ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ‘ਚ ਚਾਂਦੀ ਦਾ ਤਮਗ਼ਾ ਜਿੱਤਣ ਤੋਂ ਬਾਅਦ ਨੀਰਜ ਚੋਪੜਾ ਦੇ ਘਰ ਪਾਣੀਪਤ ਵਿਖੇ ਜਸ਼ਨ ਦਾ ਮਾਹੌਲ ਹੈ। ਪਰਿਵਾਰਿਕ ਮੈਂਬਰ ਅਤੇ ਨੀਰਜ ਚੋਪੜਾ ਦੇ ਦੋਸਤਾਂ ਨੇ ਨੱਚ ਟੱਪ ਨੇ ਨੀਰਜ ਚੋਪੜਾ ਦੀ ਉਪਲਬਧੀ ਦਾ ਜਸ਼ਨ ਮਨਾਇਆ। ਓਲੰਪਿਕ ਗੋਲਡਨ ਬੁਆਏ ਨੀਰਜ ਚੋਪੜਾ ਦੇ ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ‘ਚ ਚਾਂਦੀ ਦਾ ਤਮਗਾ ਜਿੱਤਦੇ ਹੀ ਪਿਤਾ ਭਾਵੁਕ ਹੋ ਗਏ ਅਤੇ ਉਨ੍ਹਾਂ ਦੀਆਂ ਅੱਖਾਂ ‘ਚ ਖੁਸ਼ੀ ਦੇ ਹੰਝੂ ਆ ਗਏ। ਪੁੱਤਰ ਦੀ ਜਿੱਤ ਦੀ ਖੁਸ਼ੀ ਮਨਾਉਂਦਿਆਂ ਮਾਂ ਨੇ ਨੱਚਦੇ ਹੋਏ ਕਿਹਾ – ਬੇਟਾ ਜਿਵੇਂ ਹੀ ਘਰ ਆਵੇਗਾ ਮੈਂ ਉਸਨੂੰ ਚੂਰਮਾ ਖੁਆਵਾਂਗੀ।
ਜਾਣਕਾਰੀ ਮੁਤਾਬਿਕ ਇਸ ਜਸ਼ਨ ਦੀਆਂ ਤਿਆਰੀਆਂ ਕਈ ਘੰਟੇ ਪਹਿਲਾਂ ਹੀ ਸ਼ੁਰੂ ਹੋ ਗਈਆਂ ਸਨ। ਸਵੇਰ ਦੇ 4 ਵਜੇ ਤੋਂ ਹੀ ਪਿੰਡ ਦੇ ਲੋਕ ਜਾਗ ਰਹੇ ਸਨ, ਜੋਸ਼ ਅਤੇ ਆਸ ਨਾਲ ਭਰੇ ਹੋਏ ਸਨ। ਸਾਰਾ ਪਿੰਡ ਨੀਰਜ ਚੋਪੜਾ ਦੇ ਘਰ ਇਕੱਠਾ ਹੋ ਗਿਆ ਸੀ। ਇੱਥੇ ਬੇਟਾ ਵਿਸ਼ਵ ਚੈਂਪੀਅਨਸ਼ਿਪ ਵਿੱਚ ਦੇਸ਼ ਲਈ ਜੈਵਲਿਨ ਸੁੱਟ ਰਿਹਾ ਸੀ। ਫਾਈਨਲ ਮੈਚ ਦੇਖਣ ਲਈ ਵੱਡੀ ਸਕਰੀਨ ਦਾ ਪ੍ਰਬੰਧ ਕੀਤਾ ਗਿਆ ਸੀ। ਮੈਡਲ ਆਉਂਦੇ ਹੀ ਮਠਿਆਈਆਂ ਅਤੇ ਲੱਡੂ ਵੰਡੇ ਗਏ। ਲੋਕਾਂ ਨੇ ਨੀਰਜ ਦੇ ਪਿਤਾ ਨੂੰ ਲੱਡੂ ਖੁਆ ਕੇ ਮੂੰਹ ਮਿੱਠਾ ਕਰਵਾਇਆ।
ਨੀਰਜ ਦੇ ਪਿਤਾ ਸਤੀਸ਼ ਕੁਮਾਰ ਨੇ ਆਪਣੇ ਬੇਟੇ ਦੀ ਪ੍ਰਾਪਤੀ ਦਾ ਜਸ਼ਨ ਮਨਾਉਂਦੇ ਹੋਏ ਕਿਹਾ ਕਿ ਉਸ ਨੇ ਅਜੇ ਦੇਸ਼ ਲਈ ਸੋਨ ਤਮਗ਼ਾ ਵੀ ਲਿਆਉਣਾ ਹੈ। ਨੀਰਜ ਦੀ ਮਾਂ ਸਰੋਜ ਦੇਵੀ ਨੇ ਕਿਹਾ ਕਿ ਉਹ ਬਹੁਤ ਖੁਸ਼ ਹੈ।ਬੇਟੇ ਦੀ ਮਿਹਨਤ ਰੰਗ ਲਿਆਈ। ਸਾਨੂੰ ਯਕੀਨ ਸੀ ਕਿ ਉਹ ਇਸ ਈਵੈਂਟ ਵਿੱਚ ਤਮਗਾ ਜਿੱਤੇਗਾ।
