ਭਾਰਤ ਦੀ ਵਿੱਤੀ ਰਾਜਧਾਨੀ ਮੁੰਬਈ ਏਸ਼ੀਆ ਦੀ ਅਰਬਪਤੀਆਂ ਦੀ ਰਾਜਧਾਨੀ ਬਣ ਗਈ ਹੈ। ਮੁੰਬਈ ਨੇ ਚੀਨ ਦੀ ਰਾਜਧਾਨੀ ਬੀਜਿੰਗ ਨੂੰ ਪਿੱਛੇ ਛੱਡਦੇ ਹੋਏ ਪਹਿਲੀ ਵਾਰ ਇਹ ਮੁਕਾਮ ਹਾਸਲ ਕੀਤਾ ਹੈ। 603 ਵਰਗ ਕਿਲੋਮੀਟਰ ਦੇ ਖੇਤਰ ਵਾਲੇ ਇਸ ਸ਼ਹਿਰ ਵਿੱਚ 92 ਅਰਬਪਤੀ ਰਹਿੰਦੇ ਹਨ, ਜਦੋਂ ਕਿ ਬੀਜਿੰਗ ਵਿੱਚ 16,000 ਵਰਗ ਕਿਲੋਮੀਟਰ ਵਿੱਚ 91 ਅਰਬਪਤੀ ਹਨ।
‘ਹੁਰੂਨ ਰਿਸਰਚ ਦੀ 2024 ਗਲੋਬਲ ਰਿਚ ਲਿਸਟ’ ਦੇ ਅਨੁਸਾਰ ਪਿਛਲੇ ਇੱਕ ਸਾਲ ਵਿੱਚ, ਮੁੰਬਈ ਵਿੱਚ 26 ਨਵੇਂ ਲੋਕ ਅਰਬਪਤੀ ਬਣੇ ਹਨ, ਜਦਕਿ ਬੀਜਿੰਗ ਵਿੱਚ, ਇਸ ਸਮੇਂ ਦੌਰਾਨ 18 ਲੋਕ ਸੂਚੀ ਤੋਂ ਬਾਹਰ ਹੋ ਗਏ ਹਨ। ਚੀਨ ਵਿੱਚ 814 ਅਰਬਪਤੀ ਹਨ, ਜਦੋਂ ਕਿ ਭਾਰਤ ਵਿੱਚ 271 ਅਰਬਪਤੀ ਹਨ। ਮੁੰਬਈ ਹੁਣ ਵਿਸ਼ਵ ਪੱਧਰ ‘ਤੇ ਇਸ ਸੂਚੀ ਵਿਚ ਤੀਜੇ ਸਥਾਨ ‘ਤੇ ਪਹੁੰਚ ਗਿਆ ਹੈ। ਪਹਿਲੇ ਸਥਾਨ ‘ਤੇ ਨਿਊਯਾਰਕ ਹੈ, ਇੱਥੇ 119 ਅਰਬਪਤੀ ਰਹਿੰਦੇ ਹਨ, ਜਦਕਿ ਦੂਜੇ ਸਥਾਨ ‘ਤੇ ਲੰਡਨ ਹੈ, ਜਿੱਥੇ 97 ਲੋਕ ਅਰਬਪਤੀ ਹਨ।
ਅਰਬਪਤੀ ਉਹ ਲੋਕ ਹਨ ਜਿਨ੍ਹਾਂ ਕੋਲ 1 ਬਿਲੀਅਨ ਡਾਲਰ (ਲਗਭਗ 8,333 ਕਰੋੜ ਰੁਪਏ) ਤੋਂ ਵੱਧ ਦੀ ਜਾਇਦਾਦ ਹੈ। ਰਿਪੋਰਟ ਮੁਤਾਬਕ ਮੁੰਬਈ ਦੇ ਕੁੱਲ 92 ਲੋਕਾਂ ਦੀ ਸੰਪਤੀ ਇਕ ਸਾਲ ‘ਚ 47 ਫੀਸਦੀ ਵਧ ਕੇ 445 ਅਰਬ ਡਾਲਰ (37.09 ਲੱਖ ਕਰੋੜ ਰੁਪਏ) ਹੋ ਗਈ ਹੈ। ਇਸ ਦੇ ਨਾਲ ਹੀ ਚੀਨ ਦੀ ਰਾਜਧਾਨੀ ‘ਚ ਅਰਬਪਤੀਆਂ ਦੀ ਜਾਇਦਾਦ 28 ਫੀਸਦੀ ਘੱਟ ਕੇ 265 ਅਰਬ ਡਾਲਰ (22.08 ਲੱਖ ਕਰੋੜ ਰੁਪਏ) ਰਹਿ ਗਈ ਹੈ।
ਭਾਰਤ ਵਿੱਚ ਇਸ ਸਮੇਂ 271 ਅਰਬਪਤੀ ਹਨ, ਪਰ ਦੁਨੀਆ ਦੇ ਚੋਟੀ ਦੇ 20 ਸਭ ਤੋਂ ਅਮੀਰ ਲੋਕਾਂ ਵਿੱਚ ਸਿਰਫ਼ ਦੋ ਭਾਰਤੀ ਹਨ। ਇਨ੍ਹਾਂ ‘ਚ ਰਿਲਾਇੰਸ ਇੰਡਸਟਰੀਜ਼ ਦੇ ਚੇਅਰਮੈਨ ਮੁਕੇਸ਼ ਅੰਬਾਨੀ 9.43 ਲੱਖ ਕਰੋੜ ਰੁਪਏ ਦੀ ਜਾਇਦਾਦ ਨਾਲ 11ਵੇਂ ਨੰਬਰ ‘ਤੇ ਹਨ। ਇਸ ਦੇ ਨਾਲ ਹੀ ਇਸ ਸੂਚੀ ‘ਚ ਅਡਾਨੀ ਗਰੁੱਪ ਦੇ ਚੇਅਰਮੈਨ ਗੌਤਮ ਅਡਾਨੀ 18ਵੇਂ ਨੰਬਰ ‘ਤੇ ਹਨ, ਉਨ੍ਹਾਂ ਕੋਲ 6.73 ਲੱਖ ਕਰੋੜ ਰੁਪਏ ਦੀ ਜਾਇਦਾਦ ਹੈ।
