ਜੰਮੂ-ਕਸ਼ਮੀਰ ਦੇ ਰਿਆਸੀ ਜ਼ਿਲੇ ‘ਚ ਬਣੇ ਦੁਨੀਆ ਦੇ ਸਭ ਤੋਂ ਉੱਚੇ ਸਟੀਲ ਆਰਚ ਬ੍ਰਿਜ ‘ਤੇ ਪਹਿਲੀ ਰੇਲਗੱਡੀ ਸੁਤੰਤਰਤਾ ਦਿਵਸ ਯਾਨੀ 15 ਅਗਸਤ ਨੂੰ ਚੱਲੇਗੀ। ਸੰਗਲਦਾਨ ਤੋਂ ਰਿਆਸੀ ਵਿਚਕਾਰ ਚੱਲਣ ਵਾਲੀ ਇਹ ਰੇਲ ਸੇਵਾ ਊਧਮਪੁਰ-ਸ਼੍ਰੀਨਗਰ-ਬਾਰਾਮੂਲਾ ਰੇਲ ਲਿੰਕ (USBRL) ਪ੍ਰੋਜੈਕਟ ਦਾ ਹਿੱਸਾ ਹੈ।
ਦੱਸ ਦਈਏ ਕਿ ਇਸ ਪੁਲ ‘ਤੇ 20 ਜੂਨ ਨੂੰ ਟਰੇਨ ਦੀ ਟਰਾਇਲ ਰਨ ਹੋਈ ਸੀ। ਇਸ ਤੋਂ ਪਹਿਲਾਂ 16 ਜੂਨ ਨੂੰ ਪੁਲ ‘ਤੇ ਇਲੈਕਟ੍ਰਿਕ ਇੰਜਣ ਦਾ ਟ੍ਰਾਇਲ ਕੀਤਾ ਗਿਆ ਸੀ। ਇਹ ਪੁਲ ਪੈਰਿਸ ਦੇ ਆਈਫਲ ਟਾਵਰ ਤੋਂ 29 ਮੀਟਰ ਉੱਚਾ ਹੈ। ਆਈਫਲ ਟਾਵਰ ਦੀ ਉਚਾਈ 330 ਮੀਟਰ ਹੈ, ਜਦਕਿ ਇਹ 1.3 ਕਿਲੋਮੀਟਰ ਲੰਬਾ ਪੁਲ ਚਿਨਾਬ ਨਦੀ ‘ਤੇ 359 ਮੀਟਰ ਦੀ ਉਚਾਈ ‘ਤੇ ਬਣਿਆ ਹੈ।
ਇਹ ਪੁਲ ਰਿਕਟਰ ਪੈਮਾਨੇ ‘ਤੇ 8 ਤੀਬਰਤਾ ਤੱਕ ਦੇ ਭੂਚਾਲਾਂ ਨੂੰ ਅਤੇ 40 ਕਿਲੋਗ੍ਰਾਮ ਵਿਸਫੋਟਕ ਨੂੰ ਸਹਿ ਸਕਦਾ ਹੈ। ਪਾਕਿਸਤਾਨੀ ਸਰਹੱਦ ਤੋਂ ਇਸ ਦੀ ਹਵਾਈ ਦੂਰੀ ਸਿਰਫ਼ 65 ਕਿਲੋਮੀਟਰ ਹੈ। ਇਸ ਪੁਲ ਦੇ ਖੁੱਲ੍ਹਣ ਨਾਲ ਕਸ਼ਮੀਰ ਘਾਟੀ ਹਰ ਮੌਸਮ ਵਿੱਚ ਰੇਲ ਗੱਡੀਆਂ ਰਾਹੀਂ ਭਾਰਤ ਦੇ ਹੋਰ ਹਿੱਸਿਆਂ ਨਾਲ ਜੁੜ ਜਾਵੇਗੀ।