ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 20 ਜੂਨ, 2023 ਨੂੰ ਆਪਣੀ 6 ਦਿਨਾਂ ਸਰਕਾਰੀ ਵਿਦੇਸ਼ ਯਾਤਰਾ ‘ਤੇ ਰਵਾਨਾ ਹੋ ਗਏ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 24 ਜੂਨ ਤੱਕ ਅਮਰੀਕਾ ‘ਚ ਰਹਿਣਗੇ, ਜਿਸ ਤੋਂ ਬਾਅਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 24 ਜੂਨ ਨੂੰ ਹੀ ਮਿਸਰ ਲਈ ਰਵਾਨਾ ਹੋਣਗੇ। ਵਿਦੇਸ਼ ਮੰਤਰਾਲੇ ਦੇ ਅਨੁਸਾਰ, ਪੀਐਮ ਮੋਦੀ ਮਿਸਰ ਦੇ ਰਾਸ਼ਟਰਪਤੀ ਅਬਦੁਲ ਫਤਿਹ ਅਲ-ਸੀਸੀ ਦੇ ਸੱਦੇ ‘ਤੇ ਕਾਹਿਰਾ ਜਾਣਗੇ।
ਇੱਥੇ ਉਹ ਮਿਸਰ ਦੇ ਰਾਸ਼ਟਰਪਤੀ ਅਬਦੁਲ ਫਤਿਹ ਅਲ-ਸੀਸੀ ਨਾਲ ਮੁਲਾਕਾਤ ਕਰਨਗੇ। ਦੱਸ ਦੇਈਏ ਕਿ ਹਾਲ ਹੀ ‘ਚ ਸ਼੍ਰੀਨਗਰ ‘ਚ ਜੀ-20 ਵਰਕਿੰਗ ਗਰੁੱਪ ਦੀ ਬੈਠਕ ਹੋਈ ਸੀ। ਪਾਕਿਸਤਾਨ ਦੇ ਕਹਿਣ ‘ਤੇ ਚੀਨ, ਤੁਰਕੀ ਅਤੇ ਸਾਊਦੀ ਅਰਬ ਦੇ ਨਾਲ-ਨਾਲ ਮਿਸਰ ਨੇ ਇਸ ‘ਚ ਹਿੱਸਾ ਨਹੀਂ ਲਿਆ। ਅਜਿਹੇ ‘ਚ ਪੀਐੱਮ ਮੋਦੀ ਦਾ ਮਿਸਰ ਦਾ ਦੌਰਾ ਕਾਫੀ ਅਹਿਮ ਹੋ ਗਿਆ ਹੈ।
ਦੱਸ ਦਈਏ ਕਿ ਦੋਵਾਂ ਦੇਸ਼ਾਂ ਵਿਚਾਲੇ ਕਰੀਬ ਸੱਤ ਅਰਬ ਡਾਲਰ ਦਾ ਵਪਾਰ ਹੈ। ਜਦੋਂ ਅਲ ਸਿਸੀ ਨੇ ਇਸ ਸਾਲ ਜਨਵਰੀ ‘ਚ ਭਾਰਤ ਦਾ ਦੌਰਾ ਕੀਤਾ ਸੀ ਤਾਂ ਦੋਹਾਂ ਦੇਸ਼ਾਂ ਨੇ ਵਪਾਰ ਨੂੰ 7 ਅਰਬ ਡਾਲਰ ਤੋਂ ਵਧਾ ਕੇ 12 ਅਰਬ ਡਾਲਰ ਕਰਨ ਦੇ ਸਮਝੌਤੇ ‘ਤੇ ਦਸਤਖਤ ਕੀਤੇ ਸਨ। ਇੰਨਾ ਹੀ ਨਹੀਂ ਪਹਿਲੀ ਵਾਰ ਸਾਂਝਾ ਫੌਜੀ ਅਭਿਆਸ ਵੀ ਕੀਤਾ ਗਿਆ। ਮਿਸਰ ਨੇ ਭਾਰਤ ਤੋਂ ਤੇਜਸ ਲੜਾਕੂ ਜਹਾਜ਼, ਰਾਡਾਰ, ਮਿਲਟਰੀ ਹੈਲੀਕਾਪਟਰ ਅਤੇ ਆਕਾਸ਼ ਮਿਜ਼ਾਈਲ ਸਿਸਟਮ ਖਰੀਦਣ ਵਿੱਚ ਵੀ ਦਿਲਚਸਪੀ ਦਿਖਾਈ ਸੀ। ਇਸ ਸਮੇਂ 42 ਦੇਸ਼ ਹਨ ਜੋ ਭਾਰਤ ਤੋਂ ਰੱਖਿਆ ਉਤਪਾਦ ਖਰੀਦਦੇ ਹਨ। ਦੋਵੇਂ ਦੇਸ਼ ਡਾਲਰ ਤੋਂ ਇਲਾਵਾ ਹੋਰ ਮੁਦਰਾਵਾਂ ਵਿੱਚ ਵਪਾਰ ਕਰਨ ਲਈ ਵੀ ਗੱਲਬਾਤ ਕਰ ਰਹੇ ਹਨ।