ਆਈਏਐਸ ਟੀਨਾ ਡਾਬੀ ਅਤੇ ਪ੍ਰਦੀਪ ਗਵਾਂਡੇ ਅੱਜ ਵਿਆਹ ਦੇ ਬੰਧਨ ਵਿੱਚ ਬੱਝਣ ਜਾ ਰਹੇ ਹਨ। ਇਹ ਹਾਈ ਪ੍ਰੋਫਾਈਲ ਜੋੜਾ ਜੈਪੁਰ ਦੇ ਬਾਇਸ ਗੋਡਾਉਨ ਸਥਿਤ ਇੱਕ ਮਸ਼ਹੂਰ ਹੋਟਲ ਵਿੱਚ ਸਾਰੀਆਂ ਰਸਮਾਂ ਨਿਭਾਏਗਾ। ਜਨਮ ਜਨਮ ਦਾ ਸਾਥ ਦੇਣ ਦੀਆਂ ਕਸਮਾਂ ਤੇ ਵਾਅਦੇ ਹੋਣਗੇ। ਇਸ ਯਾਦਗਾਰੀ ਪਲ ‘ਚ ਸਿਰਫ਼ ਪਰਿਵਾਰਕ ਮੈਂਬਰ ਅਤੇ ਚੁਣੇ ਹੋਏ ਮਹਿਮਾਨ ਮੌਜੂਦ ਹੋਣਗੇ। ਵਿਆਹ ਦੀਆਂ ਰਸਮਾਂ ਤੋਂ ਬਾਅਦ 22 ਅਪ੍ਰੈਲ ਨੂੰ ਇਸ ਹੋਟਲ ‘ਚ ਰਿਸੈਪਸ਼ਨ ਰੱਖੀ ਗਈ ਹੈ।
ਟੀਨਾ ਅਤੇ ਪ੍ਰਦੀਪ ਦੇ ਪਰਿਵਾਰਕ ਮੈਂਬਰ ਵਿਆਹ ਵਿੱਚ ਸ਼ਾਮਲ ਹੋਣ ਲਈ ਜੈਪੁਰ ਪਹੁੰਚ ਚੁੱਕੇ ਹਨ। ਹੋਟਲ ਵਿੱਚ ਮਹਿਮਾਨਾਂ ਲਈ 50 ਤੋਂ ਵੱਧ ਕਮਰੇ ਬੁੱਕ ਕੀਤੇ ਗਏ ਹਨ। ਟੀਨਾ ਅਤੇ ਪ੍ਰਦੀਪ ਦਾ ਵਿਆਹ ਮਰਾਠੀ-ਰਾਜਸਥਾਨੀ ਰੀਤੀ-ਰਿਵਾਜਾਂ ਨਾਲ ਹੋਵੇਗਾ। ਪ੍ਰਦੀਪ ਗਵਾਂਡੇ ਦਾ ਪਰਿਵਾਰ ਮਰਾਠੀ ਹੈ। ਟੀਨਾ ਡਾਬੀ ਦੀ ਮਾਂ ਮਰਾਠੀ ਅਤੇ ਪਿਤਾ ਰਾਜਸਥਾਨੀ ਹਨ, ਇਸ ਲਈ ਵਿਆਹ ਦੀਆਂ ਰਸਮਾਂ ਵਿੱਚ ਮਰਾਠੀ ਅਤੇ ਰਾਜਸਥਾਨੀ ਪਰੰਪਰਾਵਾਂ ਦਾ ਵਧੀਆ ਮਿਸ਼ਰਣ ਹੋਵੇਗਾ। ਇਸ ਦੇ ਲਈ ਹੋਟਲ ‘ਚ ਖਾਸ ਤਿਆਰੀਆਂ ਕੀਤੀਆਂ ਗਈਆਂ ਹਨ।
ਦੱਸ ਦਈਏ ਕਿ ਟੀਨਾ ਡਾਬੀ ਇਸ ਸਮੇਂ ਵਿੱਤ ਵਿਭਾਗ ਵਿੱਚ ਸੰਯੁਕਤ ਸਕੱਤਰ ਹੈ। ਉਸ ਦਾ ਮੰਗੇਤਰ ਪ੍ਰਦੀਪ ਗਵਾਂਡੇ ਉੱਚ ਸਿੱਖਿਆ ਵਿਭਾਗ ਵਿੱਚ ਸੰਯੁਕਤ ਸਕੱਤਰ ਹੈ। ਦੋਵਾਂ ਨੇ ਹਾਲ ਹੀ ‘ਚ ਸੋਸ਼ਲ ਮੀਡੀਆ ‘ਤੇ ਆਪਣੇ ਰਿਸ਼ਤੇ ਦਾ ਖੁਲਾਸਾ ਕੀਤਾ ਹੈ। ਟੀਨਾ ਡਾਬੀ ਨਾਲ ਵਿਆਹ ਦੇ ਐਲਾਨ ਤੋਂ ਬਾਅਦ ਪ੍ਰਦੀਪ ਗਵਾਂਡੇ ਦੇ ਫਾਲੋਅਰਸ ਵੀ ਤੇਜ਼ੀ ਨਾਲ ਵਧੇ ਹਨ। ਟੀਨਾ ਅਤੇ ਪ੍ਰਦੀਪ ਨੇ ਆਪਣੇ ਵਿਆਹ ਦੀ ਜਾਣਕਾਰੀ ਜਨਤਕ ਕਰਨ ਤੋਂ ਬਾਅਦ ਇੰਸਟਾਗ੍ਰਾਮ ‘ਤੇ ਤਸਵੀਰਾਂ ਵੀ ਸ਼ੇਅਰ ਕੀਤੀਆਂ ਸਨ। ਪਰ ਇਸ ‘ਤੇ ਕਈ ਲੋਕਾਂ ਨੇ ਟੀਨਾ ਨੂੰ ਟ੍ਰੋਲ ਕਰਨਾ ਵੀ ਸ਼ੁਰੂ ਕਰ ਦਿੱਤਾ ਸੀ। ਕੁਝ ਦਿਨਾਂ ਬਾਅਦ ਦੋਵਾਂ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ਡਿਲੀਟ ਕਰ ਦਿੱਤੇ।