ਉੱਤਰੀ ਮੱਧ ਰੇਲਵੇ ਦੇ ਝਾਂਸੀ ਡਿਵੀਜ਼ਨ ਦਾ ਅਜੀਬ ਕਾਰਨਾਮਾ ਸਾਹਮਣੇ ਆਇਆ ਹੈ। ਝਾਂਸੀ ਰੇਲਵੇ ਡਿਵੀਜ਼ਨ ਦੇ ਸੀਨੀਅਰ ਸੈਕਸ਼ਨ ਇੰਜੀਨੀਅਰ ਨੇ ਬਜਰੰਗ ਬਲੀ ਨੂੰ ਟ੍ਰੈਕ ਦੇ ਪਾਸੇ ਬਣੇ ਮੰਦਰ ਨੂੰ ਲੈ ਕੇ ਸਿੱਧਾ ਨੋਟਿਸ ਜਾਰੀ ਕੀਤਾ ਹੈ। ਦੋਸ਼ ਹੈ ਕਿ ਬਜਰੰਗ ਬਲੀ ਨੇ ਰੇਲਵੇ ਦੀ ਜ਼ਮੀਨ ‘ਤੇ ਕਬਜ਼ਾ ਕਰਕੇ ਆਪਣਾ ਘਰ ਬਣਾਇਆ ਹੈ। ਬਜਰੰਗ ਬਲੀ ਦੇ ਨਾ ‘ਤੇ ਰੇਲਵੇ ਨੇ ਇਹ ਨੋਟਿਸ ਮੰਦਰ ਦੀ ਕੰਧ ‘ਤੇ ਚਿਪਕਾਇਆ ਹੈ। ਚਿਤਾਵਨੀ ਦਿੱਤੀ ਗਈ ਹੈ ਕਿ ਜੇਕਰ ਉਹ ਖੁਦ ਇਕ ਹਫਤੇ ਦੇ ਅੰਦਰ-ਅੰਦਰ ਆਪਣਾ ਘਰ ਨਹੀਂ ਹਟਾਉਂਦੇ ਤਾਂ ਰੇਲਵੇ ਵੱਲੋਂ ਇਸ ਨੂੰ ਹਟਾ ਦਿੱਤਾ ਜਾਵੇਗਾ।
ਰੇਲਵੇ ਦਾ ਇਹ ਨੋਟਿਸ ਇਸ ਸਮੇਂ ਸੋਸ਼ਲ ਮੀਡੀਆ ‘ਤੇ ਕਾਫੀ ਵਾਇਰਲ ਹੋ ਰਿਹਾ ਹੈ।ਦੱਸ ਦੇਈਏ ਕਿ ਉੱਤਰੀ ਮੱਧ ਰੇਲਵੇ (ਐਨਸੀਆਰ) ਦੇ ਝਾਂਸੀ ਡਿਵੀਜ਼ਨ ਵਿੱਚ 200 ਕਿਲੋਮੀਟਰ ਲੰਬੀ ਗਵਾਲੀਅਰ-ਸ਼ਿਓਪੁਰ (ਸ਼ਿਓਪੁਰਕਲਾਂ) ਨੈਰੋ ਗੇਜ ਲਾਈਨ ਨੂੰ ਚੌੜਾ ਕਰਕੇ ਬਰਾਡ ਗੇਜ ਬਣਾਇਆ ਜਾ ਰਿਹਾ ਹੈ। ਇਸ ਕੰਮ ਲਈ ਉੱਤਰੀ ਮੱਧ ਰੇਲਵੇ ਨੇ ਜ਼ਮੀਨ ਦੀ ਮਾਪ ਅਤੇ ਨਿਸ਼ਾਨਦੇਹੀ ਕੀਤੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਰੇਲਵੇ ਦੀ ਨਿਸ਼ਾਨਦੇਹੀ ਦੌਰਾਨ ਮੱਧ ਪ੍ਰਦੇਸ਼ ਦੇ ਮੋਰੈਨਾ ਜ਼ਿਲੇ ਦੀ ਸਬਲਗੜ੍ਹ ਤਹਿਸੀਲ ‘ਚ ਰੇਲਵੇ ਟਰੈਕ ਦੇ ਕੋਲ ਬਣੇ ਹਨੂੰਮਾਨ ਜੀ ਦਾ ਮੰਦਰ ਨਿਸ਼ਾਨਦੇਹੀ ਦੇ ਅੰਦਰ ਆਇਆ ਹੈ। ਰੇਲਵੇ ਮੁਤਾਬਕ ਇਹ ਮੰਦਰ ਰੇਲਵੇ ਦੀ ਜ਼ਮੀਨ ‘ਤੇ ਹੀ ਹੈ। ਸੀਨੀਅਰ ਰੇਲਵੇ ਇੰਜੀਨੀਅਰ ਵੱਲੋਂ ਜਾਰੀ ਨੋਟਿਸ ਵਿੱਚ ਮੰਦਰ ਸ਼ਬਦ ਨਹੀਂ ਲਿਖਿਆ ਗਿਆ ਹੈ। ਸਗੋਂ ਇਸ ਨੂੰ ਮਕਾਨ ਕਿਹਾ ਗਿਆ ਹੈ। ਇਸ ਦੇ ਨਾਲ ਹੀ ਕਿਸੇ ਪੁਜਾਰੀ ਨੂੰ ਨੋਟਿਸ ਦੇਣ ਦੀ ਬਜਾਏ ਸਿੱਧਾ ਬਜਰੰਗ ਬਲੀ ਦੇ ਨਾਂ ‘ਤੇ ਹੀ ਨੋਟਿਸ ਭੇਜਿਆ ਗਿਆ ਹੈ।