ਸੀਨੀਅਰ ਨਾਗਰਿਕਾਂ ਨੂੰ ਰੇਲ ਟਿਕਟਾਂ ‘ਚ ਮਿਲਣ ਵਾਲੀਆਂ ਰਿਆਇਤਾਂ ਨੂੰ ਲੈ ਕੇ ਕਈ ਪਾਸਿਆਂ ਤੋਂ ਆਲੋਚਨਾ ਦਾ ਸਾਹਮਣਾ ਕਰ ਰਿਹਾ ਰੇਲਵੇ ਫਿਲਹਾਲ ਇਨ੍ਹਾਂ ਰਿਆਇਤਾਂ ਨੂੰ ਬਹਾਲ ਨਹੀਂ ਕਰ ਰਿਹਾ ਹੈ। ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਬੁੱਧਵਾਰ ਨੂੰ ਲੋਕ ਸਭਾ ਵਿੱਚ ਬੋਲਦੇ ਹੋਏ ਇਹ ਸੰਕੇਤ ਦਿੱਤਾ ਹੈ।
ਸੀਨੀਅਰ ਨਾਗਰਿਕਾਂ ਨੂੰ ਰੇਲ ਯਾਤਰਾ ‘ਚ ਰਿਆਇਤ ਕਦੋ ਤੋਂ ਮਿਲੇਗੀ, ਇਸ ‘ਤੇ ਪ੍ਰਤੀਕਿਰਿਆ ਦਿੰਦੇ ਹੋਏ ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਲੋਕ ਸਭਾ ਵਿੱਚ ਕਿਹਾ ਕਿ ਪਿਛਲੇ ਸਾਲ ਰੇਲਵੇ ਨੇ ਯਾਤਰੀ ਸੇਵਾਵਾਂ ਲਈ 59,000 ਕਰੋੜ ਰੁਪਏ ਦੀ ਸਬਸਿਡੀ ਦਿੱਤੀ ਹੈ। ਇਹ ਬਹੁਤ ਵੱਡੀ ਰਕਮ ਹੈ ਅਤੇ ਕੁਝ ਰਾਜਾਂ ਦੇ ਸਾਲਾਨਾ ਬਜਟ ਤੋਂ ਵੀ ਵੱਡੀ ਹੈ। ਨਾਲ ਹੀ, ਰੇਲਵੇ ਦਾ ਸਾਲਾਨਾ ਪੈਨਸ਼ਨ ਬਿੱਲ 60,000 ਕਰੋੜ ਰੁਪਏ ਅਤੇ ਤਨਖਾਹ ਦਾ ਬਿੱਲ 97,000 ਕਰੋੜ ਰੁਪਏ ਹੈ, ਜਦੋਂ ਕਿ 40,000 ਕਰੋੜ ਰੁਪਏ ਬਾਲਣ ‘ਤੇ ਖਰਚ ਕੀਤੇ ਜਾ ਰਹੇ ਹਨ। ਰੇਲ ਮੰਤਰੀ ਨੇ ਕਿਹਾ ਕਿ ਰੇਲਵੇ ਨਵੀਆਂ ਸਹੂਲਤਾਂ ਲਿਆ ਰਿਹਾ ਹੈ। ਅਜਿਹੇ ‘ਚ ਜੇਕਰ ਕੋਈ ਨਵਾਂ ਫੈਸਲਾ ਲੈਣਾ ਪਿਆ ਤਾਂ ਅਸੀਂ ਲਵਾਂਗੇ ਪਰ ਫਿਲਹਾਲ ਰੇਲਵੇ ਦੀ ਹਾਲਤ ‘ਤੇ ਸਾਰਿਆਂ ਨੂੰ ਗੌਰ ਕਰਨਾ ਚਾਹੀਦਾ ਹੈ।