ਮੁੰਬਈ ਦੀ ਇੱਕ ਮਹਿਲਾ ਡਾਕਟਰ ਨੂੰ ਆਨਲਾਈਨ ਘੁਟਾਲੇ ਵਿੱਚ ਇੱਕ ਲੱਖ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਰਿਪੋਰਟ ਮੁਤਾਬਕ ਡਾਕਟਰ ਨੇ ਇਕ ਆਨਲਾਈਨ ਲਿਪਸਟਿਕ ਆਰਡਰ ਕੀਤੀ ਸੀ ਜਿਸ ਦੀ ਕੀਮਤ 300 ਰੁਪਏ ਸੀ। ਆਰਡਰ ਤੋਂ ਬਾਅਦ ਮਹਿਲਾ ਡਾਕਟਰ ਦੇ ਮੋਬਾਈਲ ‘ਤੇ ਡਿਲੀਵਰੀ ਮੈਸੇਜ ਆਇਆ ਪਰ ਉਸ ਦੀ ਲਿਪਸਟਿਕ ਦੀ ਡਿਲੀਵਰੀ ਨਹੀਂ ਹੋਈ ਸੀ।
ਮੈਸੇਜ ‘ਚ ਕਿਹਾ ਗਿਆ ਸੀ ਕਿ ਕਸਟਮਰ ਕੇਅਰ ਐਗਜ਼ੀਕਿਊਟਿਵ ਤੁਹਾਡੇ ਆਰਡਰ ਦੇ ਸਬੰਧ ‘ਚ ਗੱਲ ਕਰਨਾ ਚਾਹੁੰਦੇ ਹਨ। ਜਲਦੀ ਹੀ ਇੱਕ ਕਾਲ ਆਵੇਗੀ। ਕਾਲ ਕਰਨ ‘ਤੇ ਔਰਤ ਨੂੰ ਦੱਸਿਆ ਗਿਆ ਕਿ ਉਸ ਦੀ ਡਿਲੀਵਰੀ ਰੋਕ ਦਿੱਤੀ ਗਈ ਹੈ ਅਤੇ ਉਸ ਨੂੰ ਪ੍ਰੋਸੈਸਿੰਗ ਲਈ 2 ਰੁਪਏ ਦੇਣੇ ਪੈਣਗੇ।
ਪੇਮੈਂਟ ਲਈ ਮਹਿਲਾ ਡਾਕਟਰ ਦੇ ਫੋਨ ‘ਤੇ ਇਕ ਵੈੱਬ ਲਿੰਕ ਆਇਆ ਜਿਸ ‘ਚ ਬੈਂਕ ਖਾਤੇ ਦੀ ਜਾਣਕਾਰੀ ਮੰਗੀ ਗਈ। ਔਰਤ ਨੇ ਭਰੋਸਾ ਕੀਤਾ ਅਤੇ ਲਿੰਕ ‘ਤੇ ਕਲਿੱਕ ਕਰਕੇ ਬੈਂਕ ਦਾ ਵੇਰਵਾ ਦਿੱਤਾ। ਇਸ ਤੋਂ ਬਾਅਦ ਔਰਤ ਦੇ ਫੋਨ ‘ਚ ਇਕ ਐਪ ਰਾਹੀਂ ਉਸ ਦੇ ਖਾਤੇ ‘ਚੋਂ 2 ਵਾਰ 95,000 ਅਤੇ 5000 ਰੁਪਏ ਕਢਵਾ ਲਏ ਗਏ।