ਇੰਡੋਨੇਸ਼ੀਆ ਨੇ ਦੇਸ਼ ਵਿੱਚ ਸਾਰੇ ਸੀਰਪ ਅਤੇ ਤਰਲ ਦਵਾਈਆਂ ਦੀ ਵਿਕਰੀ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਸਰਕਾਰ ਨੇ ਇਹ ਫੈਸਲਾ 99 ਬੱਚਿਆਂ ਦੀ ਮੌਤ ਤੋਂ ਬਾਅਦ ਲਿਆ ਹੈ। ਜਾਣਕਾਰੀ ਅਨੁਸਾਰ ਇਨ੍ਹਾਂ ਬੱਚਿਆਂ ਨੂੰ ਪੀਣ ਵਾਲੀ ਦਵਾਈ ਦਿੱਤੀ ਗਈ ਸੀ ਅਤੇ ਸ਼ੱਕ ਹੈ ਕਿ ਇਨ੍ਹਾਂ ਤਰਲ ਦਵਾਈਆਂ ਕਾਰਨ ਬੱਚਿਆਂ ਨੂੰ ਐਕਿਊਟ ਕਿਡਨੀ ਇੰਜਰੀ (ਏ.ਕੇ.ਆਈ.) ਹੋਈ ਸੀ। ਦੱਸ ਦਈਏ ਕਿ ਸਾਲ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ 20 ਰਾਜਾਂ ਵਿੱਚ ਇਸ ਬਿਮਾਰੀ ਦੇ 206 ਮਾਮਲੇ ਸਾਹਮਣੇ ਆਏ ਹਨ।
ਇੰਡੋਨੇਸ਼ੀਆ ਦੇ ਸਿਹਤ ਮੰਤਰਾਲੇ ਦੇ ਬੁਲਾਰੇ ਨੇ ਜਾਣਕਾਰੀ ਦਿੱਤੀ ਕਿ ਸਰਕਾਰ ਨੇ ਦੇਸ਼ ਦੇ ਸਾਰੇ ਹਸਪਤਾਲਾਂ, ਸਿਹਤ ਕਰਮਚਾਰੀਆਂ ਅਤੇ ਦਵਾਈਆਂ ਦੀਆਂ ਦੁਕਾਨਾਂ ਨੂੰ ਫਿਲਹਾਲ ਸੀਰਪ ਨਾ ਵੇਚਣ ਲਈ ਕਿਹਾ ਹੈ। ਹੁਣ ਇਹ ਦਵਾਈਆਂ ਪਰਚੀ ਹੋਣ ਦੇ ਬਾਵਜੂਦ ਵੀ ਨਹੀਂ ਖਰੀਦੀਆਂ ਜਾ ਸਕਣਗੀਆਂ ਦੱਸ ਦਈਏ ਕਿ ਇਸ ਸਾਲ ਜਨਵਰੀ ਤੋਂ ਸ਼ੁਰੂ ਹੋਏ ਕੇਸ ਅਗਸਤ ਦੇ ਅੰਤ ਤੱਕ ਕਾਫੀ ਵਧ ਗਏ ਹਨ। ਇਸ ਤੋਂ ਬਾਅਦ ਸਿਹਤ ਮੰਤਰਾਲੇ ਅਤੇ ਬਾਲ ਰੋਗ ਵਿਗਿਆਨੀ ਐਸੋਸੀਏਸ਼ਨ ਨੇ ਮਾਹਿਰਾਂ ਦੀ ਟੀਮ ਬਣਾ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ। ਇਸ ਸਮੇਂ ਰਾਜਧਾਨੀ ਜਕਾਰਤਾ ਵਿੱਚ ਇਸ ਬਿਮਾਰੀ ਦੇ 65% ਮਰੀਜ਼ਾਂ ਦਾ ਇਲਾਜ ਚੱਲ ਰਿਹਾ ਹੈ।