- ਪਛਾਣ ਬਦਲ ਕੇ ਦਿੱਤੀ ਸੀ ਪ੍ਰੀਖਿਆ
ਨਵੀਂ ਦਿੱਲੀ, 1 ਅਗਸਤ 2024 – ਟਰੇਨੀ IAS ਪੂਜਾ ਖੇਡਕਰ ਹੁਣ ਅਧਿਕਾਰੀ ਨਹੀਂ ਰਹੀ। UPSC ਨੇ ਬੁੱਧਵਾਰ 31 ਜੁਲਾਈ ਨੂੰ ਉਸਦੀ ਚੋਣ ਰੱਦ ਕਰ ਦਿੱਤੀ ਅਤੇ ਕਿਹਾ ਕਿ ਉਹ ਭਵਿੱਖ ਵਿੱਚ ਕੋਈ ਵੀ UPSC ਪ੍ਰੀਖਿਆ ਨਹੀਂ ਦੇ ਸਕੇਗੀ।
ਪੂਜਾ ‘ਤੇ ਆਪਣੀ ਉਮਰ ਬਦਲਣ, ਮਾਤਾ-ਪਿਤਾ ਬਾਰੇ ਗਲਤ ਜਾਣਕਾਰੀ ਦੇਣ ਅਤੇ ਪਛਾਣ ਬਦਲ ਕੇ ਨਿਰਧਾਰਤ ਸੀਮਾ ਤੋਂ ਵੱਧ ਵਾਰ ਸਿਵਲ ਸੇਵਾਵਾਂ ਪ੍ਰੀਖਿਆ ਦੇਣ ਦਾ ਦੋਸ਼ ਸੀ। ਦਸਤਾਵੇਜ਼ਾਂ ਦੀ ਜਾਂਚ ਕਰਨ ਤੋਂ ਬਾਅਦ, UPSC ਨੇ ਪੂਜਾ ਨੂੰ CSE-2022 ਨਿਯਮਾਂ ਦੀ ਉਲੰਘਣਾ ਕਰਨ ਦਾ ਦੋਸ਼ੀ ਪਾਇਆ। ਪੂਜਾ ਨੇ 2022 ਦੀ ਪ੍ਰੀਖਿਆ ਵਿੱਚ 841ਵਾਂ ਰੈਂਕ ਹਾਸਲ ਕੀਤਾ ਸੀ। ਉਹ 2023 ਬੈਚ ਦੀ ਟ੍ਰੇਨੀ ਆਈ.ਏ.ਐਸ.ਹੈ ਅਤੇ ਉਹ ਜੂਨ 2024 ਤੋਂ ਸਿਖਲਾਈ ਲੈ ਰਹੀ ਸੀ।
ਯੂਪੀਐਸਸੀ ਨੇ ਕਿਹਾ ਕਿ ਪਛਾਣ ਬਦਲਣ ਅਤੇ ਸਿਵਲ ਸੇਵਾਵਾਂ ਦੀ ਪ੍ਰੀਖਿਆ ਨਿਰਧਾਰਤ ਸੀਮਾ ਤੋਂ ਵੱਧ ਦੇਣ ਲਈ 18 ਜੁਲਾਈ ਨੂੰ ਕਾਰਨ ਦੱਸੋ ਨੋਟਿਸ (ਐਸਸੀਐਨ) ਜਾਰੀ ਕੀਤਾ ਗਿਆ ਸੀ। ਇਸ ਵਿਚ ਕਿਹਾ ਗਿਆ ਹੈ ਕਿ ਪੂਜਾ ਨੇ 25 ਜੁਲਾਈ ਤੱਕ ਆਪਣਾ ਜਵਾਬ ਦੇਣਾ ਸੀ, ਪਰ ਉਸ ਨੇ ਆਪਣੇ ਜਵਾਬ ਲਈ ਜ਼ਰੂਰੀ ਦਸਤਾਵੇਜ਼ ਇਕੱਠੇ ਕਰਨ ਲਈ 4 ਅਗਸਤ ਤੱਕ ਦਾ ਸਮਾਂ ਮੰਗਿਆ। ਕਮਿਸ਼ਨ ਨੇ ਕਿਹਾ, ਇਸ ਨੇ ਉਨ੍ਹਾਂ ਨੂੰ 30 ਜੁਲਾਈ ਨੂੰ ਦੁਪਹਿਰ 3:30 ਵਜੇ ਤੱਕ ਦਾ ਸਮਾਂ ਦਿੱਤਾ, ਪਰ ਉਸ ਨੇ ਕੋਈ ਜਵਾਬ ਨਹੀਂ ਦਿੱਤਾ।
ਖੇਡਕਰ ਦੇ ਮਾਮਲੇ ਦੇ ਕਾਰਨ, ਯੂਪੀਐਸਸੀ ਨੇ 2009 ਤੋਂ 2023 ਤੱਕ 15,000 ਤੋਂ ਵੱਧ ਸਿਫਾਰਿਸ਼ ਕੀਤੇ ਉਮੀਦਵਾਰਾਂ ਦੇ ਡੇਟਾ ਦੀ ਜਾਂਚ ਕੀਤੀ। ਇਹ ਪਾਇਆ ਗਿਆ ਕਿ ਉਸ ਤੋਂ ਇਲਾਵਾ, ਕਿਸੇ ਹੋਰ ਉਮੀਦਵਾਰ ਨੇ ਸੀਐਸਈ ਨਿਯਮਾਂ ਦੇ ਤਹਿਤ ਨਿਰਧਾਰਤ ਸੰਖਿਆ ਤੋਂ ਵੱਧ ਕੋਸ਼ਿਸ਼ਾਂ ਨਹੀਂ ਕੀਤੀਆਂ ਸਨ। ਮਿਸ ਪੂਜਾ ਮਨੋਰਮਾ ਦਿਲੀਪ ਖੇਡਕਰ ਦਾ ਮਾਮਲਾ ਹੀ ਸੀ। ਉਹ ਨਾ ਸਿਰਫ਼ ਆਪਣਾ ਨਾਂ ਸਗੋਂ ਆਪਣੇ ਮਾਤਾ-ਪਿਤਾ ਦੇ ਨਾਂ ਵੀ ਕਈ ਵਾਰ ਬਦਲ ਕੇ ਪ੍ਰੀਖਿਆ ਲਈ ਹਾਜ਼ਰ ਹੋਈ ਸੀ, ਇਸ ਲਈ UPSC ਦੀ ਸਟੈਂਡਰਡ ਓਪਰੇਟਿੰਗ ਪ੍ਰਕਿਰਿਆ (SOP) ਉਸ ਦੀਆਂ ਕੋਸ਼ਿਸ਼ਾਂ ਦੀ ਗਿਣਤੀ ਨੂੰ ਟਰੈਕ ਨਹੀਂ ਕਰ ਸਕੀ। UPSC ਆਪਣੀ SOP ਨੂੰ ਹੋਰ ਮਜ਼ਬੂਤ ਕਰਨ ਦੀ ਪ੍ਰਕਿਰਿਆ ਵਿੱਚ ਹੈ ਤਾਂ ਜੋ ਭਵਿੱਖ ਵਿੱਚ ਅਜਿਹੇ ਮਾਮਲੇ ਦੁਬਾਰਾ ਨਾ ਹੋਣ।
