ਭਾਜਪਾ ਦੀ ਸਾਬਕਾ ਨੇਤਾ ਨੂਪੁਰ ਸ਼ਰਮਾ ਵੱਲੋਂ ਦਿੱਤੀ ਗਈ ਵਿਵਾਦਿਤ ਟਿਪਣੀ ਦੇ ਖਿਲਾਫ ਦੇਸ਼ ਵਿਦੇਸ਼ ਵਿਚ ਰੋਸ ਪ੍ਰਦਰਸ਼ਨ ਕੀਤੇ ਜਾ ਰਹੇ ਹਨ। ਅਜਿਹੇ ‘ਚ ਟੀਮ ਇੰਡੀਆ ਦਾ ਸਾਬਕਾ ਤੇਜ਼ ਗੇਂਦਬਾਜ਼ ਭਾਜਪਾ ਦੀ ਸਾਬਕਾ ਨੇਤਾ ਨੂਪੁਰ ਸ਼ਰਮਾ ਦੇ ਸਮਰਥਨ ‘ਚ ਅੱਗੇ ਆਇਆ ਹੈ।
ਕੁਝ ਦਿਨ ਪਹਿਲਾ ਬੇਲਾਗਾਵੀ ਵਿੱਚ ਇੱਕ ਮੁਸਲਿਮ ਮਸਜਿਦ ਦੇ ਬਾਹਰ ਨੂਪੁਰ ਸ਼ਰਮਾ ਦਾ ਪੁਤਲਾ ਟੰਗਿਆ ਗਿਆ। ਸਾਬਕਾ ਤੇਜ਼ ਗੇਂਦਬਾਜ਼ ਵੈਂਕਟੇਸ਼ ਪ੍ਰਸਾਦ ਨੇ ਇਸ ਬਾਰੇ ਟਵੀਟ ਕਰਕੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਮੈਂ ਵਿਸ਼ਵਾਸ ਨਹੀਂ ਕਰ ਸਕਦਾ ਕਿ ਇਹ 21ਵੀਂ ਸਦੀ ਦਾ ਭਾਰਤ ਹੈ। ਵੈਂਕਟੇਸ਼ ਨੇ ਇਕ ਤੋਂ ਬਾਅਦ ਇਕ ਕਈ ਟਵੀਟ ਕੀਤੇ। ਉਨ੍ਹਾਂ ਦੇ ਇਸ ਬਿਆਨ ਨੂੰ ਲੈ ਕੇ ਲੋਕਾਂ ਨੇ ਟ੍ਰੋਲ ਵੀ ਕੀਤਾ ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਲੋਕਾਂ ਨੂੰ ਤਿੱਖੇ ਸ਼ਬਦਾਂ ‘ਚ ਜਵਾਬ ਦਿੱਤਾ।
ਦੱਸ ਦਈਏ ਕਿ ਵੈਂਕਟੇਸ਼ ਨੇ ਆਪਣੇ ਪਹਿਲੇ ਟਵੀਟ ਵਿੱਚ ਇਕ ਫੋਟੋ ਸਾਂਝੀ ਕਰਦਿਆਂ ਲਿਖਿਆ ਕਿ ਇਹ ਕਰਨਾਟਕ ਵਿੱਚ ਨੂਪੁਰ ਸ਼ਰਮਾ ਦਾ ਲਟਕਾਇਆ ਪੁਤਲਾ ਹੈ। ਯਕੀਨ ਨਹੀਂ ਆ ਰਿਹਾ ਕਿ ਇਹ 21ਵੀਂ ਸਦੀ ਦਾ ਭਾਰਤ ਹੈ। ਮੈਂ ਸਾਰਿਆਂ ਨੂੰ ਬੇਨਤੀ ਕਰਦਾ ਹਾਂ ਕਿ ਅਜਿਹੀ ਭੈੜੀ ਰਾਜਨੀਤੀ ਨਾ ਕਰੋ ਅਤੇ ਸਮਝਦਾਰ ਬਣੋ।
ਇਸ ਤੋਂ ਬਾਅਦ ਇਕ ਹੋਰ ਟਵੀਟ ‘ਚ ਵੈਂਕਟੇਸ਼ ਨੇ ਲਿਖਿਆ ਕਿ ਇਸ ਸਥਿਤੀ ਲਈ ਨਿਊਜ਼ ਚੈਨਲਾਂ ਦੇ ਨਾਲ-ਨਾਲ ਅਜਿਹੀਆਂ ਗਤੀਵਿਧੀਆਂ ਨੂੰ ਜਾਇਜ਼ ਠਹਿਰਾਉਣ ਵਾਲੇ ਵੀ ਜ਼ਿੰਮੇਵਾਰ ਹਨ।
ਉਨ੍ਹਾਂ ਨੇ ਫਿਰ ਟਵੀਟ ਕੀਤਾ ਅਤੇ ਲਿਖਿਆ ਕਿ ਮੇਰਾ ਇੱਕ ਟਵੀਟ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾ ਰਿਹਾ ਹੈ ਅਤੇ ਸਾਡੇ ਦੇਸ਼ ਵਿੱਚ ਅਜਿਹੇ ਲੋਕਾਂ ਦੀ ਸੂਚੀ ਬੇਅੰਤ ਹੈ। ਪੱਤਰਕਾਰਾਂ ਤੋਂ ਲੈ ਕੇ ਸੰਸਦ ਮੈਂਬਰਾਂ ਤੱਕ, ਅਖਬਾਰਾਂ ਦੇ ਪ੍ਰਮੁੱਖ ਤੋਂ ਲੈ ਕੇ ਹਿੰਦੂ ਦੇਵਤਿਆਂ ਦਾ ਮਜ਼ਾਕ ਉਡਾਉਣ ਵਾਲੇ ਅਖੌਤੀ ਮੋਹਰੀ ਕਲਾਕਾਰਾਂ ਤੱਕ, ਸਿਰਫ ਸਨਾਤਨ ਧਰਮ ਨੇ ਹੀ ਵਾਰ-ਵਾਰ ਸਹਿਣਸ਼ੀਲਤਾ ਦਿਖਾਈ ਹੈ।
