤੇ 20 ਕਿਲੋਮੀਟਰ ਤੱਕ ਜਾਮ ਦੇਖਣ ਨੂੰ ਮਿਲ ਰਿਹਾ ਹੈ।