ਚੰਡੀਗੜ੍ਹ ਰੇਲਵੇ ਸਟੇਸ਼ਨ ‘ਤੇ ਚੱਲ ਰਹੇ ਵਿਸ਼ਵ ਪੱਧਰੀ ਨਿਰਮਾਣ ਕਾਰਜ ਤਹਿਤ ਪਲੇਟਫਾਰਮ ਨੰਬਰ ਚਾਰ ਅਤੇ ਪੰਜ ਭਲਕੇ ਤੋਂ 34 ਦਿਨਾਂ ਲਈ ਬੰਦ ਰਹਿਣਗੇ। ਇਸ ਨਾਲ ਕੁੱਲ ਅੱਠ ਟਰੇਨਾਂ ਪ੍ਰਭਾਵਿਤ ਹੋਣਗੀਆਂ। ਜਿਨ੍ਹਾਂ ‘ਚੋਂ ਪੰਜ ਟਰੇਨਾਂ ਦੂਜੇ ਪਲੇਟਫਾਰਮ ‘ਤੇ ਰੁਕਣਗੀਆਂ, ਜਦਕਿ ਤਿੰਨ ਟਰੇਨਾਂ ਚੰਡੀਗੜ੍ਹ ਨਹੀਂ ਆਉਣਗੀਆਂ। ਰੇਲਵੇ ਸਟੇਸ਼ਨ ਦੇ ਨਵੀਨੀਕਰਨ ਤੋਂ ਬਾਅਦ, ਇਨ੍ਹਾਂ ਰੇਲਗੱਡੀਆਂ ਨੂੰ ਦੁਬਾਰਾ ਸ਼ੁਰੂ ਕੀਤਾ ਜਾਵੇਗਾ।
ਅੰਬਾਲਾ ਡਿਵੀਜ਼ਨ ਦੇ ਡੀਆਰਐਮ ਮਨਦੀਪ ਸਿੰਘ ਭਾਟੀਆ ਨੇ ਦੱਸਿਆ ਕਿ ਰੇਲਵੇ ਲੈਂਡ ਡਿਵੈਲਪਮੈਂਟ ਅਥਾਰਟੀ ਵੱਲੋਂ ਇੱਥੇ ਕੰਮ ਚੱਲ ਰਿਹਾ ਹੈ। ਇਸ ਕਾਰਨ ਚੰਡੀਗੜ੍ਹ-ਲਖਨਊ ਟਰੇਨ ਨੰਬਰ 15011 ਅਤੇ 15012 ਅੰਬਾਲਾ ਤੋਂ ਲਖਨਊ ਤੱਕ ਚੱਲਣਗੀਆਂ। ਇਸੇ ਤਰ੍ਹਾਂ ਟਰੇਨ ਨੰਬਰ 22355 ਅਤੇ 22356 ਚੰਡੀਗੜ੍ਹ-ਪਾਟਲੀਪੁੱਤਰ ਵੀ ਅੰਬਾਲਾ ਤੋਂ ਰਵਾਨਾ ਹੋਣਗੀਆਂ। ਇਸ ਤੋਂ ਇਲਾਵਾ ਟਰੇਨ ਨੰਬਰ 14629-14630 ਚੰਡੀਗੜ੍ਹ-ਫਿਰੋਜ਼ਪੁਰ ਕੱਲ੍ਹ ਤੋਂ ਲੁਧਿਆਣਾ ਤੱਕ ਹੀ ਚੱਲੇਗੀ।
ਰੇਲਵੇ ਸਟੇਸ਼ਨ ਦੇ ਨਵੀਨੀਕਰਨ ਤੋਂ ਬਾਅਦ ਇੱਥੇ ਕਈ ਤਰ੍ਹਾਂ ਦੀਆਂ ਸਹੂਲਤਾਂ ਮੁਹੱਈਆ ਕਰਵਾਈਆਂ ਜਾਣਗੀਆਂ। ਜਿਸ ਵਿੱਚ ਆਧੁਨਿਕ ਲਾਬੀ, ਫੂਡ ਕੋਰਟ, ਟ੍ਰੀ ਲਾਉਂਜ, ਇਨਕੁਆਰੀ ਕਾਊਂਟਰ ਅਤੇ ਰਿਟੇਲ ਸ਼ਾਪ ਸਪੇਸ ਸ਼ਾਮਲ ਹੈ। ਪਲੇਟਫਾਰਮ ‘ਤੇ 72 ਮੀਟਰ ਚੌੜਾ ਰੂਪ ਪਲਾਜ਼ਾ, ਫੂਡ ਪਲਾਜ਼ਾ ਅਤੇ ਰਿਟੇਲ ਦੁਕਾਨਾਂ ਦਾ ਪ੍ਰਬੰਧ ਕੀਤਾ ਜਾ ਰਿਹਾ ਹੈ। ਇੱਥੇ ਯਾਤਰੀ ਆਰਾਮਦਾਇਕ ਮਾਹੌਲ ਵਿੱਚ ਆਪਣੀ ਟ੍ਰੇਨ ਦਾ ਇੰਤਜ਼ਾਰ ਕਰ ਸਕਣਗੇ।