ਔਨਲਾਈਨ ਘੁਟਾਲੇ ਦਿਨੋ ਦਿਨ ਵਧਦੇ ਜਾ ਰਹੇ ਹਨ। ਔਨਲਾਈਨ ਘੁਟਾਲੇ ਕਿਸੇ ਵੀ ਸਮੇਂ, ਕਿਸੇ ਨਾਲ ਅਤੇ ਕਿਸੇ ਵੀ ਤਰੀਕੇ ਨਾਲ ਹੋ ਸਕਦੇ ਹਨ। ਅਜਿਹੇ ‘ਚ ਤੁਹਾਨੂੰ ਹਮੇਸ਼ਾ ਚੌਕਸ ਰਹਿਣਾ ਹੋਵੇਗਾ। ਸਾਈਬਰ ਠੱਗ ਹਰ ਵਾਰ ਨਵੇਂ ਤਰੀਕੇ ਅਪਣਾਉਂਦੇ ਹਨ। ਇਸ ਵਾਰ ਠੱਗਾਂ ਨੇ ਇੱਕ ਔਰਤ ਨੂੰ ਬੈਂਕ ਮੁਲਾਜ਼ਮ ਦੱਸ ਕੇ 5.24 ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ। ਆਓ ਜਾਣਦੇ ਹਾਂ ਪੂਰਾ ਮਾਮਲਾ।
ਰਿਪੋਰਟ ਮੁਤਾਬਕ ਠਾਣੇ, ਮੁੰਬਈ ਦੀ ਰਹਿਣ ਵਾਲੀ 24 ਸਾਲਾ ਔਰਤ ਨੂੰ ਤਾਜ਼ਾ ਸਾਈਬਰ ਫਰਾਡ ‘ਚ 5.24 ਲੱਖ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਔਰਤ ਨੂੰ ਬੈਂਕ ਕਰਮਚਾਰੀ ਦੱਸ ਕੇ ਇਕ ਵਿਅਕਤੀ ਨੇ ਫੋਨ ਕੀਤਾ। ਵਿਅਕਤੀ ਨੇ ਔਰਤ ਨੂੰ ਦੱਸਿਆ ਕਿ ਉਹ ਬੈਂਕ ਦੇ ਕ੍ਰੈਡਿਟ ਕਾਰਡ ਵਿਭਾਗ ਤੋਂ ਹੈ। ਵਿਅਕਤੀ ਨੇ ਔਰਤ ਨੂੰ ਉਸ ਦੇ ਕ੍ਰੈਡਿਟ ਕਾਰਡ ਦੇ ਬਕਾਏ ਦਾ ਭੁਗਤਾਨ ਕਰਨ ਲਈ ਕਿਹਾ ਅਤੇ ਇਸ ਲਈ ਉਸ ਨੇ ਉਸ ਨੂੰ ਇੱਕ ਐਂਡਰਾਇਡ ਪੈਕੇਜ (ਏਪੀਕੇ) ਫਾਈਲ ਭੇਜੀ ਅਤੇ ਉਸ ਨੂੰ ਇੱਕ ਐਪ ਡਾਊਨਲੋਡ ਕਰਨ ਲਈ ਕਿਹਾ।
ਜਿਵੇਂ ਹੀ ਔਰਤ ਨੇ ਐਪ ਇੰਸਟਾਲ ਕੀਤਾ, ਉਸ ਦੇ ਖਾਤੇ ‘ਚੋਂ 5.24 ਲੱਖ ਰੁਪਏ ਕਢਵਾ ਲਏ ਗਏ। ਮੁਢਲੀ ਜਾਂਚ ਮੁਤਾਬਕ ਠੱਗ ਨੇ ਔਰਤ ਦੇ ਫੋਨ ‘ਚ ਰਿਮੋਟ ਕੰਟਰੋਲ ਐਪ ਲਗਾ ਦਿੱਤੀ ਸੀ ਅਤੇ ਉਹ ਔਰਤ ਦੇ ਫੋਨ ਨੂੰ ਕੁਝ ਦੂਰੀ ‘ਤੇ ਬੈਠ ਕੇ ਆਪਰੇਟ ਕਰ ਰਿਹਾ ਸੀ, ਜਦਕਿ ਔਰਤ ਨੂੰ ਇਸ ਦਾ ਪਤਾ ਵੀ ਨਹੀਂ ਸੀ।
ਆਏ ਦਿਨ ਅਜਿਹੇ ਬਹੁਤ ਮਾਮਲੇ ਸਾਹਮਣੇ ਆ ਰਹੇ ਹਨ। ਇਸ ਲਈ ਤੁਹਾਡੇ ਲਈ ਬਿਹਤਰ ਇਹੀ ਹੈ ਕਿ ਤੁਸੀਂ ਕਿਸੇ ਵੀ ਤਰ੍ਹਾਂ ਦੀ ਅਣਜਾਣ ਐਪ ਨੂੰ ਡਾਊਨਲੋਡ ਨਾ ਕਰੋ। ਕਿਸੇ ਵੀ ਥਰਡ ਪਾਰਟੀ ਸਟੋਰ ਤੋਂ ਕੋਈ ਵੀ ਐਪ ਡਾਊਨਲੋਡ ਨਾ ਕਰੋ। ਇਸ ਤੋਂ ਇਲਾਵਾ ਜੇਕਰ ਕੋਈ ਤੁਹਾਨੂੰ ਬੈਂਕ ਕਰਮਚਾਰੀ ਦੱਸ ਕੇ ਕਾਲ ਕਰ ਰਿਹਾ ਹੈ ਤਾਂ ਤੁਰੰਤ ਉਸ ਦਾ ਨੰਬਰ ਬਲਾਕ ਕਰੋ ਅਤੇ ਸ਼ਿਕਾਇਤ ਕਰੋ।