ਕਿਹਾ ਜਾਂਦਾ ਹੈ ਕਿ ਰਿਸ਼ਤਾ ਰੱਬ ਦੁਆਰਾ ਬਣਾਇਆ ਅਤੇ ਭੇਜਿਆ ਜਾਂਦਾ ਹੈ। ਭਾਵੇਂ ਕਿੰਨੇ ਹੀ ਮੱਤਭੇਦ ਕਿਉਂ ਨਾ ਹੋਣ, ਜਦੋਂ ਆਪਣਿਆਂ ਨੂੰ ਦੁੱਖ ‘ਚ ਵੇਖਦੇ ਹਾਂ ਤਾਂ ਦਿਲ ਪਿਘਲ ਜਾਂਦਾ ਹੈ।ਅਜਿਹਾ ਹੀ ਕੁਝ ਸ਼ਨੀਵਾਰ ਨੂੰ ਨੈਸ਼ਨਲ ਲੋਕ ਅਦਾਲਤ ‘ਚ ਦੇਖਣ ਨੂੰ ਮਿਲਿਆ। ਦਿੱਲੀ ਪੁਲਿਸ ਦੇ ਕਾਂਸਟੇਬਲ ਸੁਲ੍ਹਾ-ਸਫਾਈ ਲਈ ਪਹੁੰਚੇ ਪਤੀ ਨੂੰ ਕੈਂਸਰ ਨਾਲ ਲੜਦਾ ਦੇਖ ਕੇ ਪਤਨੀ ਦੀਆਂ ਅੱਖਾਂ ਨਮ ਹੋ ਗਈਆਂ। ਸਾਰੇ ਵਿਵਾਦ ਉਨ੍ਹਾਂ ਹੰਝੂਆਂ ਵਿੱਚ ਵਹਿ ਗਏ। ਫਿਰ ਪਤੀ-ਪਤਨੀ ਵੱਖ ਨਾ ਹੋਣ ਦੀ ਸਹੁੰ ਖਾ ਕੇ ਆਪਣੇ ਘਰ ਚਲੇ ਗਏ। ਨੈਸ਼ਨਲ ਲੋਕ ਅਦਾਲਤ ਵਿੱਚ 207 ਕੇਸਾਂ ਦਾ ਨਿਪਟਾਰਾ ਕੀਤਾ ਗਿਆ। ਜਿਸ ਵਿਚ 36 ਜੋੜੇ ਇਕੱਠੇ ਰਹਿਣ ਲਈ ਸਹਿਮਤ ਹੋਏ।
ਦੱਸ ਦਈਏ ਕਿ ਦਿੱਲੀ ਪੁਲਿਸ ਦੇ ਹੌਲਦਾਰ ਹਰਵੀਰ ਸਿੰਘ ਦਾ ਵਿਆਹ 10 ਮਈ 1998 ਨੂੰ ਰਾਜਿੰਦਰ ਨਗਰ ਦੀ ਰਹਿਣ ਵਾਲੀ ਨਮਿਤਾ ਨਾਲ ਹੋਇਆ ਸੀ। ਦੋਵਾਂ ਦੇ 2 ਪੁੱਤਰ ਸਨ। ਵੱਡਾ ਪੁੱਤਰ ਸਿਪਾਹੀ ਹੈ ਅਤੇ ਛੋਟਾ ਅਜੇ ਪੜ੍ਹ ਰਿਹਾ ਹੈ। ਹਰਵੀਰ ਨੂੰ ਬਲੱਡ ਕੈਂਸਰ ਹੈ। ਪਤੀ-ਪਤਨੀ ਵਿਚ ਛੋਟੀ-ਛੋਟੀ ਗੱਲ ਨੂੰ ਲੈ ਕੇ ਝਗੜਾ ਹੋ ਜਾਂਦਾ ਸੀ। ਮਾਮਲਾ ਐਨਾ ਵੱਧ ਗਿਆ ਕਿ ਦੋਵੇਂ ਵੱਖ ਹੋ ਗਏ। ਹਰਵੀਰ ਨੇ ਅਦਾਲਤ ‘ਚ ਅਰਜ਼ੀ ਦਾਇਰ ਕਰਕੇ ਨਮਿਤਾ ਨਾਲ ਰਹਿਣ ਦੀ ਅਪੀਲ ਕੀਤੀ ਸੀ। ਹਰਵੀਰ ਅਤੇ ਨਮਿਤਾ ਦੋਵੇਂ ਸ਼ਨੀਵਾਰ ਨੂੰ ਨੈਸ਼ਨਲ ਲੋਕ ਅਦਾਲਤ ‘ਚ ਪਹੁੰਚੇ। ਹਰਵੀਰ ਦੀ ਹਾਲਤ ਨਮਿਤਾ ਤੋਂ ਵੀ ਨਹੀਂ ਦੇਖੀ ਗਈ। ਨਮਿਤਾ ਨਮ ਅੱਖਾਂ ਨਾਲ ਬਿਨਾਂ ਕੁਝ ਕਹੇ ਆਪਣੇ ਪਤੀ ਹਰਵੀਰ ਨਾਲ ਜਾਣ ਲਈ ਤਿਆਰ ਹੋ ਗਈ। ਅਦਾਲਤ ਨੇ ਦੋਵਾਂ ਨੂੰ ਇਕੱਠੇ ਰਹਿਣ ਦਾ ਹੁਕਮ ਵੀ ਦਿੱਤਾ।
