ਸੋਨੀ ਐਂਟਰਟੇਨਮੈਂਟ ਟੈਲੀਵਿਜ਼ਨ ‘ਤੇ ਮਸ਼ਹੂਰ ਸਿੰਗਿੰਗ ਰਿਐਲਿਟੀ ਸ਼ੋਅ ‘ਸੁਪਰ ਸਟਾਰ ਸਿੰਗਰ-2’ ਦੇਸ਼ ਭਰ ਦੇ ਬੱਚਿਆਂ ਨੂੰ ਰਾਸ਼ਟਰੀ ਟੈਲੀਵਿਜ਼ਨ ‘ਤੇ ਆਪਣੀ ਯੋਗਤਾ ਅਤੇ ਵੋਕਲ ਹੁਨਰ ਨੂੰ ਪ੍ਰਦਰਸ਼ਿਤ ਕਰਨ ਦਾ ਮੌਕਾ ਦਿੰਦਾ ਹੈ। 3 ਅਤੇ 4 ਸਤੰਬਰ 2022 ਨੂੰ ਇਸ ਮਸ਼ਹੂਰ ਸਿੰਗਿੰਗ ਰਿਐਲਿਟੀ ਸ਼ੋਅ ਦਾ ਫ਼ਾਈਨਲ ਮੁਕਾਬਲਾ ਹੋਣ ਜਾ ਰਿਹਾ ਹੈ। ਇਸ ਸਿੰਗਿੰਗ ਰਿਐਲਿਟੀ ਸ਼ੋਅ ਵਿਚ ਸਾਇਸ਼ਾ ਗੁਪਤਾ ਜੋ ਕਿ ਖਰੜ ਦੀ ਰਹਿਣ ਵਾਲੀ ਹੈ, ਟਾੱਪ-6 ਵਿੱਚ ਪਹੁੰਚ ਗਈ ਹੈ। ਆਪ ਵਿਧਾਇਕ ਅਨਮੋਲ ਗਗਨ ਮਾਨ ਨੇ ਲੋਕਾਂ ਨੂੰ ਸਾਇਸ਼ਾ ਗੁਪਤਾ ਲਈ ਵੱਧ ਤੋਂ ਵੱਧ ਵੋਟਿੰਗ ਕਰ ਕੇ ਜਿਤਾਉਣ ਦੀ ਅਪੀਲ ਕੀਤੀ ਹੈ।
ਅਨਮੋਲ ਗਗਨ ਮਾਨ ਨੇ ਕਿਹਾ ਕਿ “ਖਰੜ ਦੀ ਬੇਟੀ ਸਾਇਸ਼ਾ ਗੁਪਤਾ ‘ਸਟਾਰ ਸੂਪਰ ਸਿੰਗਰ ਸੀਜ਼ਨ-2’ ਵਿੱਚ ਟਾੱਪ-6 ਵਿੱਚ ਪਹੁੰਚ ਗਈ ਹੈ। ਫ਼ਾਈਨਲ ਮੁਕਾਬਲਾ 3 ਅਤੇ 4 ਸਤੰਬਰ 2022 ਨੂੰ ਹੋਣਾ ਹੈ। ਮੇਰੀ ਆਪ ਸਭ ਨੂੰ ਅਪੀਲ ਹੈ ਕਿ ਇਸ ਧੀ ਨੂੰ ਵੋਟ ਪਾ ਕੇ ਵੱਧ ਤੋਂ ਵੱਧ ਹਿਮਾਇਤ ਕਰੋ ਤਾਂ ਕਿ ਸਾਡੀਆਂ ਹੋਰ ਧੀਆਂ ਦੇ ਅੱਗੇ ਵਧਣ ਲਈ ਰਾਹ ਖੁੱਲ੍ਹਣ।”
ਦੱਸ ਦਈਏ ਕਿ ਸੁਪਰਸਟਾਰ ਸਿੰਗਰ ਸੀਜ਼ਨ 2 ਦੀ ਸ਼ੁਰੂਆਤ 23 ਅਪ੍ਰੈਲ, 2022 ਨੂੰ ਕੀਤੀ ਗਈ ਸੀ, ਅਤੇ ਇਸ ਨੇ 26 ਤੋਂ ਵੱਧ ਐਪੀਸੋਡ ਪੂਰੇ ਕਰ ਲਏ ਹਨ। ਬਹੁਤ ਸਾਰੇ ਲੋਕ ਸੀਜ਼ਨ 2 ਦੇ ਵਿਜੇਤਾ ਦੇ ਨਾਮ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ ਸੁਪਰਸਟਾਰ ਸਿੰਗਰ ਸੀਜ਼ਨ 2 ਹਰ ਸ਼ਨੀਵਾਰ ਅਤੇ ਐਤਵਾਰ ਰਾਤ 8:00 ਵਜੇ, ਸੋਨੀ ਟੀਵੀ ‘ਤੇ ਪ੍ਰਸਾਰਿਤ ਹੁੰਦਾ ਹੈ।