ਗੰਗਾ ਵਿਲਾਸ ਕਰੂਜ਼ ਯੂਪੀ ਦੇ ਵਾਰਾਣਸੀ ਤੋਂ ਅਸਮ ਲਈ ਰਵਾਨਾ ਹੋ ਗਿਆ ਹੈ। ਪੀਐਮ ਮੋਦੀ ਨੇ ਗੰਗਾ ਵਿਲਾਸ ਕਰੂਜ਼ ਨੂੰ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ। ਗੰਗਾ ਵਿਲਾਸ ਕਰੂਜ਼ 3 ਹਜ਼ਾਰ ਕਿਲੋਮੀਟਰ ਤੋਂ ਵੱਧ ਦਾ ਸਫਰ ਕਰੇਗਾ।ਦੱਸ ਦਈਏ ਕਿ ਪੀਐਮ ਮੋਦੀ ਨੇ ਵੀਡੀਓ ਕਾਨਫਰੰਸਿੰਗ ਰਾਹੀਂ ਗੰਗਾ ਵਿਲਾਸ ਨੂੰ ਹਰੀ ਝੰਡੀ ਦਿਖਾਈ। ਪੀਐਮ ਨੇ ਆਪਣੇ ਸੰਬੋਧਨ ਵਿੱਚ ਕਿਹਾ – ਮੈਂ ਸਾਰੇ ਵਿਦੇਸ਼ੀ ਸੈਲਾਨੀਆਂ ਦਾ ਸਵਾਗਤ ਕਰਦਾ ਹਾਂ। ਅੱਜ ਤੋਂ ਸਾਰੇ ਸੈਲਾਨੀ ਪਹਿਲੀ ਵਾਰ ਆਧੁਨਿਕ ਕਰੂਜ਼ ‘ਤੇ ਯਾਤਰਾ ਕਰਨ ਜਾ ਰਹੇ ਹਨ। ਪ੍ਰਧਾਨ ਮੰਤਰੀ ਨੇ ਕਿਹਾ- ਭਾਰਤ ਕੋਲ ਸਭ ਕੁਝ ਹੈ। ਭਾਰਤ ਸਾਰਿਆਂ ਦਾ ਨਿੱਘਾ ਸਵਾਗਤ ਕਰਦਾ ਹੈ। ਇਹ ਕਰੂਜ਼ ਯਾਤਰਾ ਕਈ ਅਨੁਭਵ ਲੈ ਕੇ ਆਵੇਗਾ।
ਉਨ੍ਹਾਂ ਕਿਹਾ ਕਰੂਜ਼ ਟੂਰਿਜ਼ਮ ਦਾ ਇਹ ਨਵਾਂ ਦੌਰ ਸਾਡੇ ਨੌਜਵਾਨਾਂ ਨੂੰ ਰੁਜ਼ਗਾਰ ਦੇਵੇਗਾ। ਪਹਿਲਾਂ ਦੇਸ਼ ਦੇ ਲੋਕ ਅਜਿਹੇ ਤਜ਼ਰਬੇ ਲਈ ਵਿਦੇਸ਼ ਜਾਂਦੇ ਸਨ ਪਰ ਹੁਣ ਉਹ ਇਹ ਤਜਰਬਾ ਦੇਸ਼ ਵਿਚ ਹੀ ਹਾਸਲ ਕਰ ਸਕਦੇ ਹਨ। ਅਸੀਂ ਕਈ ਸ਼ਹਿਰਾਂ ਵਿੱਚ ਅਜਿਹੀ ਪ੍ਰਣਾਲੀ ਲਾਗੂ ਕਰਨ ਜਾ ਰਹੇ ਹਾਂ।
ਇਸ ਦੇ ਨਾਲ ਹੀ ਪੀ ਐਮ ਮੋਦੀ ਨੇ ਗੰਗਾ ਦੇ ਪਾਰ ਬਣੇ ਟੈਂਟ ਸਿਟੀ ਦਾ ਵੀ ਉਦਘਾਟਨ ਕੀਤਾ। ਟੈਂਟ ਸਿਟੀ ਬਾਰੇ, ਪੀਐਮ ਨੇ ਕਿਹਾ – ਇਹ ਭਾਰਤ ਦੇ ਵਿਕਾਸ ਦੀ ਇੱਕ ਉਦਾਹਰਣ ਹੈ। ਇਹ ਨਵੇਂ ਭਾਰਤ ਦੇ ਵਿਕਾਸ ਦਾ ਪ੍ਰਤੀਬਿੰਬ ਹੈ। ਗੰਗਾ ਵਿਲਾਸ ਦੀ ਸ਼ੁਰੂਆਤ ਸਧਾਰਨ ਨਹੀਂ ਹੈ। 32000 ਕਿਲੋਮੀਟਰ ਤੋਂ ਵੱਧ ਦਾ ਇਹ ਜਲ ਮਾਰਗ ਦਰਿਆਈ ਸਰੋਤਾਂ ਲਈ ਇੱਕ ਮਿਸਾਲ ਹੈ। 2014 ਤੋਂ ਭਾਰਤ ਇਸ ਪ੍ਰਾਚੀਨ ਸ਼ਕਤੀ ਨੂੰ ਆਪਣੀ ਮਹਾਨ ਸ਼ਕਤੀ ਬਣਾਉਣ ਵਿੱਚ ਲੱਗਾ ਹੋਇਆ ਹੈ। 2014 ਵਿੱਚ, ਦੇਸ਼ ਵਿੱਚ ਸਿਰਫ ਪੰਜ ਰਾਸ਼ਟਰੀ ਜਲ ਮਾਰਗ ਸਨ। ਅੱਜ 24 ਰਾਜਾਂ ਵਿੱਚ 111 ਰਾਸ਼ਟਰੀ ਜਲ ਮਾਰਗਾਂ ਨੂੰ ਵਿਕਸਤ ਕਰਨ ਦਾ ਕੰਮ ਚੱਲ ਰਿਹਾ ਹੈ।