ਤੁਰਕੀ ਅਤੇ ਸੀਰੀਆ ‘ਚ ਆਏ ਭੂਚਾਲ ਕਾਰਨ ਹਾਲਾਤ ਵਿਗੜਦੇ ਜਾ ਰਹੇ ਹਨ। ਹੁਣ ਤੱਕ 21 ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਜ਼ਖਮੀਆਂ ਦੀ ਗਿਣਤੀ 64 ਹਜ਼ਾਰ ਦੇ ਕਰੀਬ ਪਹੁੰਚ ਗਈ ਹੈ। ਸੀਰੀਆ ਵਿੱਚ ਮਾਰੇ ਗਏ ਲੋਕਾਂ ਨੂੰ ਦਫ਼ਨਾਉਣ ਲਈ ਸਮੂਹਿਕ ਕਬਰਾਂ ਬਣਾਈਆਂ ਜਾ ਰਹੀਆਂ ਹਨ। ਭੂਚਾਲ ਕਾਰਨ ਤੁਰਕੀ ਦੇ ਅੰਟਾਕਿਆ, ਸਨਲੀਉਰਫਾ ਅਤੇ ਸੀਰੀਆ ਦੇ ਅਲੈਪੋ ਸ਼ਹਿਰ ਪੂਰੀ ਤਰ੍ਹਾਂ ਤਬਾਹ ਹੋ ਗਏ ਹਨ। ਇਥੇ ਪਾਣੀ ਅਤੇ ਬਿਜਲੀ ਸਪਲਾਈ ਵੀ ਬੰਦ ਹਨ। ਇੱਥੇ ਖਾਣ-ਪੀਣ ਦੀਆਂ ਵਸਤੂਆਂ ਉਪਲਬਧ ਨਹੀਂ ਹਨ। ਲੋਕਾਂ ਦਾ ਕਹਿਣਾ ਹੈ ਕਿ ਮਦਦ ਤਾਂ ਆ ਰਹੀ ਹੈ ਪਰ ਬਹੁਤ ਘੱਟ ਹੈ। ਭੂਚਾਲ ਦੇ ਕੇਂਦਰ ਸ਼ਹਿਰ ਗਾਜ਼ੀਅਨਟੇਪ ਦੇ ਨਿਵਾਸੀਆਂ ਦਾ ਕਹਿਣਾ ਹੈ ਕਿ ਤਬਾਹੀ ਦੇ 12 ਘੰਟੇ ਬਾਅਦ ਵੀ ਉਨ੍ਹਾਂ ਤੱਕ ਮਦਦ ਨਹੀਂ ਪਹੁੰਚੀ ਸੀ। ਹਾਲਾਂਕਿ, 95 ਤੋਂ ਵੱਧ ਦੇਸ਼ਾਂ ਨੇ ਸਹਾਇਤਾ ਭੇਜੀ ਹੈ।
ਇਸ ਦੌਰਾਨ ਭਾਰਤੀ ਬਚਾਅ ਦਲ ਨੇ ਤੁਰਕੀ ਦੇ ਨੂਰਦਗੀ ਸ਼ਹਿਰ ‘ਚ 6 ਸਾਲਾ ਬੱਚੀ ਨੂੰ ਬਚਾਇਆ ਹੈ। ਗ੍ਰਹਿ ਮੰਤਰਾਲੇ ਦੇ ਬੁਲਾਰੇ ਨੇ ਟਵੀਟ ਕੀਤਾ ਅਤੇ ਲਿਖਿਆ – ਆਪਰੇਸ਼ਨ ਦੋਸਤ ਦੇ ਤਹਿਤ ਤੁਰਕੀ ਪਹੁੰਚੀ ਨੈਸ਼ਨਲ ਡਿਜ਼ਾਸਟਰ ਰਿਸਪਾਂਸ ਫੋਰਸ (ਐਨਡੀਆਰਐਫ) ਨੇ ਇੱਕ ਬੱਚੀ ਨੂੰ ਬਚਾਇਆ ਹੈ। ਦੱਸ ਦਈਏ ਕਿ ਤੁਰਕੀ ਅਤੇ ਸੀਰੀਆ ਵਿੱਚ 6 ਫਰਵਰੀ ਦੀ ਸਵੇਰ ਨੂੰ 3 ਵੱਡੇ ਭੂਚਾਲ ਆਏ। ਤੁਰਕੀ ਦੇ ਸਮੇਂ ਮੁਤਾਬਕ ਪਹਿਲਾ ਭੂਚਾਲ ਸਵੇਰੇ 4 ਵਜੇ (7.8), ਦੂਜਾ ਸਵੇਰੇ 10 ਵਜੇ (7.6) ਅਤੇ ਤੀਜਾ ਦੁਪਹਿਰ 3 ਵਜੇ (6.0) ‘ਤੇ ਆਇਆ।