- ਪ੍ਰਵਾਸੀਆਂ ਨੂੰ ਉਨ੍ਹਾਂ ਦੇ ਘਰਾਂ ਤੱਕ ਭੇਜਣ ਦਾ ਖਰਚ ਵੀ ਪੰਜਾਬ ਦੀ ਕਾਂਗਰਸ ਸਰਕਾਰ ਨੇ ਚੁੱਕਿਆ
ਚੰਡੀਗੜ੍ਹ/ਅਬੋਹਰ, 3 ਫਰਵਰੀ 2022 – ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਸਾਬਕਾ ਪ੍ਰਧਾਨ ਅਤੇ ਵਿਧਾਨ ਸਭਾ ਚੋਣ ਅਭਿਆਨ ਕਮੇਟੀ ਦੇ ਚੇਅਰਮੈਨ ਸ੍ਰੀ ਸੁਨੀਲ ਜਾਖੜ ਨੇ ਸਾਊਥ ਐਵਿਨਿਊ ਵਿਖੇ ਸਥਿਤ ਆਪਣੇ ਨਿਵਾਸ ਸਥਾਨ ਤੇ ਕੌਂਸਲਰਾਂ ਤੇ ਹੋਰ ਪ੍ਰਮੁੱਖ ਵਾਰਡ ਸਹਿਯੋਗੀਆਂ ਨਾਲ ਬੈਠਕ ਦੌਰਾਨ ਸੰਬੋਧਨ ਕਰਦਿਆਂ ਕਿਹਾ ਕਿ ਜਦੋਂ ਕੋਵਿਡ ਕਾਰਨ ਅਚਾਨਕ ਲਾਕਡਾਉਨ ਦਾ ਐਲਾਣ ਹੋ ਗਿਆ ਸੀ ਤਾਂ ਲੱਖਾਂ ਲੋਕਾਂ ਸਾਹਮਣੇ ਅਨਿਸਚਿਤਤਾ ਦੀ ਸਥਿਤੀ ਪੈਦਾ ਹੋ ਗਈ ਸੀ। ਤਦ ਕਾਂਗਰਸ ਦੇ ਦਫ਼ਤਰ ਵਿਖੇ ਤੁੰਰਤ ਹੈਲਪਲਾਈਨ ਸਥਾਪਿਤ ਕੀਤੀ ਗਈ ਅਤੇ ਜਿ਼ਲ੍ਹਿਆਂ ਵਿਚ ਕਾਂਗਰਸ ਵਰਕਰ ਤੁੰਰਤ ਲੋਕਾਂ ਦੀ ਸੇਵਾ ਵਿਚ ਲੱਗ ਗਏ ਸਨ।
ਉਨ੍ਹਾਂ ਨੇ ਕਿਹਾ ਕਿ ਪੰਜਾਬ ਦੀ ਕਾਂਗਰਸ ਸਰਕਾਰ ਨੇ 10 ਲੱਖ ਪ੍ਰਵਾਸੀਆਂ ਨੂੰ ਰੇਲਗੱਡੀਆਂ ਰਾਹੀਂ ਉਨ੍ਹਾਂ ਦੇ ਘਰਾਂ ਤੱਕ ਪਹੁੰਚਾਉਣ ਦੀ ਵਿਵਸਥਾ ਕੀਤੀ। ਜਦ ਕਿ ਕੇਂਦਰ ਸਰਕਾਰ ਨੇ ਉਨ੍ਹਾਂ ਦਾ ਕਿਰਾਇਆ ਤੱਕ ਮਾਫ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ। ਹੋਰ ਸਿਆਸੀ ਪਾਰਟੀਆਂ ਥਾਲੀ ਵਜਾਉਣ ਅਤੇ ਦੀਵੇ ਬਾਲਣ ਤੱਕ ਹੀ ਸੀਮਤ ਰਹੀਆਂ ਜਦ ਕਿ ਕਾਂਗਰਸ ਵਰਗਰ ਨੇ ਦਿਨ ਰਾਤ ਹੈਲਪਲਾਈਨ ਦੇ ਰਾਹੀਂ ਜਰੂਰਤਮੰਦ ਲੋਕਾਂ ਨੂੰ ਮਦਦ ਪਹੁੰਚਾਉਣ ਦੀ ਕੋਸਿਸ਼ ਕੀਤੀ। ਅਬੋਹਰ ਵਾਂਗ ਹੋਰ ਸ਼ਹਿਰਾਂ ਵਿਚ ਵੀ ਪਾਰਟੀ ਵਰਕਰਾਂ ਨੇ ਲੰਗਰ ਚਲਾਏ ਅਤੇ ਪੈਕ ਖਾਣਾ ਲੋਕਾਂ ਦੇ ਘਰਾਂ ਤੱਕ ਪੁੱਜਦਾ ਕੀਤਾ। ਇਸ ਕੰਮ ਵਿਚ ਸਮਾਜਿਕ ਸੰਸਥਾਵਾਂ ਦੀ ਭੁਮਿਕਾ ਵੀ ਸਲਾਘਾਯੋਗ ਰਹੀ।
ਸਾਬਕਾ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਨੇ ਕਿਹਾ ਕਿ ਜ਼ੋ ਪਾਰਟੀਆਂ ਹੁਣ ਲੋਕਾਂ ਨੂੰ ਸਬਜਬਾਗ ਵਿਖਾ ਕੇ ਲੋਕਾਂ ਦੇ ਸਾਰੇ ਦਰਦ ਦੂਰ ਕਰਨ ਦੇ ਹਵਾਈ ਵਾਅਦੇ ਕਰ ਰਹੀਆਂ ਹਨ ਉਹ ਕੋਵਿਡ ਕਾਲ ਵਿਚ ਕਿਤੇ ਵਿਖਾਈ ਨਹੀਂ ਦਿੱਤੀਆਂ। ਦਿੱਲੀ ਵਿਚ ਚੰਗੇ ਸ਼ਾਸਨ ਅਤੇ ਸਿਹਤ ਸੇਵਾਵਾਂ ਵਿਚ ਨਵੇਂ ਦਿਸਹੱਦੇ ਸਥਾਪਿਤ ਕਰਨ ਦੇ ਦਾਅਵੇ ਕਰਨ ਵਾਲੇ ਨੇਤਾ 7 ਸਾਲਾਂ ਵਿਚ ਦੇਸ਼ ਦੀ ਰਾਜਧਾਨੀ ਵਿਚ ਇਕ ਵੀ ਨਵਾਂ ਹਸਪਤਾਲ ਨਹੀਂ ਬਣਾ ਸਕੇ। ਆਕਸੀਜਨ ਦਾ ਪ੍ਰਬੰਧ ਕਰਨ ਦੀ ਅਸਫਲਤਾ ਕਾਰਨ ਦਿੱਲੀ ਵਿਚ ਸੈਂਕੜੇ ਕੋਵਿਡ ਪੀੜਤ ਹਸਪਤਾਲਾਂ ਵਿਚ ਦਮ ਤੋੜ ਗਏ।ਦਿੱਲੀ ਤੋਂ ਨਿਰਾਸ ਲੋਕਾਂ ਨੂੰ ਪੰਜਾਬ ਵਿਚ ਆਸਰਾ ਮਿਲਿਆ ਅਤੇ ਅਨੇਕਾਂ ਜਾਨਾਂ ਬਚ ਗਈਆਂ।
ਉਨ੍ਹਾਂ ਨੇ ਕੌਂਸਲਰਾਂ ਅਤੇ ਵਾਰਡ ਨੁੰਮਾਇੰਦਿਆਂ ਨੂੰ ਉਨ੍ਹਾਂ ਦੇ ਉਤਸਾਹ ਅਤੇ ਪਾਰਟੀ ਲਈ ਯੋਗਦਾਨ ਲਈ ਸਾਬਾਸ਼ੀ ਦਿੰਦੇ ਹੋਏ ਵਿਸਵਾਸ ਪ੍ਰਗਟ ਕੀਤਾ ਕਿ ਭਵਿੱਖ ਵਿਚ ਵੀ ਉਹ ਲੋਕਾਂ ਦੇ ਦੁੱਖ ਦਰਦ ਵੰਡਨ ਵਿਚ ਇਸੇ ਤਰਾਂ ਅੱਗੇ ਰਹਿਣਗੇ।
